[1] Yeesso minki Waakhe buure kabahe, orey isohtaayi, abattitiis minassi minki Waakhe buure kaaddagsan tusse.
[2] Ulla wihi us iyidah, “Wahanyeyyoha tuumman yeya! Rume atin icheeka, berri daddaabtoo kaldaye ti addan fuusso lakatabo mele, icho tuumman a lasookhuba.”
[3] Geedda Yeesso Hali Geeyohi Oolif ka fiddiyo, abattitiis dagsi ka itimiyye wihi iche itidah “Waha maantoh yateehiin? Toro la mehe yateehe emeettaah ichoow ibeenki 'da'ddaboot tusa?”
[4] Yeesso wihi us ilaabe, “Yuubsada, uus etoo kalday laka atin ekkeysan!
[5] A mehe 'doo'di ittaawenye ani iskaayyeelo yamiite, ‘Ani a Ki Lasubhe,’ essi, a agartaane, 'doo'di ittaawenye ekkeestaan la.
[6] Yaafohi isdiho ichoow worassi ibuuhine dihoyyoot a daagtaan, i'daasenyi taba iicho atin kanahin. Wahanyeyyoha a sooyateehiine, i'daasenyi ibeenki yomboot uliba a ankhanyahe on.
[7] Sirgaalle a isdihta, karnato laka isdihaane, ilassi ittaawe ka nabhayye tamiite, harra laka sesseehta.
[8] Wahaas tuumman a chiis birriissa on.
[9] “Maantaas a atin ladiiba, 'dee sina atin loomhicha, toro atin layagiis. 'Doo'di harra tuumman la a atin 'dii'da jeenteti atin abattiteey itahiin u.
[10] Maantaas 'doo'di buure kakhuufnaanki icho ani ikakhuufaan a kanokhta, dahanohi chiiyeet isgessa, toro la is'dii'daan.
[11] 'Doo'di ittaawenye 'doo'di Waákh íyeyyeedo iskaayyeelo a buuraata, 'doo'di ittaawe ekkeesta.
[12] Toro la jeenteti hugun'darri ibuuraattuu, 'doo'di ittaawe 'dooninti us Waakh 'doono a nuglaatta.
[13] I'daasenyi eti garrahsate ichoowka sinata 'dubiche eleele a lariba.
[14] Wora Haaggane dakhi Waakh miinsan la harra tuumman ka a lacheeka, garti 'doo'di harra tuumman yateehe, 'dee 'deerka ibeenki yomboot yateeh.
[15] “'Deerka maanti atin iyookkoti ‘weyti bi'direnye, 'doo'd keehisso,’ meessi lagan katolosso Daaniyelhi goorat Waákh íyeyyeedo cheeke agarteen,
[16] 'deerka 'doo'di ili Ya'huudiya fiddiyo tuumman halal a ifirdo. Atihi yeeda soonto yeeda a kigelo.
[17] Eti minkiis sartiis fuulo uus min geline wohoo rucchul laka khaatin.
[18] Eti gos goya kijiro, uus nokhanne kabuu'diis sookhaatan.
[19] Ibeennetaas sinati deyyehoti nuugsatti ichoow ti huleesenye nyaamitto iubaa'dan sugto enenna a buure.
[20] Waakh waho uus maantaas lafirdo maanti il weyti roffo yahe hir 'deyo ommos Seeri Lanaso eheynan.
[21] A mehe sinati buurenye maantaas jirto, ti geeddaase uus uumacchoti harra ka ma laargine ichoow uliba. Toro wihi i'dicheenye lasooargo ba ma jiraan, jirtuu tuumman.
[22] “Chi' ibeennetaas liigaabin, etoo kalday laka ma soo'hado. I'daasenyi iroonoti 'doo'diiski us soobahsatuu, ibeennetaas a lagaabicha.
[23] Maantaas chi' etoo, ‘Yeya, Ki Lasubhe kalla,’ ommos, ‘Kuulla!’ kiyidah, arummeysan.
[24] A mehe 'doo'doo Ki Lasubhe iskaayyeelo ichoow 'doo'di 'doo'di Waákh íyeyyeedo iskaayyeelo a soobaha. Icho la wahanyeyyohi ittaawenye nane miigti Waakh tuso ichoow girmo yeelaane, 'dee chi'iche tateeh 'doo'di Waakh soobahsate laka ekkeestaan.
[25] Yeya, geeddi il ankhayyahe waha a atin isoocheekee.
[26] “'Deerka chirri 'doo'doo, ‘Kaaleya Ki Lasubhe kuulla hidaad kajiraa,’ atin iidah iiranna, ommos chi'icho, ‘Inta yeya, usu kalla min goyaka meelassi goyaatteet kijira,’ atin iyidaaheen arummeysanna.
[27] I'di tahe saggi ankhadhi beri kaankhado bahay ka liiarguu, Ínam Aadam laka emeettiis i'daase tateeh.
[28] Inti golfof jiifo, intaase ra'd kawara.
[29] “Uus sinayyohi maanassaas kutaan, “ ‘Orrahe a daayatta, yeyyah la banayhiis ma soobahcho, yiyyihimo serey a kasookhubtaane, miigti saraat la lakorkokicha.’
[30] “Maantaas wihi emeetti Ínam Aadam tuso serey ka a soobahaane, yaafohi harra tuumman la ooyaan. Ínam Aadam usuhi mirsohi saraat fuulo miig ichoow weynaanti buure khabaayi yamiit argaan.
[31] Ulla Herti Waakhe arabi fallee afuufto harra ierga, iche la 'doo'di Waakh soobahsate harra 'dollohiche affarcho ichoow sereyta daayan 'dollohiche tuumman kasoobaayissa.
[32] “Taba geeyi fiig yeeda kaabda. Uu' liikhimohiis ulhawtaane seeb bahchaan, saggi 'daato isoodowwaatte a garattaan.
[33] Saggaas on u maanti atin wahanyeyyoha tuummane ibeenki 'da'ddaboot tuso agarteen, saggi soonokhantiis isoodowwaatte kola ititah a garattaan!
[34] Rume atin icheeka, 'doo'di i'dee ma tuumo ichoowka wahanyeyyoha tuumman yateehiin.
[35] Sereyta daayan ichoow harra a kutaane, i'daasenyi yeedasseey jirtuu tuumman ma kutaan.
[36] “Aabbaheey on menye, et maantaas ommos saha'ddaas garti mele. Herti Waakhe goobi Waakh fiddiito ommos Ínam Aadam laka ma gartaan.
[37] I'di goorat ibeenne Noowa eheet, iche ibeenki Ínam Aadam yamiit laka yateeh.
[38] I'di tahe geeddi goorat 'duley harra ikhaatin, enenyet i'di orrankateet u a golossate one, minan laka laaddiste ichoowka Noowa koobanhi buure goya gele.
[39] Wihi sooyateeh ma abanne ichoowka icho tuumman 'duley khaate. Emeet Ínam Aadam ka laka i'daas on tateeh.
[40] Et lamma gose kijirta, koo lakhaata ki addan la lakataba.
[41] Deyyehotoo lammeenye golol isleetunto, too lakhaata ti addan la lakataba.
[42] “Maantaka toorribda, a mehe ibeenki Kamuriin yamiit ma garattaanee.
[43] I'daasenyi waha abda. Chirri ooyohi min leh saha'ddi ibeen eti hatto leh yamiit garti, ma ur'do miinkiis ma 'diicho ma lajebcho.
[44] 'Deerka atin laka toorribda gi'de i'di tahe Ínam Aadam saha'ddi liikamurine yamiite.
[45] “Kamalda bal, ilbooyi lakakhuufo toro kharee a ayyo? A ki kamuriis goobiis iweynaache, toro la geeddi mujjume ka ilbooyye kamuriis gololicho.
[46] Ilbooyi liimaalo a ki kamuriis usuhi hiliis mujjum haaggicho sooeleelo.
[47] Rume atin icheeka, kamuriis wihi us khabo tuummane dahantiis gessa, iweynaacha.
[48] I'daasenyi eemba ilbooya a suuje, ‘Kamureey geeddi deere foga kijira,’ isiyidahye,
[49] 'deerka ilbooyyeti wahalhiise sina kawaariyye, meleefuyyo leegolossayye, toro la farso leeyubhub.
[50] Kamuri ilbooyaas, maanti us ikamurine soonokhta toro saha'ddi us igaranne soonokhta.
[51] Usu seleye goggoocha, toro 'doo'di iskaayyeelo goya gata. Intaas ka ooya, bolokh ka ilko iskaroba.”