[1] Farissaayotoo ichoow Sadukaayotoo Yeesso itimiy usu angey gelin 'doontaa. 'Deerka wohoo goobi Waakh kayimiyye miigti Waakh tuso daahte.
[2] Yeesso wihi us ilaabe, “Chirra il gelebnowo, sereye la gu'duu'dantahe, ‘Saahta hir ma 'deyo,’ tadeehiin.
[3] Chirdeer la, chirri sereye gu'duu'dantahe toro il sooankubsame, ‘Hiri hafari buure khabo a soo'deya,’ tadeehiin! Atin serey a yeytaane, wihi 'deeka sooyateeh kaabattaan. I'daasenyi saggi wey'da il ijiro a yeytaane toro la walah atin kaabattaan mele.
[4] 'Doo'di i'deenye uskeel lehe waakkhassi addan wahti on wohoo miigti Waakh tuso yowta. I'daasenyi wihi goorat Waakh Yoona ka enenyet tuse on menye, walah addane lasiicho mele.” Yeesso 'deerka icho katabe irte.
[5] Inkoo abatti beyti Gaalilaaya aficheki 'diri imaahte ka, saggi iche makaate idabte kasse.
[6] Yeesso la wihi us iyidah, “Yeedad Farissaayo ichoow yeedad Sadukaayo ki i'di booddati makaate fuurissee yuubsada.”
[7] Icho la iskaleehawwoocheene wihi icho yidaaheen, “Jeenteti inno makaate isookhaatanne i'daas iessa.”
[8] Yeesso la wihi iche kahawwoosso a garta, wihi us worsate, “Enenna i'daaru marah on ikakhuuftaanee, a i'doh goytiin ka makaatewaayyo ikayeyyeeddaan?
[9] Atin uliba walah ma abanna? Atin makaate chanti an mejeli alif chane kagoolliche ma kasoo'hessaan a? Atin la enjel geeddoh bubbuuhto soolaabteen?
[10] Makaate teebati an mejeli elif affare kagoolliche la? Enjel geeddoh buuhto soolaabteen?
[11] A i'doh saggi an wori golol atin ikaleeyyeedin iabanna? I'daasenyi isyaakhicha yeedad Farissaayo ichoow yeedad Sadukaayo ki i'di booddati makaate fuurissee yuubsada.”
[12] 'Deerka abatti saggi us wori booddataas ikaayyeedine i'daasenyi us wihi Farissaayo ichoow Sadukaayo 'doo'd abchaan yuubsada iessi abatte.
[13] Chirri Yeesso ili ilkerengeetti Kaaysareya Fiiliffi yimiy ka, wihi us abattitiis worsate, “'Doo'd Ínam Aadam a ayyo essa?”
[14] Wihi icho ilaabeen, “Gaasoo ati a Yoohanahi Enenyet Baattissiyo iche essa, gaasoo a Eliiya essa, gaasoo laka a Yeeremiya ommos 'doo'di goorat Waákh íyeyyeedo a kichekoo iche essa.”
[15] “I'daasenyi atin la? An a ayyo tadeehiin?” worsate.
[16] Siimonhi Beetero layadeeh wihi us ilaabe, “At a Ki Lasubhe, a Weeli Waakkhi jirtuu tuumman jiro.”
[17] Yeesso wihi us ilaabe, “Siimon inam Yoohana, ati Waakh a kimaale. I'di tahe runtaas at cheekte ti weeli enenyet katimiy menye, i'daasenyi Aabbaheeyki serey jiro iche kisoobabbakkaahiche.
[18] Wihi an kiadeeh la at a Beetero, i'di minki daddaab sartiis lakadisuu, daddaabta sarcheeda urureey tuumman kadisa. Miigti omooteet la ma kahataatto.
[19] Fureyyohi dakhi goobi Waakh a kisiicha. Walahbaaw at harra ka hiddo, Waakh laka goobiis ka a hide. Wihi at harrata ka furto la, Waakh laka goobi Waakh ka a fure.”
[20] Yeesso 'deerka abattitiis tootooche, uus iche saggi us Ki Lasubhe iyahe etoo kalday laka icheekine.
[21] Uu' maalinkaas, Yeesso abattitiis saggi Waakh igooche us ilkerengeetti weene Yeerusaleeme iirti, ewweenki Ya'huud ichoow kuhaaniyyohi wewween ichoow tagaammeti amurre dahanohicho ka sinati buure liituso, liiyagiise, ibeenki seyyahnaatteet ka omoot liikasookahcho ibabbakkaahiche.
[22] Beetero la Yeesso 'dol geeche leejaakhe, “Waakh meesseen bujiiy! Kamur waha koloo kalday laka ma kiyateehiin,” iyidah.
[23] Yeesso la urgiye wihi us Beetero iyidah, “Seytaankaane fooleey buj! At a daakki itarraantarricho, at wahanyeyyohi Waakh menye, i'daasenyi wahanyeyyohi weeli enenyete kamalatta.”
[24] Yeesso 'deerka wihi us abattitiis iyidah, “Chi' etoo isooraahin 'doono, awtiis a 'dii'do toro la massalaabatiis barbar a sookorsati a isooraaho.
[25] Eti tuummane jirotiis ribin 'doono, jiroti rummaat a waaya. I'daasenyi eti tuummane jirotiis ani iwaayo, jirotiisti rummaat a 'hela.
[26] Etoo maanta, a chirri us wohoo 'hele, chirri us wihi harrata tuumman 'hele, jiroti awtiissa Waakh siiche la waaye? Ommos weeli enenyet maanta mehe diibin yabuu'de jirotiis kadooricha?
[27] I'di tahe Ínam Aadam dowwanoha ka herti Waakh khabaayi anto Aabbahiissa leeyamiite, 'dee ebba wihi us yeele ka sina ommos kala'd laguta.
[28] Rume atin icheeka, gaasiinkoo maanta inta kijiro, omoot ma argo geeddi icho Ínam Aadamhi dakhiis khabaayi yamiit iargin.”