[1] Yeesso inkoo us ururi buure arge ka, irte burroo kore, orronte. Abattitiis la isookhayte.
[2] Yeesso 'doo'd walah abinnaan sookhabte.
[3] “'Doo'di Waakh imaalo a ki wahanyeyyohi Waakh ka miskiine, a mehe dakhi goobi Waakh a kichooda.
[4] 'Doo'di Waakh imaalo, a ki toolla uskeeli weeli enenyet bolkhicho, Waakh icho uur a khoboochaa.
[5] 'Doo'di Waakh imaalo, a ki samacchaare, Waakh harrati husub icho a siichaa!
[6] 'Doo'di Waakh imaalo, a ki fissanoon iankayo toro isubgaati, Waakh icho a dargichaa.
[7] 'Doo'di Waakh imaalo, a ki uur nugul, Waakh icho uur a inugleestaa.
[8] 'Doo'di Waakh imaalo, a ki uurassicho ka eloo rucchul laka ikhabin, icho Waakh a argaanee.
[9] 'Doo'di Waakh imaalo, a ki enenyet isineybicho, a mehe nyaakhuti Waakhe layadeeh.
[10] 'Doo'di Waakh imaalo, a ki jeenteti icho ifissanyahiin u sina loomhicho, dakhi goobi Waakh a kichoodaa.
[11] “Waakh a atin imaala maanti enenyet jeenteteey u atin abaaro, sina atin omhicho, been ka suujoonki nool atin kacheekti.
[12] Gir'daama weyti hamaada gi'de. Waakh goobiis ka kala'ddi buurenye atin gutaa. A mehe 'doo'di Waákh íyeyyeedo goorat saggaas on sina liiomhiche.
[13] “Atin a magaa'ddi weeli enenyet tuumman. I'daasenyi magaa'de chi'iche gimbatiche waayte, saggoh toro liigimbaacha? Kola walah iche iroontahe mele, khubnaanki lakhubo enenyet yabti on menye.
[14] “Atin i'di banay u, enenyeti harratane jiti Waakh tussaan, ilkerengeetti hal sartiis kadisan la ma ladabo.
[15] Toro la et taa bolkhicho baakhuul kaankubo mele. Taa a labolkhicha kombor lakorcha, 'dee eti tuummane min goya kajiro il kaarga.
[16] Taba gi'de atin laka i'daasu, haaggi atin yeessaan weeli enenyet tuumman a argo, 'dee enenyet tuumman Aabbahiinki serey jiro a inkaanyito.
[17] “Kol an harra imiyye 'dee Amurre ommos wihi 'doo'di Waákh íyeyyeedo enenyet abcho baabiicho akoogeynana. An baabiin ma imaatane, i'daasenyi a imiyye wihi icho enenyet abchaan buuhicha.
[18] Rume atin icheeka, chirri sereyta daayan ichoow harra massataan laka, aytoo rucchul laka amurre Muusa goya ma lakabahcho, ichoowka wihi lachiire tuumman labuuhicha.
[19] Eti tuummane amuri amurreti Waakh goyaka rucchul laka jebche, toro la 'doo'di addan laka i'daas yeela iyadeeh, dakhi goobi Waakh ka walah us yahe mele. I'daasenyi eti tuummane amurretaas raahe, 'doo'di addan i'di iche ichiirantahe abche la, dakhi goobi Waakh ka a weenyahe.
[20] A mehe wihi an atin iadeeh, sammata fissanoonkiin ki tagaammeti amurre ichoow Farissaayo ikutin rumanka dakhi goobi Waakh ma gessaan.
[21] “Saggi goorat Waakh aacchinyeteen, ‘Weeli enenyet dubunuunu iigaasan, eti tuummane enenyet yigis la a lahukkuma,’ iyidah a daagteen.
[22] I'daasenyi wihi an atin iadeeh, eti tuummane etoo keeye ihollowe, a lahukkuma. Toro la eti tuummane etoo keeye abaare Jaldaabti Weene Ya'huude liikeena, hukkunta. I'daasenyi eti tuummane etoo addan, ‘'Dalanki marah,’ iyidah, a geeddi meessi 'dabi armaanjireen lakalug'do.
[23] “Maantaka chirri at soorriyotaah chalagti Waakh soorriyo liikabahcho keente, at intaas ka saggi etoo keeye wohoo ikaakhabo kasoo'hesse,
[24] soorriyotaas chalag orche katab. Koloo iro, eteeykaas isineyba, 'dee amiite soorriyotaah Waakh ibihi.
[25] “Chirri etoo kootiin kigeecho wohoo kaacheekti, etaas dowwa isineyba. Geeddi atin kootiin isohattaan isineyba. Chirri at i'daas iyeelin, etaas eti 'doo'd hukkumo kicheekta, eti 'doo'd hukkumo la dahanti iskareet kigessa, iche la jeela kigelissa.
[26] Rume atin icheeka, jeelataas goya ma kasoobahto ichoowka mogtiis tuumman hiyyaayta.
[27] “Saggi Waakh Chiirnaanne ka, ‘Makhaabassi taah ieheynan aleeur'din,’ iyidah a daagteen.
[28] I'daasenyi wihi an atin iadeeh, eti tuummane makhaabassi tiis ieheynan yeye, maanjeerte uuriis ka uskeeli us makhaabassi tiis ieheynan leeur'do iche gele.
[29] Maantaka chirri issaahti miigeet uskeel kaalugu'ddo, issaas bihiche, rog! Atihi sartaah tuumman khabtaayi meessi 'dabi armaanjireen lakaalug'do ka, atihi miilaahkoo waayto deefta.
[30] Chi' dahantaahti miigeet uskeel kaalugu'ddo la, dahantaas gooche, rog! Atihi sartaah tuumman khabtaayi meessi 'dabi armaanjireen lakaalug'do ka, atihi miilaahkoo waayto deefta.
[31] “Chiirnaanneti Waakh wihi kachiiran, ‘Chi' etoo arantiis tuum riho, khadaabi saggi us iriho tuso a siicho.’
[32] I'daasenyi wihi an atin iadeeh, eti tuummane makhaabassiis tuum rihe chi'iche mejeloo addan leeu'durte on menye, makhaabalaas makhaabassaas uskeeli iche mejeloo kiche ieheynan leeu'durto iche kalug'da. Eti makhaabassi tuum larihe disti la, uskeeli us makhaabassi tiis ieheynan leeur'do iche gela.
[33] “Amuroo addane aacchinyeteen liicheeke a daagteene, wihi us yidah, ‘Wihi at ayyisse yeele, wihi at Kamur idaatatte la yeel.’
[34] I'daasenyi wihi an atin iadeeh, adaatanna ba. Goobi Waakh akadaatanna, i'di tahe goobi Waakh a komborti buurenye antoote Waakh.
[35] Ommos harra laka akadaatanna, i'di tahe harra a komborti rucchule Waakh luhlohiis korcho ommos ilkerengeetti weene Yeerusaleem laka akadaatanna, i'di tahe a ilkerengeetti Waakkhi karnatenye weene.
[36] Matakkaah laka akadaatan, i'di tahe at tintaahtoo kalday laka ma dakhnaasso ommolla ma daayisso.
[37] Chirri at, ‘Aa,’ tidah, i'daas on a eheetti. Chirri at, ‘Mele,’ tidah la, i'daas on a eheetti. Wihi addane at kakhayto, ki uskeel lehe kayamiitiin.
[38] “Amuri, ‘Eti il kibahche at laka il bihi. Eti ilah kibahche la at laka ilah bihi,’ yidah a daagteen.
[39] I'daasenyi wihi an atin iadeeh, eti suuje aleetirrimin. Chirri etoo fodoori miigeet kigu'dde, fodoori addan laka siiche a kigu'ddo.
[40] Chirri etoo kootiin kigeen 'doono 'dee us ubbaaraahki deer kaakhaato, kabuu'daah laka iduumi.
[41] Chirri etoo iskareet meehiis kihosse, ‘Kiilomittatoo kalday si'd,’ kiyidah, at la kiilomittatoo kalday menye, kiilomitta lamma isi'd.
[42] Eti walah kidaahe siiche, toro la eti wohoo amah ka kidaahe, wihi us kidaahe atiran.
[43] “Saggi goorat 'hor amur, ‘Ollokkaah 'doone, chiiytaah la 'dii'd,’ iyidah a daagteen.
[44] I'daasenyi wihi an atin iadeeh, chiiytiin 'doona, 'doo'di sina atin omhicho la iweesda.
[45] I'daakka nyaakhuti Aabbahiinki serey jiro tateehiin. Us 'doo'di sussuuje ichoow ki hahhaaggan ba orrah a isookorcha, 'doo'di fiffissan ichoow ki khokkhollokkhan ba hir siicha.
[46] Chirri atin 'doo'di atin 'doono kalday on 'doontaan, kala'd atin sugtaan mele. A mehe 'doo'di kooddi goocho laka i'daas on yeela.
[47] Chirri atin 'doo'diinna on bariitissaan la walah addane atin 'doo'di addan 'dirihiis yeesseen mele. 'Doo'di Waakh igaran laka i'daas a yeela on.
[48] Maantaka saggi Aabbahaahki serey jiro 'doo'diis tuum isikasoobahchuu, at laka tuum issoobihiche, 'dee wihi Waakh kaa'doono yeel.”