[1] Yeesso koobanhoo kore, beyti Gaalilaaya maahe nokhte ilkerengeetti us fiddiyo irte.
[2] 'Doo'doo etoo khannane sar tuumman hanjaawte ilaal kasoosi'de, ikeene. Chirri Yeesso saggi 'doo'daas usu ikakhuufo arge ka, wihi us etaas sare hanjaawte iyidah, “Inankaaw, abur'dowin! Uskeelaah a liikaakutee!”
[3] Tagaammetoo amurre uus iche waha daagte ka wihi icho uurassicho ka esseen, “Eta a gafe.”
[4] Yeesso malassicho garte, wihi us worsate, “Mehede mala suuje uurassiin ka idowattaan?
[5] Mehe maanta ki addan ka'dabakhe, chirri an, ‘Uskeelaah a liikaakute,’ iadeeh a ommos an, ‘Kahe soho’ iadeeh?
[6] I'daasenyi saggi Ínam Aadam antohi us harrata ka enenyet uskeel ikakuto ikhabo a abattaan.” 'Deerka wihi us eti sare hanjaawte iyidah, “Tolosso ilaalaah okkhiche, goob iro!”
[7] Et la tolossate, goob irte.
[8] Urur uus waha arge weyti roorro gesse, Waakkhi enenyet antohaas geeddee siiche koolicheen.
[9] Yeesso intaas ka orey isohtaayi, etoo Mattaayo layadeeh usuhi meessi kooddi lakagoocho goya fiddiyo arge. Yeesso la, “Isooraahe abattiteey ateeh,” iyidahye, Mattaayo la kahe usu raahe.
[10] Yeesso min Mattaayo kagolossataayi, 'doo'doo kooddi goocho ittaawe ichoow 'doo'doo 'doo'di uskeel leh liiekkaacho ittaawe yimiyye Yeesso ichoow abattitiis ba leegolossate.
[11] Farissaayo chirri iche waha agarte ka, wihi iche abattitiis worsatte, “Eti atin iween a i'doh 'doo'di kooddi goocho ichoow ki uskeel leh ileegolossata?”
[12] Yeesso la wihi icho essaan daage, wihi us ilaabe, “'Doo'di ilkitárri yowti ki feffeyyan menye a ki khakkhannan.
[13] I'daasenyi taba wihi yeeda essi wihiis abda, ‘An soorriyoti at ibihisso menye, atihi 'doo'di addan uur inugleysatti iche 'doona.’ A mehe 'doo'di an iimiyye an waho, ki 'doo'di fiffissan isiekkaacho menye, i'daasenyi a ki uskeel leh.”
[14] 'Deerka abatti Yoohanahi Enenyet Baattissiyo Yeesso itimiyye wihi iche worsatte, “A i'dohe nah ichoow Farissaayo af ihidanna, i'daasenyi abattitaah af ihidan?”
[15] Yeesso wihi us ilaabe, “'Doo'di mindischo yimiy ma ooyo geeddi eti min disti intaas kijiro menya? Maane a tamiit ti 'doo'd eti min disti lakakhaato, 'deerka 'doo'd af hiiti.”
[16] Yeesso la yeed orey iwoye wihi us yidah, “Et goonankoo dafareete husub gaaddiisti raagane kharradde kadaddabo mele. A mehe goonankaas husub a isinyaama kharradiche la orey isohta.
[17] Ommolla et farsoti sabiibe husub, urgohi uktoote raagan kachibo mele. Chi'icho i'da yeeleen, urgo a dowaane, farso khubatta, urgo laka lawaaya. I'daasenyi farsoti sabiibe husub urgohi uktoote husub on lakachiba. I'daas ka farso ma khubatti, urgo laka ma dowaan.”
[18] Yeesso urur leeyyeedaayi, etoo minki weysiite Ya'huud iween yimiyye, ortiis ka jilbo il kagu'dde wahte wihi us yidah, “Inanteey toolla dow on bujje, i'daasenyi kaale dahantaah ka'daare, 'dee jiro a 'hesso.”
[19] Yeesso tolossate, abattitiis khabaayi makhaabal raahe.
[20] Chirraas on makhaabassoo khannane geeddi gu'h tomon ichoow lamma ba diigte Yeesso 'dubiis leetimiyye, laddi kabuu'diis 'daarte.
[21] Uuriche goyaka mehe tidah ya, “Chirri an kabuu'diis on 'daare, a samaada.”
[22] Yeesso la urgiye makhaabál arge, wihi us iyidah, “Inantaay, abur'dowin! Kakhuufnaanki at ikakhuufte a kisamaache.” Makhaabale chirraas on samaatte.
[23] Chirri Yeesso minki eti minki weysiit iween gele ka, 'doo'di indulle afuufo ichoow ururi kowdooti ba arge.
[24] Wihi us iyidah, “Khar ibaha, iname ma umaatane, i'daasenyi a u'durta.” Icho tuumman la usu kareyteen.
[25] Chirri urur bahe ka, Yeesso minki iname jiifto gele, inám dahan sookhabte, iche la sookahte.
[26] Wahaas us yeele ilaas tuumman ka taa'heen.
[27] Chirra Yeesso intaas kabaho ka, et lamma indo laa usu raahte. Lammache ba riirte, “Ínam Dawuud, uur nah isoonugleyso,” tidah.
[28] Chirri Yeesso minki us fiddiyo gele ka, reeri kootte lammeenye indo laa laka min leegele. Yeesso chirraakka wihi us worsate, “Atin anihi atin samaacho a rummeysattaan?” Iche la wihi iche ilaabte, “Aa Kamur.”
[29] Yeesso 'deerka indohicho 'daare, “Saggi an atin isamaacho a kakhuufteen gone, a atin samaacha,” iyidah.
[30] Chirraas on indo bahcheen. Yeesso icho weyti tootooche wihi us iyidah, “Etoo kalday laka uus waha aban!”
[31] I'daasenyi iche la iratte, wor Yeesso ilaas tuumman ka cheekte.
[32] Chirra reeri kootte lammee baho ka, 'doo'doo etoo ginna dakhatti yeyyeedin iubaa'dan Yeesso ikeene.
[33] Chirri Yeesso et ginna kabahche ka, eti kootte yeyyeedin iubaa'dan yeyyeede, 'doo'd la weyti girmeeste, “Nah injire wihi i'dee ili Issiraayel goyaka ma argin,” yidah.
[34] I'daasenyi Farissaayo wihi iche tidah, “Miigti karnati ginnayyoote enenyet ginna kabahcha.”
[35] Yeesso ilkerengeeto ichoow goobab tuumman goya tabe minassichoki weysiite Ya'huud ka 'doo'd wori Waakh abche. Wori Haaggane dakhi Waakh miinsan icheeke, sugeerre ichoow khannaatte tuumman 'doo'd kabahche.
[36] Chirri us urur arge ka, weyti uur inugleeste, a mehe i'di iiyti ersim ikhabin u, a wa'dwaa'daane, toro la et gargaaro mele.
[37] 'Deerka wihi us abattitiis iyidah, “Gurnaan a buure, i'daasenyi 'doo'di hil haaggicho a koo rucchul.
[38] Maantaka Kamuri gurnaan leh daaha, 'dee 'doo'di ittaawenye gurnaan soogoocho a sooergo.”