[1] Waha a magahenye aacchinye Yeesso Kiriistohi hiiy Dawuudhi karnate. Dawuud la a hiiy Aburaaham.
[2] Aburaaham Isakh dele, Isakh la Yaakoobo dele, Yaakoobo la Yuuda ichoow walaalinyetiis ba dele.
[3] Yuuda la Beeres ichoow Seerah dele. Abarticho la a Taamar. Beeres la 'Heesiron dele, 'Heesiron la Raam dele.
[4] Raam la Aminaadab dele, Aminaadab la Nahachoon dele, Nahachoon la Saalmon dele.
[5] Saalmon la Boowas dele. Abar Boowas la Raahab iche layadeeh. Boowas la Obeedhi abartiis Ruu'd eheet dele, Obeed la Yeesse dele.
[6] Yeesse la, Dawuudhi karnat eheet dele. Dawuud la Soolomon dele. Abar Soolomon makhaabál Uuriya eheet.
[7] Soolomon la Rehobowaam dele, Rehobowaam la Abiija dele, Abiija la Aassa dele.
[8] Aassa la Ye'hoochafaat dele, Ye'hoochafaat la Yooram dele, Yooram la Uusiya dele.
[9] Uusiya la Yoo'dam dele, Yoo'dam la Aahas dele, Aahas la Heessekiya dele.
[10] Heessekiya la Manaasseh dele, Manaasseh la Aamon dele, Aamon la Yossaaya dele.
[11] Yossaaya la Yekooniya ichoow walaalinyetiis dele. Waha la a maanti yaafohi Issiraayel gaasoo ili Baabiloon liibooliye.
[12] Inkoo yaafohi Issiraayel gaasoo ili Baabiloon liibooliye Yekooniya Cheeltiyeel dele, Cheeltiyeel la Serubabeel dele.
[13] Serubabeel la Abiwuud dele, Abiwuud la Eliyakiim dele, Eliyakiim la Aassor dele,
[14] Aassor la Saadok dele, Saadok la Akiim dele, Akiim la Eliyuud dele,
[15] Eliyuud la Eliyaasar dele, Eliyaasar la Maa'dan dele, Maa'dan la Yaakoobo dele,
[16] Yaakoobo la Yuussuf dele, Yuussuf la a makhaábal Maariyati Yeessohi Ki Lasubhe layadeeh desse.
[17] 'Deerka kholo tomon ichoow affare Aburaaham ichoow Dawuud dahche kijirte. Dawuud ichoow maanti yaafohi Issiraayel Baabiloon ka labooliye la, kholo tomon ichoow affare dahcho kajirte. Maanti yaafohi Issiraayel Baabiloon ka labooliye ichoowka maanti Ki Lasubhe desse laka, kholo tomon ichoow affare dahcho kajirte.
[18] Delmaat Yeesso Kiriisto i'dane eheet. Abartiisti magahiche Maariya layadeeh, etoo Yuussuf layadeehe alkume. I'daasenyi geeddi icho isidisan on saggi iche miigti Rubeyti Munyee ka uur itahe laarge.
[19] Jeenteti Yuussufhi Maariya soodisti etoo fissan ieheet u, usuhi Maariya 'doo'd ortiis ka lakhaanyo kadowo ma 'doono, Maariya dagsi ka katabin gooche.
[20] I'daasenyi inkoo us ayta kamasse, hertoo Kamur issillo goyaka isoobahte wihi iche itidah, “Yuussuf, ínam Dawuud, Maariya disan akaroorin. I'di tahe iche miigti Rubeyti Munyeenye kuurowte.
[21] Iche la inankoo dessa, magahi at ibihisso la a Yeesso. A mehe us 'doo'diissa uskeelicho karibaa.”
[22] Waha dakkhan a yitaaheene, 'dee wihi Kamur eti Waákh íyeyyeedo ka yidah labuuhicha,
[23] “Inanti mejel igaran a uurowta, inankoo dessa. Magahiis la Emmaanuwel iche layadeeh.” I'da ka mehe leessa ya, “Waakh a inno leejira.”
[24] Yuussuf inkoo us sooneybaate ka, amuri kootte herti Kamure keleye ibihisse raahe, Maariya diste.
[25] I'daasenyi Yuussuf Maariya ma leeur'dine ichoowka inankoo desse. Ulla magah ibahche, Yeesso yidah.