[1] Waha a uumacchoti Wori Haaggane, Yeesso Kiriistohi Weeli Waakhe miinsan.
[2] Wihi Isaayahi Waákh íyeyyeedo chiire kallaayo, “Yeya, ergattiteey ortaahha erga iche rubeyohi enenyete tannabissa.
[3] Ergattita la hidaade karirriirta, ‘Kamur jit imujjummoocha, jiti us leeyamiit ficcha,’ iche elatta.”
[4] 'Deerka Yoohanahi Enenyet Baattissiyo hidaad yimiyye wori baattissiyo cheeke. Us enenyete baattissiye uskeelicho kasoonokhtaane, 'dee Waakh uskeelicho ikakuta.
[5] Enenyet boroofenhi Ya'huudiya tuumman ichoow ilkerengeetti weene Yeerusaleem tuumman ka soobahe, Yoohana iyimiy. Eti tuummane uskeeliis Waakh icheekte la, Yoohana hawti Yoordane 'dusso ka baattissiye.
[6] Yoohana gaaddi us khabe tinti gaale lakahaaggiche. Saabi us dabar kakhabe la niibe lakahaaggiche. Gololi us yuhum la a gubaal ichoow malab.
[7] Wori us orey on cheeke a kan, “Etoo ani weyti ikaween 'dubeey ka a yamiit. An walah an ahe mele, gulguubsanaanki an gulguubsadi an falfihi kobtiis laka jalkhicho ma mu'dan.
[8] Ani toolla bicche atin kabaattissiya, i'daasenyi us berri Rubeyti Munyee ka a atin baattissiya.”
[9] Saahka Yeesso ilkerengeetti Naasaret layadeehe, boroofenhi Gaalilaaya kijirto kayimiyye, Yoohana la hawti Yoordane 'dusso ka usu baattissiye.
[10] Chirra Yeesso bicche goya kasoobaho, sereyti kharradde Rubeyti Munyee la i'di kutukuurrug u isooyagto arge.
[12] Chirraas on Rubeyti Munyee Yeesso hidaad ieregte.
[13] Ibeen tomon affar Yeesso hidaaddaas on kijire, Seytaan la kajmeti uskeel kalugu'ddo ikeene. Hidaaddaas ka binahi yibaat on leejire, herti Waakh la Yeesso ihisse.
[14] Inkoo Yoohana jeela lagesse ka, Yeesso boroofenhi Gaalilaaya irte. Intaas ka, Wori Haaggane Waakh kayimiy on cheeka.
[15] Wihi us yidah, “Il kola a yitah! Dakhi Waakh kola a soodowwaate! Uskeeliin kasoonokhda, Wora Haaggane ani atin idowo rummeesda!”
[16] Yeesso Beyti Buurenye Gaalilaaya afiche kasohtaayi, eti Siimon layadeeh ichoow walaaliiski Andereeya layadeeh, arge. Oroohti bahag lakakhabti, iche bey goya isaate, a mehe iche hiliche a ki bahag lakhabti.
[17] Yeesso la wihi us iyidah, “Kaaleya, isooraaha abattiteey ateeha, hiloo husube enenyet Waakh liikeeno a atin korcho.”
[18] Chirraas on oroohti kootte iche bahag kakhabatti 'diisse, Yeesso raahte.
[19] Yeesso i'daaru marah on orey isohte, Yaakoobohi inam Sebedaayee ichoow walaaliiski Yoohana layadeeh ichehi kooban goya fiddiito, oroohti bahag lakakhabti haagsatti arge.
[20] Chirraas on lammache wahe, iche la aabbahiche ichoow 'doo'di lakireeste kooban goya katabte Yeesso raahte.
[21] Yeesso ichoow abattitiis ilkerengeetti Kafarnaa'hum irteen. Saahka Seeri Lanaso ka, Yeesso minki weysiite Ya'huud gele, enenyet wori Waakh abin sookhabte.
[22] Enenyet tuummamba saggi usu 'doo'd walah iabcho, kagirmeeste, a mehe i'di tagaammeti amurre menye, i'di etoo anto khabo, iche 'doo'd walah iabche.
[23] Chirraas on etoo ginnatoo dakhatti minkichoki weysiit kijire riire,
[24] “Wooy! Yeessohi Naasaret, ati mehe nah ka'doonta?” yidah. “Nahe nah massin timiy? Ani alah eti at tahe a garda, at a Ki Munyeenye Waakh kayimiy!”
[25] Yeesso ginna leejaakhe, “Gammadiche, etaas goya kasoobah!” iyidah.
[26] Ginnataas chirraakka etaas kafadisse, riirte, et kasoobahte.
[27] Enenyet tuumman girmeeste. “Waha i'dee a mehe?” isworsate. “A yeedi husube, toro anto khabo! Ginnayyo laka amur on ibahcha, icho la yeediis raahaan.”
[28] Wori usu miinsan dowwa on boroofenhi Gaalilaaya tuumman kataa'he.
[29] Uun icho minki weysiit kabaheen, Yaakoobo ichoow Yoohana khabaayi, irteene ichoowka min is Andereeya ichoow Siimon geleen.
[30] Seyyoh Siimon la sare kululaatta, siriire kajiifta. Chirraas on Yeesso saggi araarri ikhannanyahe liicheeke.
[31] Ulla irte, dahan sookhabte, sootoolliche. Lakabukkhe iche la icho goollin sookhabatte.
[32] Gelebtaas, inkoo orrahe dihte ka, enenyet 'doo'di khakkhannan ichoow ki ginna dakhatti tuumman ba Yeesso ikeene.
[33] Ilkerengeet tuumman soobahte, min afiis buuhisse.
[34] Yeesso la 'doo'di ittaawenye sugeerreti yeerare khabo samaache. 'Doo'di ittaawenye ginnayyo dakhtaan laka, ginnayyo kabahche. I'daasenyi ginnayyo amuri icho kasooyeedaan tirte, a mehe eti usu yahe a garteenee.
[35] Yeesso baryoti booran ka kahe, min kabahe, inti enenyet ikijirin irte, weeste.
[36] Siimon ichoow wahalhiis ba irteene, usu yowteen.
[37] Chirri icho 'heleen ka, wihi icho iyidaaheen, “Enenyet tuumman ati kiyowta.”
[38] Yeesso wihi us ilaabe, “Kaaleya, intoo addan a iranni, i'di maanta ilkerengeetohi soodow a iranni, 'dee Yeedi Waakh a cheeko. An alah wahaase iimiy.”
[39] 'Deerka boroofenhi Gaalilaaya tuumman goya kasohte, Yeedi Waakh minassichoki weysiite Ya'huud ka cheeke, 'doo'di ginnayyo dakhtaan la ginnayyo kabahche.
[40] Saahka etoo bu'datoo uskul sar kasoofoofte Yeesso iyimiy. Ortiis ka jilbo il kagu'dde, hawwaaste, wihi us yidah, “Chirri at 'doonto, at bi'dir ibihin a tabuu'd.”
[41] Yeesso etaas weyti uur isoonugleeste, dahan ooge et 'daare, wihi us iyidah, “A 'doona, bi'dir bah!”
[42] Chirraas on bu'dati kootte etaas sar kasoofoofte baabaate, et samaate.
[43] Yeesso chirraas on et erge, weyti tootooche wihi us iyidah,
[44] “Etoo kalday laka jit ka aleeyeedine, i'daasenyi kuhaani iiro saggi at isamaatte istus. Sadakhati amurre Muusa kachiirane eti bu'da lakabahche bahcho bihiche, 'dee garti saggi lakisamaache a titaahe.”
[45] I'daasenyi etaas irte, enenyet tuumman yeedaas icheeke, woraas taa'hiche. Yeesso saahka jeentetaas u chi' laargo ilkerengeet gelin ma yabuu'd, i'daasenyi hidaad on fiddiya. Eheetteey laka, enenyet Yeesso ma 'diicho, 'dollo tuumman ka a iyamiit on.