[1] “A mehe dakhi goobi Waakh a i'di etoo gosi sabiib khabo. Maantoo baryo ka, irte 'doo'di us kireesti gosiis hil kahaaggicho yowte.
[2] Inkoo icho chilimmeti eti orrahtoo hil haaggiche laguto iskadaageen ka, gos iergate.
[3] “Geeddi saha'd seyyahti chirdeereet ka toro bahe, reeroo inti sokko ka i'daanu toollo 'hele.
[4] Wihi us reera iyidah, ‘Atin laka nyaama goseeyki sabiib hil kahaaggicha amba wihi mujjume atin gutaa.’
[5] 'Deerka reer irte. “Saha'd lihti maalimeet ichoow saha'd saagaal laka toro irte reeroo leeyeede, icho laka irteene gos hil kahaaggicheen.
[6] Saha'd tomon ichoow koow toro irte reeroo toollo 'hele, ‘A i'doh maalinki nool i'daanu itolossaan?’ worsate.
[7] “Wihi icho ilaabeen, ‘Et nah kireeste mele.’ “Wihi us icho iyidah, ‘Atin laka nyaama goseey hil kahaaggicha, amba mujjum atin gutaa.’
[8] “Chirri il gelebnowe ka, eti gos leh falfatiisti ween wahe wihi us iyidah, ‘Nyaame 'doo'di hil haaggiche wahe, gut. Koloo la reeri an yomboka kireesde kasookhabo ichoowka ki an orey kireesde eleeli.’
[9] 'Doo'di hil haaggicho saha'd tomon ichoow koow lakireeste ebba chilimmeti eti orrahti nool hil haaggiche laguto, lagute.
[10] 'Deerka chirri 'doo'di orey lakireeste yamiit, kol us buur 'helo koogyahe. I'daasenyi ebba geeddi eti orrahtoo hil haaggicho laguto on icho laka lagute.
[11] Chirri icho chilimme khaatteen ka, eti gos leh leejaakheen.
[12] Wihi icho iyidaaheen, ‘Reera yomboka lakireeste saha'ddoo kalday hil haaggiche, ichoow nahi hol downe orrahe nah tuhum ekka nah gutte.’
[13] “I'daasenyi eti gos leh wihi us eti yeyyeedo ilaabe, ‘Ey'do, daganso, an ma atin ey'darin. Inno kootte chilimmeti eti orrahtoo hil haaggiche laguto ma iskadaagin a?
[14] Wihi wihiine khaadda irda. Wihi an 'doono, ani on eti yomboka lasookireeste geeddi an atin siiche, icho laka siiche.
[15] Ma imu'dan a cha'an chilimmeteey i'di an 'doono adeeh? Ommos jeenteti an uur 'dabakh iahe kal'darri ikhabtaan?’
[16] “'Deerka 'doo'di 'duboote ki oraat yateehe, ki oraat la ki 'duboot yateeh.”
[17] Yeesso ilkerengeetti weene Yeerusaleem ikoraayi, abattitiisti tomon ichoow lammee 'dol iwahe, wihi us iyidah,
[18] “Inno ilkerengeetti weene Yeerusaleeme i'dulla, Ínam Aadam la 'dube lagoocha kuhaaniyyohi wewween ichoow tagaammeti amurre dahanohicho lagessa, icho la omoot igoochaan.
[19] Icho la dahanohi 'doo'di Waakh igaran gessaane, lakachaarta, laajja ka doochaane, massalaaba kakaahaan. Ibeenki seyyahnaatteet ka omoot lakasookahcha.”
[20] 'Deerka abar yeele Sebedaayo yeeletiche khabtaayi Yeesso itimiyye, ortiis ka jilbo il kagu'dubte ichehi wohoo liiyeelo 'doontaa.
[21] Yeesso la wihi us worsate, “Mehe 'doonta?” Iche la iitatte, “Wihi an 'doono, berri goobaah ka, yeeleteeyta lammee koo ankaahki miigeet siiche a orronti, koo la ankaahki gurro siiche a orronti.”
[22] Yeesso la wihi us icho iyidah, “Atin wihi atin daahtaan wihiche ma garattaan. Atin maanta kokkoobi sinayyoote an dowwanoha ka soodamo damin a tabuu'diin?” Wihi iche ilaabte, “A nabuu'd.”
[23] Yeesso la wihi us iyidah, “Rumanka, kokkoobeey a kadaantaane, i'daasenyi eti ankeeyki miigeet ommos ankeeyki gurro orronti ani mee goocho. Meelassa a ti 'doo'di Aabbaheey iyeele.”
[24] Abattiti addane tomone, chi'iche wahaas daagte ka, yeeletaas lammeenye isleedelatte kahollowte.
[25] Yeesso isiwahe, wihi us iyidah, “Saggi atin igarattaan u, weynaanti 'doo'di Waakh igaran saggi suujenye 'doo'd idakhtaane toro ewweenkicho la wihi 'doo'd yeelo icheeka.
[26] Atin ka i'daas mee. Eti tuummane goytiin ka weynaan 'doono, falfatiin a yitaahe.
[27] Eti tuummane orey 'doono la, bow'datiin a yitaahe.
[28] Saggaas on u, Ínam Aadam ma imaatane 'dee enenyet usu ma ifalo, i'daasenyi a yimiyye 'dee us 'doo'd ifala, rubeytiis diiba, 'dee enenyeti ittaawe mogti uskeelicho iguta.”
[29] Chirra icho ilkerengeetti Yeeriko kabahaan ka, ururoo buure usu raahe.
[30] Reeroo lammeenye indo laa jit afiissa fiddiya, chirri us Yeessohi intaas leeyamiit daage ka, riire, “Kamur, Ínam Dawuud, uur nah isoonugleyso,” yidah.
[31] Urur la leejaakhe, “Gammadicha,” iyidah. I'daasenyi geeddi kootteet laka 'dirihiis riireene, “Kamur, Ínam Dawuud, uur nah isoonugleyso,” yidaaheen.
[32] Yeesso tolossate icho wahe, “Mehe atin iyeelo 'doontaan?” worsate.
[33] Wihi icho ilaabeen, “Kamur, nahi il agarro 'doonna.”
[34] Yeesso la uur isoonugleeste, indohicho 'daare. Chirraas on il argeene usu raaheen.