[1] Yeesso toro wihi us yidah, “Maanti Inam Aadam soonokhti, dakhi goobi Waakh a i'di albehoo tomonenye taassicho khaatte, eti min disti or kadowo.
[2] Albeha chane a 'dalame, chane la a khara.
[3] Chanti 'dalammee taassicho a khaatteene, i'daasenyi subakki geeyi oolife taa lakachibo ma si'dan.
[4] I'daasenyi chanti kharayyee, khulaammeti subakki geeyi oolif kijiro ichoow taassicho si'datte.
[5] Eti min disti soomalmale, albe tuumman yuufe, ur'dumme khaatte.
[6] “Naanokhoka, etoo riire wihi us yidah, ‘Eti min disti kallaaye, kaha or a kadowno.’
[7] “Albe 'deerka kahe, tooba taahiche sookorisse.
[8] Chanti 'dalame, wihi icho chanti kharayyee iyidaaheen, ‘Taasseenyo a jitaane, subakkiinkoo geeyi oolif nah siicha.’
[9] “Icho la wihi icho ilaabeen, ‘Mele! Subah ma inno yaakho, nyaama 'doo'di subah ororicho iirda, subah kasoogadda.’
[10] “I'daasenyi chirra icho irteene subah soogattaan, eti min disti yimiyye, albehi kharayyeenye kootte subakkoo yeere soositte la min leegele, daawti mindischo leegele. Afaf la lasoohide.
[11] “Yomboka albehi addan laka yimiyye, ‘Kamuroow! Nah fura,’ yidaaheen.
[12] “I'daasenyi wihi us ilaabe, ‘Rume atin icheeka, an ma atin gardi.’
[13] “Maantaka toorribda, a mehe maan ichoow saha'd ma garattaanee.
[14] “Toro dakhi Waakh a i'di etoo sulhaal irti. Bow'dayyohiis wahe, kooba wihiiskoo dahan gesse.
[15] Koo ugar chan chilimme buuhto siiche, koo la ugar lamma chilimme buuhto siiche, koo la ugartoo kaldaye chilimme buuhto siiche. Ugare ba la chilim alif chan 'dahabe khabta. Ebba la geeddi us yabuu'de dahan gesse, 'deerka sulhaassiis irte.
[16] Ki ugar chan chilimme dahan lagesse, chilimmetaas khaate hil kahaagsate, ugar chan addan ka'hele.
[17] Ki ugar lamma chilimme khabe laka lamma addan ka'hele.
[18] I'daasenyi ki ugartoo kalday 'hele, a khaate one, lum khute, chilimmeti kamuriis dahan gesse kalug'de dagche.
[19] “Inkoo geeddi deer labarye ka, kamuri ilbooyyetaas soonokhte, ebba wihi us chilimmetaas kahaagsate worsate.
[20] Ki ugar chan chilimme 'hele, wihi addane chane sookhaate, wihi us yidah, ‘Kamur, at ugar chan chilimme dahan isoogelisse. Yey, chan addane 'hele.’
[21] “Kamuriis wihi us ilaabe, ‘At weyti haaggisse! At rumanka a ilbooyi haaggane toro lakakhuufo! At wihi rucchule dahan lakisoogesse ka laka a lakaakhuufa gone, wihi ittaawenye kiweynaacha. Kaale kamuraah hamaadiis leegisam!’
[22] “Ki ugar lamma chilimme khabe laka yimiyye, wihi us yidah, ‘Kamur at ugar lamma chilimme dahanteey soogelisse. Yey, lamma addane 'hele.’
[23] “Kamuriis wihi us ilaabe, ‘At weyti haaggisse! At rumanka a ilbooyi haaggane toro lakakhuufo! At wihi rucchule dahan lakisoogesse ka laka a lakaakhuufa gone, wihi ittaawenye kiweynaacha. Kaale kamuraah hamaadiis leegisam.’
[24] “Yomboka ki ugartoo kaldaye chilimme khabe yimiyye, wihi us yidah, ‘Kamur, an saggi at bacchaara ka uur idaayantahe a garda. Inti at ilmo il ikagelinne gurnaan kayowatta, inti at ilmo il ikataa'hin la golol kayowatta.
[25] Jeenteti an ikaarooruu, ugarti kaldaye chilimme at dahanteey soogelisse, a khaate harra goya kadagche. Yey, wihi wahaahe kallaayo.’
[26] “Kamuriis wihi us ilaabe, ‘At a ilbooyi suujenye toro sey'ho leh. At saggi an wihi weheey ieheynan ikhaato, toro la gosi an ikhutin ka gurnaan iyowdi a garatta menya?
[27] Incheenka kootte chilimmeteey baangi gelissa, 'dee cha'an soonokhde ka chilimmeteey ichoow wihi iche desse 'hela.
[28] “ ‘Ugartaas kaldaye chilimme ilbooyaas kakhaata, ilbooyi ugar tomon chilimme khabo siicha.
[29] A mehe eti wihi dahan lagesse mujjum woywoye a liikakhaya ichoowka wihi us khabo buuraataan. I'daasenyi eti wihi dahan lagesse mujjum iwoywoyin, wihi us khabo laka a lakakhaata.
[30] Maantaka ilbooya marahe indigir laa mug'dihi ginnayyo yaalliin iseya. Intaas ka enenyet a ooya, toro la bolokh ka ilko iskaroba.’
[31] “Maanti Ínam Aadam herti Waakh khabaayi miigtiis leesoonokhti, kombortiisti antoote karnatoote koorronta.
[32] Ulla 'doo'di harra tuumman ortiis ka a kulmicha enenyet seley saaha saggi ersim iiy ichoow riiyyo seley isaahuu.
[33] 'Doo'di fiffissan ankiiski miigeete gessa, ki addan la ankiiski gurro gessa.
[34] “Karnat 'deerka wihi us 'doo'di ankiiski miigeet toollo iyadeeh, ‘Kaaleya, atinhi Aabbaheey atin imaale, goobi Waakhe atin liiabbire, uus harra lasoouume atin mu'dantahiin gela.
[35] I'di tahe an ankaa a khabe atin la igoollisseen. Sugub a khabe, atin la sugub ibihisseen. An i'di eti yeelane eheete atin la a imartiisatteen.
[36] Murukhe eheete, atin la gaad ikoorisseen. A khannaneete, atin la mujjum iwoywoyteen, jeela a kijire atin la a isooyeyteen.’
[37] “'Deerka 'doo'di fiffissan wihi us soolaabo, ‘Kamur, maantoh atihi ankaa khabto kiagarre kigoollinne, ommos maantoh atihi sugub khabto kiagarre sugub kibihinne?
[38] Maantoh atihi i'di eti yeelane kiagarre, kimartisanne? Ommos maantoh atihi murukhe kiagarre gaad kikorinne?
[39] Toro la maantoh atihi khannan kiagarre kisooyeyne? Ommos maantoh atihi jeela kijirto kiagarre kisooyeyne?’
[40] “Karnat la wihi us ilaabo, ‘Rume atin icheeka, wihi atin 'doo'da irummeeste wohoo liikoogeynan iyeesseen, a i'doo atin ani iyeesseen.’
[41] “'Deerka wihi us 'doo'di ankiiski gurro kijiro iyadeeh, ‘Nyaama ikataba, atinha falan, 'dabaas armaanjireene Waakh Seytaan ichoow herti Seytaan ba iyeele kachimmama.
[42] I'di tahe an ankaa a khabe atin la ma igoollin, sugub a khabe atin la sugub ma ibahin.
[43] An i'di eti yeelane eheete, atin la ma imartiisan, murukh a eheete atin la gaad ma ikorin, a khannaneete jeela kijire, atin la ma isooyeyin.’
[44] “Icho la wihi icho ilaabaan, ‘Kamur maantoh atihi ankaa khabto ommos sugub khabto ommos i'di eti yeelane eheete ommos murukh eheete ommos khannaneete jeela kijirte kiagarre, kigargaariwwaayne?’
[45] “Ulla 'deerka wihi us ilaabo, ‘Rume atin icheeka, chirri atin 'doo'deeykaar wohoo liikoogeynan gargaariwwaayteen, a i'doo atin ani igargaariwwaayteen.’
[46] “'Deerka 'dabi armaanjireene goya irtaane, i'daasenyi ki fiffissan jiroti jirtuu imassanne 'hela.”