[1] Inkoo ibeen lihe kutte ka, Yeesso Beetero ichoow Yaakoobo ichoow Yoohanahi walaal Yaakoobee khaatte, woye, haloo deer koreen ichohaas on.
[2] 'Dey'doossaayi, Yeesso luurgiyiche, fooliis urgiye i'di orraheet u ababe, gaaddiis la i'di banay u dakhnaatte.
[3] Chirraas on Muusa ichoow Eliiya orcho ka soobaheene Yeesso leeyyeedeen.
[4] Beetero wihi us Yeesso iyidah, “Kamur, a haaggantahe gon chi' nah inta kijirro! Chirri at 'doonto, gaayim seyyah inta ka a disa, too a taahha, too la a too Muusa, too la a too Eliiya.”
[5] Yeyyeedaayi, mirisoo dakhane torrogoot icho ankube, hooyoo la miris goyaka sooyeede, “Waha a Weeleeyki an weyti 'doono, an weyti kahamaado. Usu nabah isuda!” yidah.
[6] Abatti uus iche hooy daagte ka, weyti nahte il gu'dubte fool il kakhabatte.
[7] I'daasenyi Yeesso yimiyye, icho 'daare, “Sookaha, roorro akhabina,” iyidah.
[8] Chi'iche serey yeyto, Yeesso on menye et addane iche agarto mele.
[9] Chirra icho hal kasookhubtaan ka, Yeesso icho amur ibahche wihi us iyidah, “Etoo kalday laka waha atin agarteen iicheekina, ichoowka Ínam Aadam omoot a lakasookahcho.”
[10] Abatti wihi iche usu worsatte, “A i'dohe 'deerka tagaammeti amurre geeddi 'Doorribe iimaatan Eliiya soonokhta ielatta?”
[11] Yeesso wihi us ilaabe, “Rumanka, Eliiya koloo yamiite, walah tuumman i'di icho eheneet toro kayeela.
[12] I'daasenyi, wihi an atin icheeko, Eliiya orey on yimiyye, 'doo'd la eti us yahe ma kasine, i'daasenyi suujoonki noole icho 'doonaan usu tuseen. Ínam Aadam laka, saggaas on dahanohicho ka dowwanoha ka sina ikawaarta.”
[13] Abatti 'deerka saggi us wor Yoohanahi Enenyet Baattissiyo ikaayyeedo, kasse.
[14] Chi'icho urur iyamiitiin, etoo Yeesso iyimiyye ortiis ka jilbo il kagu'dde.
[15] “Kamur, inankeey uur isoonugleyso, a sirgowe, sina weyti kawaarta, a mehe kol dakhan 'dab ommos bicche goya kadiha.
[16] Abattitaah la a ikeene, i'daasenyi iche inam a samaawwaayte,” iyidah.
[17] Yeesso wihi us ilaabe, “'Doo'di wey'dane uskeel lehe Waakh ikakhuufin! Geeddoh atin leefiddiyo? Geeddoh atin igarrahsadi? Ínam inta ka ikeena!”
[18] Yeesso ginna leejaakhe, ginna la inam kabahte, inam la chirraas on samaate.
[19] Abatti 'deerka dagsi ka Yeesso itimiyye, “Nah a i'doh ginna bihit iagaafanne?” worsatte.
[20] Wihi us ilaabe, “A jeenteeti atin Waakh weyti ikakhuufin. Rume atin icheeka, chi' kakhuufnaanki atin Waakh kakhuuftaan buur ka geeddi ilinti geeyi dahar yahe a geeddi atin hala, ‘Inta kaguure intuus iro,’ itadeehiine, ulla irti. Walah atin iubaa'dan la mala.”
[22] Chi' abatti tuumman boroofenhi Gaalilaaya ka isitimiy ka, wihi us iyidah, “Ínam Aadam dowwanoha ka 'dube lagoocha, dahanohi enenyet lagessa,
[23] yagiisiine, ibeenki seyyahnaatteet ka omoot lakasookahcha.” Abatti tuumman la fool ribowe.
[24] Inkoo Yeesso ichoow abattitiis ba ilkerengeetti Kafarnaa'hum eleeleen ka, 'doo'di kooddihi minki Waakhe buure goocho, Beetero iyimiyye, “Eti atin iween kooddihi minki Waakhe buure a guta?” worsateen.
[25] Beetero la wihi us ilaabe, “Aa a guta.” Beetero la min gele, Yeesso wahaas worsataa. Yeesso geeddi Beetero isooyeedin yeede, “Siimon at mehe tadeeh? Karnatohi harrata ayyo kooddi kaguttaan, 'doo'dichooda bal 'doo'di ilaas kicho ieheynane ilaas fiddiyo?” worsate.
[26] Beetero wihi us ilaabe, “'Doo'di ki ilaas ieheynane kaguttaan.” Yeesso iiyeyye, “'Deerka 'doo'dicho kooddi ma guto gon.
[27] I'daasenyi uus inno kakhuufnaanki icho Waakh kakhuufaan tirine, nyaam beyti Gaalilaaya iro, oroohti bahag lakakhabti bey goya isey. Bahaggi oraate at sookhabatte, cha'at af bakkaahisse chilim a agarta, chilinkaas khaate 'doo'di kooddi goocho igeeche, kooddiheey ichoow kaah ba kagut.”