[1] Baryo ka kuhaaniyyohi wewween ichoow ewweenki Ya'huud tuumman Yeessohi layagiis goocheen.
[2] Hidhideene, khaateene, Bilaatohi gaafanee dahan gesseen.
[3] Chirri Yuudahi Yeesso 'dub gooche saggi Yeesso liihukkumo omoot liikagooche arge ka, weyti ejer istowe. Chilimmeti goorat lahaageete tomon seyyahe sookhaate, kuhaaniyyohi wewween ichoow ewweenki Ya'huud ikeene.
[4] “An ha'daabe gele, a mehe an eta wohoo iyeeline atin ikeene, diiggiis gele,” yidah. Wihi icho ilaabeen, “Wahaas walah icho nah iyahiin mele! Ati on i'di at tadeeh dah.”
[5] Yuuda 'deerka chilimme minki Waakhe buure goyaka khube, 'deerka irte, geeyoo iskasooloo'diche, isyigis.
[6] Kuhaaniyyohi wewween la chilimme khaateene wihi icho yidaaheen, “Amurre ichoow chilimmetane ugarti minki Waakhe buure lakalug'do ma israahaan, i'di tahe a chilimmeti diig.”
[7] 'Deerka saggi iche chilimme ikhaatto gosoo etoo 'diryo haaggicho leeyahe kasoogatto goosse, 'dee gos eti yeelane yumuy lakahawwaala.
[8] Jeentetaase intaas ichoowka uliba laka, magahiche Gosi Diig liiyadeeh.
[9] 'Deerka wihi eti Waákh íyeyyeedo Yeeremiya layadeeh ka lacheeke labuuhiche. “Chilimmeti lahaageete tomon seyyahe khaateen, a gatoti 'doo'di Issiraayel igoochee,
[10] i'di Kamur ani iyidah u, chilimmetaas khaateene, gosi eti 'diryo haaggicho kasoogatteen.”
[11] Yeesso geeddaas ba Bilaatohi gaafanee ortiis tolossate, gaafana la wihi us worsate, “Karnati Ya'huud a ati?” Yeesso wihi us ilaabe, “A rum, a i'daas at elatti on.”
[12] Chirra kuhaaniyyohi wewween ichoow ewweenki Ya'huud Yeesso cheektaan, us walah us ilaabe mele.
[13] Bilaato 'deerka wihi us worsate, “Waha icho kaacheektaan ma daagto?”
[14] I'daasenyi Yeesso walah us laabe mele, yeedoo kalday laka ma ilaabine, ichoowka gaafana weyti girmeeste.
[15] Hugunki gaafana ka, daawti Baasakka ka etoo hidane urur usuhi lasoofuro soobahsate iche soofura.
[16] Maantaas la etoo weyti jeenteti suujoonkiis u lagarti Barraba layadeehe hidan, a jira.
[17] Inkoo 'deerka icho urureen ka, Bilaato wihi us icho worsate, “Ayyo atin isoofura 'doontaan, Barraba bal Yeessohi Ki Lasubhe layadeeh?”
[18] A mehe Bilaato saggi icho jeenteeti kal'darri on u Yeesso dahanohiis igesseen a garta.
[19] Bilaato komborti enenyet lakahukkumo kafiddiyaayi, makhaabassiis farniin isooeregte, “Etaas uskeeloo iyeelin wohoo rucchul laka ayeeline, diiggiis agelin. I'di tahe ibeenkate issilloteey ka jeentetiis u weyti sina a ikawaartee,” itidah.
[20] I'daasenyi kuhaaniyyohi wewween ichoow ewweenki Ya'huud ba urur malicho urgiyicheene 'dee Barrabahi lasoofuro Yeesso la layagiis a daaheen.
[21] Gaafana wihi us urur worsate, “Reera lammatiis, koh atin isoofuro 'doontaan?” Wihi icho ilaabeen, “Barraba.”
[22] Bilaato wihi us worsate, “'Deerka Yeessohi Ki Lasubhe layadeeh i'doh idaahe?” Icho tuumman la wihi icho ilaabeen, “Massalaaba kakaah.”
[23] Bilaato wihi us worsate, “A i'doh? Mehe suujenye yeele?” I'daasenyi geeddi kootteet 'dirihiis riireene, “Massalaaba kakaah!” yidaaheen.
[24] Chirri Bilaato saggi us wohoo iyeeline i'daasenyi urur weyti iuskulaate il ibaabiicho arge ka, bicche on khaate, urur ortiis ka dahano dikhte. Wihi us yidah, “An eta wohoo rucchul laka iyeelin diiggiis ma gelo, khaata i'di atin tadeehiin daha.”
[25] Enenyet tuumman wihi us ilaabe, “Diiggiis nah ichoow nyaakhuteenyo a nah fuulo!”
[26] Bilaato 'deerka Barraba icho isoofure. I'daasenyi amuri Yeesso lakadoocho toro massalaaba lakakaaho bahche.
[27] 'Deerka iskar gaafana Yeesso khaatte, minki buurenye gaafana igelo geesse, rabittoo iskareet tuumman la Yeesso khaarisse.
[28] Darfohiis kabihisse, kabuu'doo muggee i'di karnat u korisse.
[29] 'Duuboo kudaheet iskayuubte matah korisse, wussoo dahantiisti miigeet gelisse, ortiis ka jilbo il kagu'dubte kachaaratte, “Karnati Ya'huudoow, jiroti deer 'hel!” idowte.
[30] Hanjuf kaattufte, wussaas kakhaatte matah kaajjahte.
[31] Inkoo icho kachaarteen ka, kabuu'd kabahcheene gaaddiis gesseen. 'Deerka leebaheene woyeen massalaaba kakaahaanee.
[32] Chirra icho bahaan ka, etoo ilkerengeetti Kureene magahiis Siimon layadeeh 'heleene, massalaaba Yeesso sinnaan ihosseen.
[33] Meessoo Golgoo'da layadeeh yimaateen. Golgoo'da la a mehe ya, Meessi Lafohi Matahe Enenyet.
[34] Intaas ka Yeesso farsoti sabiibe reenkoo hadaade lakawarse siisse. I'daasenyi inkoo us chanchame ka 'dii'de.
[35] Inkoo iche massalaaba kakaahte ka, kura gu'ddateene gaaddiis gisante.
[41] Saggaas on u kuhaaniyyohi wewween ichoow tagaammeti amurre ichoow ewweenki Ya'huud laka a kachaartaane,
[42] “'Doo'di addan a ribe, i'daasenyi isribin ma yabuu'd. Usu a karnati Issiraayel a? 'Diicha toolla massalaaba a kasooyago, 'dee usu a rummeysanni,” esseen.
[43] “Usu Waakhe kakhuufa, ‘Aní Weeli Waakhe,’ iche essa menya? 'Diicha gi'de Waakh usu a ribo chi' Waakh usu 'doono,” yidaaheen.
[44] Saggaas on u 'doo'di hatto lehe laleekaahe laka weyti usu leeabaarrame.
[45] Uus saha'd lihti maalimeet ka il tuumman mug'di yitahye, ichoowka saha'd saagaale eleesse.
[46] Geeddi saha'd saagaal ka, Yeesso hooyi buure ka riire, “Elooy! Elooy! Laama sabakhtani?” yidah. Wahaas la a mehe ya, “Waakkhaayaaw, Waakkhaayaaw, a i'doh ikatabte?”
[47] 'Doo'doo intaas toollo la baabule daage wihi icho yidaaheen, “Usu eti Waákh íyeyyeedo Eliiya layadeeh iche waha.”
[48] Chirraas on kichekoo nyaame, haaruggoo sookhaate, farsoti sabiibe birrakhe buuhiche. Kho'doonkoo deer kahide Yeesso iyooge, 'dee a yubhaabe.
[49] 'Doo'di addan la, “'Diicha, usu Eliiya yamiite ribo a agarro,” yidah.
[50] Yeesso inkoo us toro hooyi buure ka riire ka rubey gooche.
[51] Chirraakka dafarti weyti yobbeenye minki Waakhe buure seley goosso meel lamma seley igoote, sereye kasookharradde ichoowka iliche kabahte. Harra sesseehte, daddaabo laka khakkharradeen.
[52] Hawwaalo furnameene, 'doo'di Waakhe ittaawenye munyeenye goorat tuume omoot lakasookahche.
[53] Icho la hawwaalo goya kasoobaheen. Inkoo Yeesso omoot kasookahe ka ilkerengeetti weene lagane Yeerusaleem irteene, 'doo'di ittaawe la arge.
[54] Chirri eti koobbintoo iskareet itoollo ichoow iskarti leejirte Yeesso yuubisso harrati sesseehto ichoow wihi tuummane yitah agarte ka, weyti nahte, “Rumanka usu Weeli Waakhe eheet,” tidah.
[55] Deyyehoti ittaawe intaas a kijirte, fogaka a 'dey'doossa. Icho Yeesso boroofenhi Gaalilaaya kasooraaheene 'dee gargaaraan.
[56] Goycho ka a Maariyati ilkerengeetti Magdaala, ichoow Maariyati Yaakoobo ichoow Yuussuf desse ichoow abar yeele Sebedaayo.
[57] Geleb ka makhaabaloo kamurenye ilkerengeetti Arima'daaya magahiis Yuussuf layadeehe, ullaka abatti Yeesso yitah yimiy.
[58] Yuussuf Bilaato iirte, sar Yeesso daahe. Bilaato amur bahche a lasiicho, yidah.
[59] Yuussuf sar Yeesso khaate, dafartoo husub kaayyuube.
[60] Go'ddoo daddaabeete husube us isikhute goya kareeche. Daddaabtoo buure la go'd afiche i'dembeleeliye, katabe.
[61] Maariyati ilkerengeetti Magdaala ichoow Maariyati addan ba intaase fiddiyaane, go'ddaas 'dey'doochaan.
[62] Ibeenki kaas sooraaho, Ibeenki Latannabti 'dubiise ka, kuhaaniyyohi wewween ichoow Farissaayo ba Bilaato iirteen.
[63] Wihi icho yidaaheen, “Eti weenoow, wihi etaas ekkeysi leh geeddi us noolyahe yidah a kasoo'hella. Us mehe yidah ya, ‘Chirri maan seyyahe kutte, omoot a kasookaha.’
[64] 'Deerka amur bihiche, go'ddi lakahawwaale a layaakhicho, ichoowka ibeenki seyyahnaatteet a yitaahe. Uus abattitiis iranne sartiis hatine, 'dee 'doo'd ‘Yeesso omoot a kasookahe,’ idowinee. Chi'che i'daas yeesse, ekkeysihicheki toolla, koo Yeesso laka a kuta.”
[65] Bilaato wihi us ilaabe, “Iskarti yaakhisso khaata. Irda go'd geeddi atin tabuu'diin yaakhicha.”
[66] 'Deerka irteene daddaabti go'd lakoote wohoo usu lafure lakaabti kadagcheene, iskarti yaakhisso la ibahcheen.