[1] Chirra icho ilkerengeetti weene Yeerusaleem isoodowwaateene, ilkerengeetti Be'difaage Hali Geeyohi Oolif haggee yimaateen ka, Yeesso abattitoo lammee ergate.
[2] Wihi us icho iyidah, “Ilkerengeetti ortiin jirto irda, chirraas on eheli hidane, inkuraarruhiis hagga tololo 'hessaan. Lammacho soofura ani ikeena.
[3] Chirri etoo wohoo atin iidah, wihi atin itadeehiin, Kamure 'doona toolla kofcheeda on sooerga.”
[4] Waha la a yitaaheene 'dee wihi eti Waákh íyeyyeedo ka lacheeke labuuhicha.
[5] “'Doo'di ilkerengeetti Saayon yaal mehe itadeeh ya, ‘Yeya, karnatiin a yamiite, ulla a etoo samacchaare, inkuraarru sookora, weeli ehele sookora.’ ”
[6] Abattiti iratte, wihi kootte Yeesso yeela iyidah yeesse.
[7] Ehel ichoow inkuraarruhiche ba sookhaateene, kabuu'ddeticho inkuraarru kagaadeene, Yeesso koorronte.
[8] Ururi buure kabuu'ddeticho jit kagolge, gaasoo la seytohi geeyoot soogooche jit kagolge.
[9] Ururreti ortiis raahto ichoow ti 'dubiis raahto ba riirte wihi iche tidah, “Inam Dawuud a lakoolicho!” “Waakh ki magahi Kamur kayamiit a imaale!” “Waakkheenki inti weyti saraat kijiro koolinno!”
[10] Chirri Yeesso ilkerengeetti weene Yeerusaleem gele ka, ilkerengeet tuumman kowdo kalday titahye, enenyet, “Kan a ayyo?” esse.
[11] Urur la wihi us laabe, “Kan a eti Waákh íyeyyeedo, Yeesso layadeehe, ilkerengeetti Naasarete boroofenhi Gaalilaaya kajirto kayimiy.”
[12] Yeesso uranti minki Waakhe buure gele, 'doo'di intaas ka walah gatti ichoow ki walah ororicho tuumman rihe. Komborohi balballaaddane 'doo'di chilimmeti ilassi addan iskadooricho leeyahe ichoow komborohi 'doo'di kutukuurrug ororsati ba rerreeche,
[13] wihi us iyidah, “Wihi chiiran, ‘Minkeey minki weysiite layadeeh,’ i'daasenyi, ‘inti 'doo'di hatto leh kadagti,’ iche kayeesseen.”
[14] 'Doo'di indo laa ichoow 'doo'di luhlo laa Yeesso uranti minki Waakhe buure ka liikeene, ulla icho samaache.
[15] I'daasenyi chirri kuhaaniyyohi wewween ichoow tagaammeti amurre girmohi us yeele argeene, toro nyaakhuti uranti minki Waakhe buure ka riiro, “Ínam Dawuud a lakoolicho,” essi daageen ka, weyti holloween.
[16] Wihi icho Yeesso worsateen, “Wihi nyaakhuta essi ma daagto?” Yeesso wihi us ilaabe, “Aa, a daaga. Atin waha injire ma soomin a? “ ‘Afassi 'daa'hum ichoow nyaakhuti rurrucchul ba koolohi icho mujjum kikoolichaan a abisse.’ ”
[17] Yeesso la kuhaaniyyohi wewween ichoow tagaammeti amurre katabe, ilkerengeet kabahe, ilkerengeetti Be'daaniya irte, ibeenkoo intaas barye.
[18] Baryo ka geedda us ilkerengeetti weene Yeerusaleem inokhti Yeesso ankaye.
[19] Chu'us geeyoo fiige jit 'dossiis katoollo arge ka ibuje. I'daasenyi walah us ka'hele mele, seeb on menye. 'Deerka geey fale, wihi us iyidah, “At ba toro jirtuu tuumman gurnaan deliwwaayta.” Geey chirraas on angage.
[20] Abatti chirri iche wahaas agarte ka, weyti girmeysatte, “Geeyi fiig saggoh dowwa on iangage?” worsatte.
[21] Yeesso wihi us ilaabe, “Rume atin icheeka, chirri atin Waakh kakhuuftaane, uurlammaal la ikhabin, wihi geeyi fiig layeele kalday ma yeessaane, i'daasenyi a geeddi atin hala laka, ‘Nyaam beyti buure goya iskalugu'd,’ itadeehiine, i'daas la tateeh.
[22] Chirri atin Waakh rummeysattaan, walahbaaw atin weysi ka daahteen, a 'hessaan.”
[23] Yeesso uranti minki Waakhe buure gele, geedda us ayti Waakh enenyet abcho, kuhaaniyyohi wewween ichoow ewweenki Ya'huud ba Yeesso iyimaateen. Wihi icho worsateen, “Antohi at wahanyeyyoha kahaaggisso a weheeyya? Antoha la ayyo kisiiche?”
[24] Yeesso wihi us ilaabe, “An laka wohoo kaldaye atin worsada. Chirri atin isoolaabteen, ani antohi an khabo, an wahanyeyyoha dakkhan kahaaggicho, a weheeyya a atin isoocheeka.
[25] Yoohanahi Enenyet Baattissiyo, antohi us enenyet kabaattissiyo, intoh kayimaateen? Waakhe kayimaateen, bal enenyet?” Iskaleehawwoocheene wihi icho isiyidaaheen, “Chi'inno, ‘Waakhe kayimaateen,’ nadeeh, mehe inno iyadeeh ya, ‘A i'doh 'deerka irummeysanna?’
[26] I'daasenyi chi'inno, ‘Enenyete kayimaateen,’ nadeeh, 'doo'de karoorra, a mehe icho tuumman Yoohana eti Waákh íyeyyeedo ikhaataan.”
[27] 'Deerka wihi icho Yeesso ilaabeen, “Nah ma garanni.” Ulla 'deerka iiyeyye, “Ani laka antohi an wahanyeyyoha kahaaggicho ma atin isoocheeko gon.”
[28] Yeesso wihi us 'doo'daas iyidah, “Hawweesa kamalda bal. Makhaabaloo ínam lamma khabe, inanki weene iirte, ‘Inankaaw, maalinka iro goseenki sabiib khut,’ iyidah.
[29] “Wihi us ilaabe, ‘Ma irdi,’ toro i'daasenyi yomboka maliis urgiyiche, gos goya irte.
[30] “Makhaabal toro inankiiski addan iirte, wihi us iyidah, ‘Inankaaw, bal iro, goseenki sabiib khut.’ Ínam la wihi us ilaabe, ‘Ayye, aabba, amba irda,’ i'daasenyi gos ma iran.
[31] “Yeelataas lammache, koh wihi aabbahicho yeela iyidah yeele?” Wihi icho ilaabeen, “Ki ween.” Yeesso chirraakka wihi us iyidah, “Rume atin icheeka, 'doo'di inno 'doo'di uskeel leh nadeehe, i'di maanta 'doo'di kooddi goocho ichoow malaayeyyee, icho ortiin dakhi Waakh gela.
[32] I'di tahe Yoohanahi Enenyet Baattissiyo a atin iyimiyye 'dee jiti fissan atin tusa, atin la usu ma rummeysanne, i'daasenyi 'doo'di kooddi goocho ichoow malaayeyyo, iche usú rummeesté. Inkoo atin wahaas tuumman agarteen laka, yomboka uskeeliin ma 'diinne, usu ma rummeysan.
[33] “Mammahtoo addan dagansada. Etoo gos lehe geeyohi sabiib gosiis goyaka il gesse a jire. Gos la oot kamarche inti gurnaanki sabiib lakayabti khute. Koondihi deere eti gos yaakhicho fiddiyo laka dise. 'Deerka gosiis lakireeste, ulla iloo deer sulhaal kiirte.
[34] Maanti ibeenki gurnaan lagurti yitah ka, eti gos leh falfayyohiis 'doo'di gos kireeste iergate, gisi gurnaankiis yowte.
[35] “'Doo'di gos kireeste ilbooyye khabte, koo jaheene, koo la yigaaseene, ki seyyahnaatteet la dagah kachibeen.
[36] 'Deerka ilbooyyetoo addane wihi oraat kiittaawe icho iergate. 'Doo'di gos kireeste la wihi us ilbooyyeti oraat yeele on taas laka yeele.
[37] 'Da'ddaboka inankiis icho iergate, ‘Rumanka inankeey 'dee a inkaanyitta on,’ yidah.
[38] “I'daasenyi 'doo'di gos kireeste uus icho ínam argeen, mehe isiyidaaheen ya, ‘Ki dahal leh kalla. Kaaleya a nigaase, 'dee dahalhiis a khaatanni.’
[39] 'Deerka khabteene gosi sabiib khariis iseyeene, yigaaseen.
[40] “Maantaka chi' eti gosi leh yimiy, 'doo'daas gos kireeste i'doh yadeeh?”
[41] Wihi icho ilaabeen, “'Doo'daas sussuuje jiti suuje ka a bakkicha, 'dee 'doo'doo addane mujjumenye maanti gurnaan lagurti gisi gurnaankiis siicho gos siicha kireesta.”
[42] Yeesso wihi us icho iyidah, “Atin Chiirnaanneti Waakh ka waha a soonteen menya? “ ‘Daakki 'doo'di minan diso 'dii'de, iche tirrinki dagaheete min tiiro yitah. Kamure waha yeele, indoheen ka la weyti haagganyahiin.’
[43] “Maantaka wihi an atin icheeko, dakhi Waakh a atin lakakhaata yaafti gurnaanki Waakh 'doono desso lasiicha.
[44] Eti tuummane daakka sartiis kakufe, a jejjeba, i'daasenyi chirri daakkaas etoo kasoodihe, etaas a urkaha.”
[45] Chirri kuhaaniyyohi wewween ichoow Farissaayo mammaho Yeesso daageen ka, saggi us woricho ikaayyeede garteen.
[46] Jiti iche Yeesso kakhabatti yowatte. I'daasenyi urure karooraan. A mehe enenyet Yeesso eti Waákh íyeyyeedo ikhaate.