[1] Maantoo Seeri Lanaso ka, Yeesso abattitiis khabaayi, gosase goya raaha. Abattitiis la a ankaaate, ilmohoo 'dargaayye guratte, tuhum.
[2] Farissaayo uus iche waha agarte ka, wihi iche Yeesso itidah, “Yey! Wihi abattitaah Seeri Lanaso ka yeesso ichoow amurre ma israahaan!”
[3] Yeesso wihi us ilaabe, “Atin wihi Dawuud yeele maanti usu ichoow 'doo'di us khabe ba raarahteen Yeedi Waakh ka ma soomin a?
[4] Dawuud uranti minki Waakhe gele, usu ichoow 'doo'di leejire makaateti Waakh liibahche yumheen. Amurreti laraaho ka kuhaaniyyo kaldaye makaatetaas yahame, icho ma kakhabaan.
[5] Atin injire Amurre ka saggi kuhaaniyyo chi'icho minki Waakhe buure ka Seeri Lanaso hil haaggichaan, seera ibi'dirroochaane, i'daasenyi icho uskeel iyeelin ma soomin a?
[6] Wihi an atin icheeko, etoo inta kajiro, minki Waakhe buure laka a kussanyahe.
[7] Chiirnaanneti Yeedi Waakh wahane kachiiran, ‘An soorriyoti at ibihisso menye, atihi 'doo'di addan uur inugleysatti iche 'doona.’ Chirri atin rumanka wihi yeeda essi garatteen, 'doo'di uskeel iyeelin, uskeel ma igoossaan.
[8] A mehe Ínam Aadam, a Kamuri Seeri Lanaso.”
[9] Yeesso intaas katabe, minkichoki weysiite Ya'huud gele.
[10] Etoo dahane hanjaawte la intaas a kijire. Farissaayotoo la intaas goya kijirta, wohoo icho Yeesso kacheektaane yowtaane, 'deerka wihi icho Yeesso worsateen, “Amurre ichoow eti Seeri Lanaso ka lasamaacho a israahaan?”
[11] Ulla wihi us icho iyidah, “Chirri etiinkoo naffoo iiyyaat khabo, naf la Seeri Lanaso ka ankhar kadihe ma sookhabatti ma soobihisso?
[12] Weeli enenyet geeddoo meheenye naffi iiyyaat kussanyahe? Maantaka wihi haaggane Seeri Lanaso ka layeelo ichoow amurreteen a israahaan.”
[13] 'Deerka wihi us et iyidah, “Dahantaah fiti.” Et dahan ficche, dahane toro tuum haagsatte, i'di ti addan titah.
[14] I'daasenyi Farissaayo bahte, tossatte, jiti icho Yeesso kayagiisiin kamasseen.
[15] Yeesso saggi Farissaayo ogoos iyowatti garta, intaas katabe. Ururoo buure la raahe, Yeesso la 'doo'dichoki khakkhannan tuumman samaache.
[16] Ulla 'doo'd tootooche, uus icho eti us yahe cheekin.
[17] Ulla wahaas a yeele 'dee wihi eti Waákh íyeyyeedo Isaaya layadeeh ka lacheeke labuuhicha.
[18] “Falfateeyti an soobahsade talla. A eti an weyti 'doono, toro la an kahamaado. Anihi Waakhe la Rubeyti Munyee rubeytiis goya a buuhicha, ulla saggi us yaafo jiti fissan ka ihukkumo icheeka.
[19] Us ma jaakho ommos ma rirriiro, et jitat ka hooyiis daago mele.
[20] Us koloo kalday laka balakki khollokhte ma jebcho, toro la 'dabi taahi uum bahcho ma jiccho. I'daas ka eti 'dabakhenye 'daran jiti samacchaarenye kawoya, ma 'diicho ichoowka ebba saggi jiti fissan ka liihukkumo iyeela.
[21] Magahiis ka yaafo tuumman khajjeel a khabaan.”
[22] Saahka 'doo'doo etoo ginna dakhatti indo laaye af laa Yeesso ikeene. Yeesso la et samaache, 'dee et a yeyyeedo toro il a argo.
[23] Enenyet tuumman girmeeste wihi us yidah, “Eta sarka a weel Dawuud a?”
[24] I'daasenyi Farissaayo chirri iche wahaas daagte ka, wihi iche tidah, “Miigti Beelsebuulhi karnati ginnayyoote kaldach on eta enenyet ginna kabahcha.”
[25] Yeesso wihi icho kamassaan garte, wihi us icho iyidah, “Yaafti tuummane seley goote isdihto a baabaata. Toro la ilkerengeet ommos minki seley gowe isdiho geed us fiddiyo mele.
[26] Chirri Seytaan on Seytaan bahcho, us seley a goggowe. Dakhiis saggoh orey ikasohta?
[27] Chirri an miig Beelsebuul ka ginnayyo enenyet kabahcho la, 'doo'diin miig eyya ginnayyo kabahcha? Icho 'deerka atin hukkuma.
[28] I'daasenyi chirri an Rubeyti Waakh ka ginnayyo bahcho, waha saggi dakhi goobi Waakh goytiin iyimiyye tusaan.”
[29] “Ommos etoo saggoh minki etoo miige igela, meehiis ihata sammata us koloo etaas miige ihidhidin? 'Deerka minkiis gela hata.
[30] “Eti tuummane ani ileejirin, a itirrima. Eti igargaarine walah ileesooholin a ileefida.
[31] Toollaka wihi an atin icheeko, uskeel tuumman ichoow gaf tuumman a geeddi enenyet liikakuto. I'daasenyi eti Rubeyti Munyee igafe, uskeeliis ma liikakuto.
[32] Eti Ínam Aadam igafe a geeddi uskeeliis liikakuto. I'daasenyi eti Rubeyti Munyee igafe, uskeeliis harrata ka ichoow harrati soosohatti ka ma liikakuto.
[33] “Geey haaggiche ulla gurnaanki haaggane delaa, ommos geey suujaache 'dee gurnaanki suuje a delo. A mehe geey ba gurnaanki us delo lakaabta.
[34] Dessi toof! Saggoh wihi haaggan itadeehiin chirri atin uskeel kajirtaan? I'di tahe wihi uuraah goya buuho iche afaah leeyamiit.
[35] Eti haaggan uuriis laka a haagganyahe gone, haaggaas on dela. Eti suuje la uuriis a suuj gone suujoonkaas on dela.”
[36] “I'daasenyi wihi an atin icheeko, ibeenki Waakh 'doo'd hukkumo, enenyet yeedi indigir laaye aficho kasoobahe iche cheekta.
[37] A mehe yeedi afaah ka a lakifura, toro yeedi afaahha uskeel liikaagoocha.”
[38] Farissaayotoo ichoow tagaammeti amurre wihi iche Yeesso itidah, “Eti ween, atihi wohoo miigti Waakh tuso nah tusso 'doonna.”
[39] Yeesso wihi us ilaabe, “'Doo'di i'deenye uskeel lehe waakkhassi addan wahti on wohoo miigti Waakh tuso daaha. I'daasenyi wihi goorat Waakh eti Waákh íyeyyeedo Yoona layadeeh ka enenyet tuse on menye, walah addane lasiicho mele.
[40] A mehe Yoona maan seyyah ibeenkiche khabto uuri bahaggoo buurenye goya kajire. Ínam Aadam laka saggaase maan seyyah hawwaal ikabarya.
[41] Ibeenki Waakh 'doo'd hukkumo, 'doo'di ili Ninaawi a tolossata 'doo'di i'dee cheekta. I'di tahe icho maanti Yoona Yeedi Waakh icheeke, uskeelicho a kasoonokhteene, toro la etoo Yoona kaween kalla atin leejira.
[42] Ibeenki Waakh 'doo'd hukkumo la makhaabassi karnatenye ili Cheeba a kahta 'doo'di i'dee uskeel igoossa. A mehe iche goorat harra gin'dohicheeda katimiyye kharati karnati Soolomon layadeeh khabe dagansatte, toolla la etoo Soolomon laka kaween kallaay.
[43] “Maanti ginna etoo goya kabahte, ginnata a iratta, ili daarenye bicche laa dah kagoossa. Fur yowatta, i'daasenyi fur ma 'hesso.
[44] 'Deerka wihi iche tadeeh, ‘Fureeyki an kasootabe inokhda.’ Maanti iche tamiit, furi marahe, harane lamujjummooche 'hessa.
[45] Ginnataas 'deerka iratta, ginna teeba addane iche laka kasuuje sookhaatatta etaas goya gelaane, fur yeessaan. Etaas la jirotiis, ti goorat oraat a ka'darsatta. 'Doo'da i'deenye uskeel leh i'da on itateeh.”
[46] Yeesso urur leeyyeedaayi, abartiis ichoow walaalinyetiis ba usu leeyeedin 'doonaane, khar tolossateen.
[47] Etoo wihi us Yeesso iyidah, “Abartaah ichoow walaalinyetaah khare toollaane, ati kileeyeedin 'doonaan.”
[48] Wihi us ilaabe, “Kamalda bal, abarteey ichoow walaalinyeteey a ayyo illeh?”
[49] Yeesso abattitiis dahan iooge, wihi us yidah “Abarteey ichoow walaalinyeteey kallaayo.
[50] A mehe eti tuummane wihi Aabbaheeyki serey jiro 'doono yeelo, a walaalaaya, a walaassaaya, a abartaaya.”