[1] Chirraakka abatti Yeesso itimiyye, “Dakhi goobi Waakh ka ayyo 'doo'di addan tuumman iween?” worsatte.
[2] Weeloo rucchul wahe, goycho toolliche.
[3] Wihi us yidah, “Rume atin icheeka, sammata atin iurgiyine, i'di nyaakhuti rurrucchul iitaahan, koloo kalday laka dakhi goobi Waakh ma gessaan.
[4] Maantaka eti tuummane i'di weeluu isnuglaache, dakhi goobi Waakh ka weyti weenyahe.
[5] “Eti tuummane weeloo i'dee jeenteti us abattiteey iyahuu martiiste, ani imartiiste.
[6] “I'daasenyi chi' etoo 'doo'daar irummeesti kichokoo tarraantarricho wihi ideefo a usuhi daddaabti buurenye gurnaan lakatumo lukhum lakahido, beyti buurenye hoge ka bicche khaataan.
[7] Jeenteti wahanyeyyohi enenyet uskeel kalug'duu, 'doo'di harrata sinati sugto eenna a buure! Wahanyeyyoha a yamiitiine, i'daasenyi eti icho leeyamiitiin sinati sugto eenna a buure!
[8] Chi' dahantaah ommos luhtaah uskeel kaalugu'ddo gooche rog. Atihi dahan laaye ommos luh laaye jiroti jirtuu imassan 'hesso deefta, atihi dahano lammacho ommos luhlo lammacho khabto 'dabi armaanjireen lakalug'do ka.
[9] Chi' issaah uskeel kaalugu'ddo la, bihiche rog. Atihi issoo laaye jiroti jirtuu imassan 'hesso deefta, atihi indo lammacho khabto, meessi 'dabi armaanjireen lakaalug'do ka.
[10] Taba nyaakhuti rurrucchul a'darraawina. I'di tahe wihi an atin iadeeh, herti Waakhe goobi Waakh ka icho yuubisso kol dakkhan goobi Waakh ka fool Aabbaheey a agarta.
[12] “Bal waha kamalda. Ersinki iiyti kudoowe khabo, naffoo kabaabe, mehe yeela? Ersinkaas iiyti tomon saagaal ichoow saagaale hal yaakhtaayi a kataba, irta naffi kaldache baabe yowta menya?
[13] Chirri us 'hele la, naffaas kalday weyti kahamaada iiyti kootte tomon saagaal ichoow saagaalenye ibaabin ka laka.
[14] Aabbaheeyki serey jiro laka saggaas u, nyaakhuta rurrucchul ichehi koo kalday laka baabo ma 'doono.
[15] “Chirri etaahkoo koo Kiriistee uskeeloo kiyeele, iiro saggi us uskeel kiyeele icheeke, lammatiin on la a eheetti. Chirri us kidaage, etaas a sooholisse.
[16] I'daasenyi chirri us kidaagiwwaaye, etoo ommos et lammatoo addane Kiriisto rummeysatte khaato, leeyyeeda, 'dee et lammataas ommos et seyyahtaas gar a laabto.
[17] Chirri us 'doo'daas sookute, urur Kiriisto icheek. Chirri us urur Kiriisto laka sookute, i'di eti Waakh igaran ommos i'di eti suujenye kooddi goocho iekkaacha.
[18] “Rume atin icheeka, walahbaaw at harra ka hiddo, Waakh laka goobiis ka a hide. Wihi at harrata ka furto la, Waakh laka goobi Waakh ka a fure.”
[19] “Toro wihi an atin iadeeh, chirri harrata ka et lammatoo wihi iche Waakh daahto iskadaagte, Aabbaheeyki serey jiro wahaas iche daahte a siicha.
[20] Wihi tahe inti et lamma ommos et seyyahe jeenteti icho abattiteey iyahiin u kakulmeen, an goycho a kijira.”
[21] Yomboka Beetero Yeesso iyimiyye wihi us worsate, “Kamur, chirri walaaleeykoo uskeeloo iyeele, kol geeddoh uskeel ikakuto? Kol teeba ikakuta?”
[22] Yeesso wihi us ilaabe, “Wihi an kiadeeh, kol teeba menye, i'daasenyi kol tomon teeba ichoow teeba ikakut.
[23] “Iyookkoka dakhi goobi Waakh a i'di karnati ilbooyyetiis ebba mogti us kakhabe ichehi soogutto 'doono.
[24] Chirra us worsan sookhabte ka, koo mogti weyti buurenye, jirtuu dakkhan igunnamin khabo liikeene.
[25] Mog gunnaan ma yabuu'd gone, kamuriis amuri usu ichoow makhaabassiis ichoow nyaakhutiis ichoow wihi us khabo tuumman lakoororicho, 'dee mog lakaguto bahche.
[26] “Ilbooy kamuriis ortiis ka jilbo il kagu'dde, hawwaaste, ‘Kamuraaw, isug on, amba mogtaah tuumman kisoogutaa,’ iyidah.
[27] Kamuri ilbooyaas la uur isoonugleeste, mog lee'diiche, toro la 'diiche irte.
[28] “I'daasenyi ilbooyaas uus bahe, ilbooyoo addane wahalhiisenye mogti chilimmeti eti orrah kudoo hil haaggiche laguto kakhabo 'hele, kur khabte, hude, ‘Toolla kofche mogteey soogut,’ iyidah.
[29] “Ilbooyaas wahalhiise luhlo khabte, hawwaaste, ‘Isug on, amba mogtaah kisoogutaa,’ iyidah.
[30] “I'daasenyi ilbooyaas us mogtiis khabo sugnaan lee'dii'de, khaate jeela gesse, ichoowka maanti us mog sooguto.
[31] Chirri ilbooyyeti addan wihi yitah agarte ka, weyti bolkheene, irteene, kamuricho wihi yitah tuumman icheekeen.
[32] “Kamuricho 'deerka ilbooyi mogtiis khabo wahe, wihi us iyidah, ‘Atiha ilbooyi suuje, an jeenteti at ihawwaassatte u, mogteeyti ati khabto tuumman a kilee'diiche.
[33] Saggaas maanta an uur kisoonugleesde u, at laka ilbooyaas wahalhaahe uur ma inugleysatti?’
[34] Kamuriis hol ka, dahanohi 'doo'di usu jeela ka sina kawaaricho gesse ichoowka maanti us mog tuumman sooguto.
[35] “Sammata at walaalaah uuraah ka tuum uskeel ikakutin, Aabbaheeyki serey jiro laka, etiimba i'daas on yeela.”