[1] Yeesso toro ewweenki Ya'huud imammahte, wihi us iyidah,
[2] “Dakhi goobi Waakh iyookkoka, a i'di karnati inankiis min disti ulla oroosi buure ibahcho.
[3] Ilbooyyetiis ergate, 'doo'di tuummane oroos liiwahe, a lasoowaho, i'daasenyi icho tuumman emeet 'dii'deen.
[4] “Toro ilbooyyetiistoo addan ergate, wihi us iyidah, ‘Nyaama, 'doo'di mindischota liiwahe tuumman toro leeyyeeda, “Kaaleya golol a bissaate, heerasseey ichoow maaroheeyki rurruusan a khale, walah a lahaaggiche, kaaleya mindischo amiita,” idaha.’
[5] “I'daasenyi icho wahaas nabah ma isudine, ebba hiliissa on gele. Koo gosiis goya irte, koo la meessi us koororsati irte.
[6] Gaasoo laka ilbooyyeti lasooergate khabteene, jaheene, sina kawaaricheene, yigaaseen.
[7] Karnat weyti hollowe, iskartiis erge, iskare la 'doo'di kootte ilbooyyetiis yigis 'dabbaasse, toro ilkerengeetticho tuumman laka gubte.
[8] “Ulla 'deerka wihi us ilbooyyetiis iyidah, ‘Mindischo kola a titah, i'daasenyi 'doo'di goorat lawahe koo kalday laka ma imalin.
[9] Toollaka nyaama, ilkerengeet irda, 'doo'di atin 'hessaan tuumman mindischo isoowaha.’
[10] Ilbooyye 'deerka ilkerengeet goya itabte, 'doo'di icho argeen tuumman soowaheen. 'Doo'di hahhaaggan ichoow ki sussuuje ba wahte, minki daawti mindischo lakahaaggicho marti buuhisse.
[11] “I'daasenyi chirra karnat yamiite marti sooyeyo, etoo darfohi mindischo ikhabin arge.
[12] Karnat la, ‘Eta, at saggoh inta darfohi mindischo laan isoogesse?’ worsate. Ulla walah us ilaabe mele.
[13] “Karnat 'deerka wihi us ilbooyyetiis iyidah, ‘Dahano ichoow luhlo ba hida, mug'dihi kharaat iseya. Intaas ka la enenyet a ooya, toro la bolokh ka ilko iskaroba.’
[14] A mehe 'doo'di Waakh waho a ittaawe, i'daasenyi ki Waakh soobahsati a koo rucchul.”
[15] Yomboka Farissaayotoo iratte, tossatte, jiti iche Yeesso yeediis on ka angey igelisso yowatte.
[16] Abattitiche ichoow 'doo'd 'Herood koo Yeesso iergateen. Iche la wihi iche tidah, “Eti ween, nah saggi at rum ikanokhan a garanna. Jiti Waakhe at enenyet abisso ichoow runti Waakh a israahaan. At et at ibaasso mele, weyneetteey ichoow kuus ka ba.
[17] Bal nah isoocheek, malaah a mehe? Kaaysarhi weene kooddi liiguto a mujjum a bal mujjum mee?”
[18] I'daasenyi Yeesso malichoki suuje garte, wihi us iyidah, “Iskaayyeessooy! A i'doh ani angey igelin i'doontaan?
[19] Bal chilinkoo Rooma atin kooddi kaguttaan itusa.” Iche la chilinkoo Rooma ikeente.
[20] Yeesso la wihi us icho iyidah, “Foola ichoow magaha kachiiran a keyya?”
[21] Wihi icho ilaabeen, “A koo Kaaysar.” 'Deerka wihi us iyidah, “Kaaysar wihi wihiise iguta, Waakh la wihi wihiise iguta.”
[22] Chirri iche waha daagte ka, weyti girmeysatte, 'deerka usu katabte iratte.
[23] Maalinkaas goya 'doo'doo Sadukaayo 'doo'di tuume berri ma sookaho essi Yeesso iyimiy.
[24] Wihi icho yidaaheen, “Eti ween, amurre Muusa wihi iche inno abisso, chi' etoo nyaakhut laan yumuy, walaaliis muunkhotaas a disti, walaaliis nyaakhut a idelo.
[25] Reeroo teebeenye isleedesse goyteenyo kijire. Ki ween min diste, nyaakhut ma 'heline, buje. Nyaakhut us khabe mele gone, makhaabassiis walaaliis ikatabe.
[26] Ki lammaatteet ichoow ki seyyahnaatteet ichoowka ki teebanaatteet laka i'daas on eheet.
[27] 'Da'ddaboka makhaabale laka tumuy.
[28] 'Deerka maanti 'doo'di tuume lasookahcho, reeri teebee goyaka, etichokoh makhaabassiis tateeh, icho tuumman la a disteenee?”
[29] Yeesso wihi us ilaabe, “Atin jeenteti atin wihi Chiirnaanneti Waakh enenyet abisso ichoow miigti Waakh igaran u, jiti baabulenye kijirtaan.
[30] Maanti 'doo'di tuume omoot kasookaho, min ma distaane ommos mindischo ka ma ladiibo. Icho tuumman i'di herti Waakhe goobi Waakh kijirto yateehiin.
[31] I'daasenyi wori 'doo'di tuume omoot lakasookahcho miinsane Chiirnaanneti Waakh buuggiis goyaka atin liidowo, a soonteen menya?
[32] Waakh mehe yidah ya, ‘Ani a Waakh Aburaaham, a Waakh Isakh, a Waakh Yaakoobo.’ Usu Waakkhi 'doo'di tuume menye, i'daasenyi a Waakkhi 'doo'di jiro.”
[33] Urur la chirri us waha daage ka, saggi us walah mujjum 'doo'd iabcho weyti kagirmeeste.
[34] Farissaayo la chirri iche saggi Yeesso Sadukaayo yeedi us ilaabe ka itoolliche daagte ka, iswahte, aytoo iche Yeesso worsatti kamalatte.
[35] Kichekoo a tagaanki amurree, waha us worsati ka Yeesso kaje.
[36] “Eti ween, amurre Muusa goyaka, koh weyti ween?”
[37] Yeesso wihi us ilaabe, “ ‘Kamuri Waakkhaahe uuraah tuumman ka ichoow rubeytaah tuumman ka ichoow malaah tuumman ka 'doon.’
[38] Amuri oraate toro amurre tuumman kussan a kan.
[39] Ki lammaatteet la a i'diissa, ‘Ollokkaah geeddi at is'doonto 'doon.’
[40] Chiirnaanneti Amurre tuumman ichoow ti 'doo'di Waákh íyeyyeedo tuumman, amurreta lammacheeda kadisanyahiin.”
[41] Farissaayo isifiddiittaayi, Yeesso wihi us icho worsate,
[42] “Ki Lasubhe mehe ikhaattaan? A ínam eyya?” Iche la wihi iche ilaabte, “A hiiy Dawuud.”
[43] Wihi us icho iyidah, “'Deerka saggoh Dawuud Rubeyti Munyee ka yeyyeedaayi, usu ‘Kamur,’ ikawaha? A mehe us mehe essa ya,
[44] “‘Waakkhi Kamure wihi us Kamureey iyidah, “Dabankeeyki miigeete antoot orrommo, ichoowka chiiytaah tuum dahanohaah a soogesso.” ’
[45] Chirri Dawuud rubeytiis ba usú, ‘Kamur,’ kawaho, saggoh toro Ki Lasubhe hiiy Dawuud iyahe?”
[46] Eticho yeedoo kalday laka ilaabo mele, uus maalinkaas la et usu wohoo addan worsan iggo mele.