[1] Yeesso abattitiisti tomon ichoow lammee isiwahe, antohi icho ginnayyo enenyet goya kabahchaan ichoow ti icho sugeerre ichoow khannaatteti fil ittaawe tuumman kasamaachaan siiche.
[2] Ergaanoti tomon ichoow lammee magahenyeticho talla, ki oraat a Siimonhi Beetero layadeeh ichoow walaaliiski Andereeya layadeeh, Yaakoobohi inam Sebedaayee ichoow walaaliiski Yoohana layadeeh,
[3] Fiilif, Bar'dolomaayo, Toomas, Mattaayohi kooddi goocho, inam Alfaayo ki Yaakoobo layadeeh, 'Da'daayo,
[4] Siimonhi magahiis Yaaftiis'doone layadeeh ichoow Yuuda Iskaariyoot, ki yomboka Yeessó 'dub gooche.
[5] Yeesso reera tomon ichoow lammee ili kharaat ierge, wihi us leefarme la a mehe ya, “Ili 'doo'di yaafohi Ya'huud ieheynan iiranna ommos ilkerengeettoo kaldaye Saamariya laka agelina.
[6] Nyaama 'doo'di Issiraayele i'di iiyti baabaatee iirda.
[7] Geedda atin 'dussaan la wora cheeka, wihi atin tadeehiin la, ‘Dakhi goobi Waakh kola a soodowwaate.’
[8] 'Doo'di khakkhannan samaacha, ki tuume omoot kasookahcha, ki bu'da sar kakhabo samaacha, ki ginnayyo dakhtaan la, ginnayyo kabahcha. An miigta i'daanu atin siiche, taba waha yeela 'doo'd la walah akagutanna.
[9] Wihi chilimenye 'dahabe ommos lahaageete ommos birtoo addane akhaatanna,
[10] ommos urgo akhaatanna. Ubbaari deere atin sar kakhabtaan on menye, koo addan akhaatanna. Kobohoo addan akhaatanna. Wul laka akhaatanna. A mehe eti hil haaggicho golol a wihi usu mu'dan.
[11] “Ilkerengeetbaaw atin geesseen ommos goobbaaw atin gesseen ka, etoo lakakhuufo yowda, minkiissa on fiddiya ichoowka intaas kabaha.
[12] Chirra atin min gessaan, ‘Waakh ba nebey atin kakaala,’ idaha.
[13] Minki atin gesseene atin martiiste, weysihaas ikataba, minki atin imartiisan la, Waakh nebey ma kakaalo.
[14] Chirri etoo atin imartiisanne, ommos yeediin idagansan, cha'atin goobaas ommos ilkerengeettaas kabahtaan, ebeeri luhlo atin fuulo sahda, saggi Waakh icho ihukkumo tusa.
[15] Rume atin icheeka, ibeenki Waakh 'doo'd hukkumo, sinati Waakh 'doo'di ilkerengeetti Soodom yiil ichoow ki ilkerengeetti Goomorah yiil tuse iche deefta sinati Waakh ilkerengeettaas tuso ka.
[16] “An i'di iiyti yaay goya liifahe iche atin ierga. Maantaka i'di toof u yuubsada, toro la i'di kutukuurrug u i'di 'doo'di eloo rucchul laka ikhabin ateeha.
[17] 'Doo'da yuubsada, jaldaabohi Ya'huude atin igeechaane, minassichoki weysiit ka atin jahaan.
[18] Jeenteteey u gaafanayyo ichoow karnato atin liigeecha, atin la garti Wori Haaggan icho ichoow yaafohi Ya'huud ieheynan itateehiin.
[19] I'daasenyi chirri icho atin khabteen, wihi atin tadeehiin ommos saggi atin itadeehiin akawa'dwaa'dina. Chirraas wihi atin tadeehiin a atin lasiicha.
[20] A mehe atin mee yeyyeeddaan, i'daasenyi Rubeyti Waakkhi Aabbahiinenye goytiin kasooyyeedda.
[21] “Etoo walaaliissa 'dub goocha, dahanohi nahab gessa 'dee layagiis. Ooyo laka weeliis i'daas yeela. Nyaakhut 'doo'di dele yeedicho 'dii'da, dahanohi 'doo'doo addan gessaane 'dee layagiis.
[22] Enenyet tuumman a atin 'dii'da jeenteti atin abattiteey itahiin u. I'daasenyi, eti garrahsate ichoowka sinata 'dubiche eleele a lariba.
[23] Chirri ilkerengeettoo ka sina atin loomhicho, ilkerengeettoo addan ifirda. Rume atin icheeka, geeddi atin hiliin ilkerengeetohi ili Issiraayel tuumman ka imassin, iche Ínam Aadam soonokhta.”
[24] Yeesso wihi us yidah, “Iyookkoka, abatti etiiski walah abcho ma kaweene, ilbooy la kamuriis ma kaween.
[25] Abatti etiiski walah abcho ibaha, ilbooy la kamuriissa ibaha. Chirri ooyohi min leh ba, Beelsebuul lakawaho, 'doo'di minkiis la geeddoo meheenye magahenyeti 'da'ddaran kawahaan?
[26] “'Deerka 'doo'di atin tirrimo akaroorina. Walah oboobsane liisoonyiikhin mala, ommos walah dagsane enenyet liiabin mala.
[27] Wihi an mug'di ka atin iadeeh, maalim cheeka, wihi nabah ka atin liicheeke atin daagteen minan sarcho ka cheeka.
[28] 'Doo'di sar on yagiise i'daasenyi rubey i'doo iidaahan akaroorina. Waakkhi sar ichoow rubey ba baabiicho, meessi 'dabi armaanjireen kalug'do karoora.
[29] Chimbir lamma chilimmetoo rucchul ma lagato? I'daasenyi chimbirtoo kaldaye Aabbahaah igaranne tamuut ma jirto.
[30] At laka, tinti matah kaajirto tuumman Waakh geeddi iche tahe a garta.
[31] 'Deerka roorro akhabina, atin Waakh ortiis ka chimbirohi ittaawe a kakhummantahiinee.
[32] “Eti tuummane 'doo'd ortiis ka saggi us keey iyahe cheeko, ani laka usu Aabbaheeyki goobi Waakh kijiro ortiis ka saggi us keey iyahe a cheeka.
[33] I'daasenyi eti tuummane enenyet ortiis ka saggi us keey iyahe 'dii'do, an laka usu Aabbaheeyki goobi Waakh kijiro ortiis ka a 'dii'da.
[34] “Kol an harra imiyye an nebey keene akoogeynana. An nebey ma keenine, i'daasenyi seleyhi an birlab ka atin fido iimiy.
[35] A mehe an a imiyye, “ínam ichoow ooyo ba isichiiyoocha, inám ichoow abarche ba isichiiyoocha, inám ichoow seyyohtiche ba isichiiyoocha.
[36] Toro la eti uuraahe on chiiy kiyateeh.
[37] “Eti tuummane ooyohiis ichoow abartiis 'diriheey 'doono, abattiteey ma imaline, toro la eti tuummane yeeletiis ommos albehiis 'diriheey 'doono, abattiteey ma imalin.
[38] Eti tuummane massalaabatiis ikhaatine sina iumhane ani isooraahin, abattiteey ma imalin.
[39] Eti tuummane jirotiis khuccho jiroti rummaat a waaya. Eti tuummane harrata ka jirotiis ani iwaayo la, jiroti rummaat a 'hela.
[40] “Eti tuummane atin khaatti, ani ikhaatta. Eti ani ikhaatti la, Waakkhi ani isooerge iche khaatta.
[41] Eti tuummane eti Waákh íyeyyeedo jeenteeti us eti Waákh íyeyyeedo iyahuu martiiste, Waakh kala'ddi us eti Waákh íyeyyeedo guto, iche etaas addan laka guta. Toro la, eti etoo fissan jeenteti us ifissanyahuu martiiste, Waakh kala'ddi us etaas fissan guto, iche etaas addan laka guta.
[42] Chi' etoo kooboo biccheete khobee laka 'doo'daar kichokoo siiche jeenteti us abattiteey iyahuu, rume atin icheeka, etaas koloo kalday laka kala'ddiis ma waayo.”