[1] Inkoo Yeesso abattiisti tomon ichoow lammee wihi iche yeesso icheeke ka, intaas katabe, ilkerengeetohi addan irte enenyet wori Waakh abche, toro la Yeedi Waakh icheeke.
[2] Yoohanahi Enenyet Baattissiyo jeela kajiraayi, wihi Kiriisto yeelo daage, abattiistoo Yeesso iergate.
[3] Wihi icho Yeesso sooworsateen, “At a Ki Lasubhe lasugo bal etoo addane sugna?”
[4] Yeesso la wihi us ilaabe, “Nyaama nokhda Yoohana waha atin daagtaan ichoow waha atin agartaan icheeka.
[5] 'Doo'di indo laa kola indo a bahcha, ki luhlo ikhabin luhlo a bahcha. 'Doo'di bu'dayyo sar kakhabe a lasamaacha, ki dogo laa la dogo a bahcha. 'Doo'di tuume la omoot a lakasookahcha. 'Doo'di wahanyeyyohi Waakh miinsan ka miskiine la Wori Haaggan a liicheeka.
[6] Eti Waakh imaalo a ki jeenteteey u kakhuufnaanki us ikakhuufo i'diin.”
[7] Chirra abatti Yoohana nokhatti ka, Yeesso Yoohana woriis urur kaleeyyeede wihi us yidah, “Bal wihi atin hidaad ka iratteene sooagarteen kamalda. Etoo 'dabakhenye i'di hoosi hafar sesseehicho mee iratteene agarteen.
[8] Bal wihi atin iratteene sooagarteen kamalda. A etoo gaaddi haaggan khabo? Mele! 'Doo'di gaaddi weyti hahhaaggan khabo a 'doo'di minassi karnatoot fiddiyo.
[9] 'Deerka mehe iratteene agarteen? Eti Waákh íyeyyeedo agarteen? Aa, rumanka eti atin agarteen, eti Waákh íyeyyeedo laka a kussanyahe.
[10] Eti woriis lachiire a kan. “ ‘Yeya, ergattiteey ortaahha erga, iche rubeyohi enenyete tannabissa.’ ”
[11] Rume atin icheeka, weeli enenyet goyaka, eti Yoohanahi Enenyet Baattissiyo kaween ma jiro. I'daasenyi eti dakhi goobi Waakh ka 'daran laka, us Yoohana a kaweenyahe.
[12] Uus ibeenneti Yoohanahi Enenyet Baattissiyo jire kasookhabatti ichoowka toolla, dakhi goobi Waakh sina a kawaarte. 'Doo'di sussuuje la usuhi goobi Waakh khabti marma.
[13] I'di tahe Chiirnaanneti 'doo'di Waákh íyeyyeedo ichoow ti Amurre ba, wori dakhi goobi Waakhe kaayyeedeene ichoowka Yoohana yimiy.
[14] Chirri atin wihi icho yidaaheen khaatattaan la, Yoohana a Eliiyahi dowwanoha yamiit.
[15] Eti dogo khabo a daago gi'de!
[16] “Kamalda bal, 'doo'di wey'da mehe iokkanaacho? Icho a i'di nyaakhuti sokkoyyo goyaka nyaakhutoo addan kariiro,
[17] “ ‘Nah a gurroonne, atin la gurro ma nah leeokkhin. Nah geeyi maanti enenyet buje ladowo atin isoodowne, atin la ma ooyin,’ isidowo.
[18] A mehe maanti Yoohana yimiy, us afe hiite toro la farsotoo rucchule sabiib laka ma ubhaabane, 'doo'd la toro mehe yidah ya, ‘Usu alah ginna dakhatta.’
[19] Ínam Aadam a yimiyye, golossate, farsoti sabiib laka dame icho la mehe essaan ya, ‘'Damaanki toro meleefeenye 'doo'di kooddi goocho ichoow ki uskeel leh aal kabahsati kalla.’ I'daasenyi kharati Waakh runtiche wihi iche yeesso lakaarga.”
[20] 'Doo'di ilkerengeetohi us wihi weeli enenyet yeelin iubaa'dan buurche kayeele uskeelicho ma kasoonokhan. 'Deerka Yeesso icho uskeel kacheekan sookhabte.
[21] “Atinhi ilkerengeetti Choorasin taalliin sinati atin sugto eenna a buure! Atinhi ilkerengeetti Bessaayda taalliin sinati atin sugto eenna a buure! I'di tahe chirri wihi ittaawenye weeli enenyet yeelin iubaa'dane goytiin ka layeele goorat ilkerengeetti Tiiro ichoow ti Siidon ka layeele, 'doo'daas arraagane uskeelicho kasoonokhte, 'deerka inga'daa'diyyo gessate, bombey kadowte.
[22] I'daasenyi wihi an atin icheeko, ibeenki Waakh 'doo'd hukkumo, sinati Waakh 'doo'di ilkerengeetti Tiiro yiil ichoow 'doo'di ilkerengeetti Siidon yiil tuse iche deefta sinati Waakh atin tuso ka.
[23] Atinhi ilkerengeetti Kafarnaa'hum taalliin la kol serey atin liiokkhicho koogtahiin? Mele, meessi 'doo'di tuume kijiro iche ikhubattaan. Chirri wihi ittaawenye weeli enenyet yeelin iubaa'dane an goytiin ka yeele ilkerengeetohi Soodom lakayeele, ilkerengeettaas kootte uliba laka a jirta on.
[24] I'daasenyi wihi an atin icheeko, ibeenki Waakh 'doo'd hukkumo, sinati Waakh 'doo'di ilkerengeetti Soodom yiil tuse iche deefta sinati Waakh atin tuso ka.”
[25] Yeesso chirraakka weeste wihi us yidah, “Aabbahaaw, Kamuri serey ichoow harra ba iween, a kikoolicha. I'di tahe at wahanyeyyoha 'doo'di kharayyeenye toro la weyti soome a kadagisse, 'doo'di i'di nyaakhutenye wohoo igaran la tusse.
[26] Aa! Aabbahaaw wihi kaahamaadicho gon wahaase.”
[27] Yeesso toro wihi us 'doo'd iyidah, “Aabbaheey walah dakkhan dahantaaya soogesse. Aabbahaaya on menye et Weeliis garti mele. Toro la Weeliis ichoow 'doo'di Weeliis ibabbakkaahin 'doono on menye, et rumanka eti Aabbaheey yahe garti mele.
[28] Kaaleya ani iamiita, atinhi tuummane geeddi atin huleesi nool si'ddaan on kuranteen. An a atin naschaa.
[29] Kaaleya, hil ileesoogela, walah ikaabda. I'di tahe ani uureey ka a etoo samacchaarenye, toro isnuglaacho, ani la a atin naschaa.
[30] I'di tahe hili an atin korcho a 'dabakhe, huleeseey la a 'dabakh.”