[1] Saahka 'Heroodhi boroofenhi Gaalilaaya iween wihi Yeesso yeelo daage.
[2] Ulla wihi us 'doo'diiski hil haaggicho iyidah, “Waha a Yoohanahi Enenyet Baattissiyo. Omoote kasookahe, jeentetaase miigti us wihi weeli enenyet yeelin iubaa'dan kahaaggicho ikhaba.”
[3] 'Heroode goorat Yoohana sookhabte, jeela ka hide. Waha la a jeente 'Heroodiyati makhaabál walaaliiski Fiilif layadeeh.
[4] A mehe Yoohana mehe 'Herood idowe ya, “Amurre ichoow khaatannaanki at iche khaatatti ma israahaan.”
[5] 'Herood Yoohana ogoos a 'doone, i'daasenyi 'doo'd karoore, jeenteti 'doo'd Yoohana eti Waákh íyeyyeedo iekkaachuu.
[6] Maanti seeri goorat 'Herood desse soomare ka, inám 'Heroodiya 'doo'd tuumman ortiis ka 'durte, 'Herood weyti hamaadisse.
[7] 'Herood 'deerka daato ka inám 'Heroodiya walahbaaw iche daahte siin iayyiche.
[8] Abarche la wihi iche tadeeh icheekte, “Yoohanahi Enenyet Baattissiyo matakkiis karam sookoriche inta ka isii,” itidah.
[9] Karnat uur suujowe, i'daasenyi jeenteti wihi us idaatte ichoow jeenteti martitiis u, amur bahche 'dee wihi iche daahte a lasiicho.
[10] 'Deerka etoo iskareet ergate jeela ka Yoohana matah lasoogooche.
[11] Matakkiis karam lasookorche inám lasiiche, iche la abarche igeesse.
[12] Abatti Yoohana timiyye, sartiis khaatte hawwaasse. 'Deerka iratte Yeesso wihi yitah icheekte.
[13] Inkoo Yeesso wihi yitah daage ka, koobanhoo gele, intaas katabe, intoo khaawwan irte. Chirri urur waha daage ka, ilkerengeeto kasoobahe, luhlo ka Yeesso raahe.
[14] Chirri beyti Gaalilaaya afiche ka Yeesso kooban kasooyage ka, urura buure arge, weyti uur inugleeste, toro 'doo'dichoki khakkhannan laka samaache.
[15] Chirri il gelebnowe ka, abattitiis itimiyye, “Il kola a ibeennowe, inta la a yibe, ururre laabe 'dee goobab a iratti gololoo a soogatteen,” itidah.
[16] Yeesso la wihi us ilaabe, “Walah icho kanokhtaan mele. Atin rubeytiin wohoo icho yamhiin siicha!”
[17] Wihi icho ilaabeen, “Wihi nah inta ka khabno a makaate chan ichoow bahag lamma kalday on.”
[18] Yeesso la wihi us iyidah, “Sookhaata ikeena.”
[19] Ulla urur amur ibahche hoos koorromiche. Makaateyyohi chane ichoow bahaggi lammee khaate, serey yeye, Waakh kala'd ilaabe, makaateyyo jejjebche. 'Deerka abatti idiibe, abatti la enenyet siisse.
[20] Enenyet tuumman golossate, darge. Abatti la enjel tomon ichoow lamma gololi laajjebche lasoowaache buuhaan soosuunte.
[21] Mejeli golossate tiriis, deyyeho ichoow nyaakhut la liiekkaan, a geeddi alif chan.
[22] Yeesso chirraas on abattitiis kooban gesse, 'dee ortiis bey aficheki 'diri a iratti geeddi us urur kahcho.
[23] Inkoo us urur kahche ka, burroo sartiis ikore Waakh wahte. Intaas keley kajiraayi, il ibeennowe.
[24] I'daasenyi kooban bey goyaka geeddoo a sohteen, ire la kooban kolba ankoo igu'dubta. A mehe hafare icho jeychaa.
[25] Geedda baryo kasoodowwaatte ka, Yeesso bey sarche kasohte abattitiis iirte.
[26] Chirri abatti usuhi bey sartiis kasohti agarte ka, weyti nahte, “Wooy, waha a meleyka!” tidahye, jeenteti roorruu la, riirte.
[27] I'daasenyi Yeesso chirraas on, “Anahina, a ani roorro akhabina!” iyidah.
[28] Beetero la wihi us ilaabe, “Kamur, chirri rumanka ati tahe, amur ibihiche bicche sarcho a kasoosohdi, a kiimaate.”
[29] Yeesso la, “Kaale,” iyidah. Beetero 'deerka kooban goya kasooyage, bicche sarcho kasohte, Yeesso iirte.
[30] I'daasenyi chirri us hafari iir kahcho arge ka roorro gesse, bicche goya kadihe riire, “Kamur irib,” iyidah.
[31] Yeesso chirraas on dahan sooge khabte, wihi us iyidah, “Ati i'daaru marah on ikakhuufta! A i'doh ikamalassa?”
[32] Chirri icho kooban kidiheen ka, hafar tolossate.
[33] Abattiti kooban goya kijirte la jilbo il kagu'dubte, Yeesso wahatte, “Rumanka ati Weeli Waakhe,” tidah.
[34] Chirri icho beyti Gaalilaaya afichekuus imaaheen ka, intoo Gennaasaret layadeeh yimaateen.
[35] Chirri 'doo'di ilaas Yeesso kase ka, farniin ilaas tuumman iergeene, 'doo'd 'doo'dichoki khakkhannan tuumman sookhaate, Yeesso ikeene.
[36] Hawwaasteene, 'dee 'doo'di khakkhannan laddi kabuu'diis kalday laka a 'daaro. Eti tuummane 'daare la samaate.