[1] Yeesso ilkerengeetti Be'deleheeme boroofenhi Ya'huudiya kijirto iche lakadele. Maantaas la, 'Heroode karnati ilaase. Inkoo Yeesso desse, makhaaballetoo bakkaalle walah kaabatti iloo beri katimiyye, ilkerengeetti weene Yeerusaleem timiy.
[2] Iche la wihi iche worsatte, “Weeli desse karnati Ya'huud yateeh mee? I'di tahe bakkaali delmaattiis tuso usuhi beri kasookore a agarre, nah la usu nimiyye wahannaa.”
[3] Karnati 'Herood layadeeh uus yeedaas daage, weyti mal gele, 'doo'di ilkerengeetti weene Yeerusaleem kijiro tuumman laka mal gele.
[4] Inkoo us kuhaaniyyohi wewween ichoow tagaammeti amurre tuumman tol iwahe ka, inti Ki Lasubhe lakadelo worsate.
[5] Icho la wihi icho ilaabeen, “Ilkerengeetti Be'deleheeme boroofenhi Ya'huudiya kijirto iche lakadela. I'di tahe waha a wihi goorat etoo Waákh íyeyyeedo chiire.
[6] “‘I'daasenyi atihi ilkerengeetti Be'deleheemenye boroofenhi Yuuda kijirto, ilkerengeetohi addane Yuuda ma karucchul. A mehe berri karnat intane lakadela, ki 'doo'deeyki Issiraayel yaakhicho.’”
[7] 'Herood 'deerka makhaaballeti bakkaalle yeyto dagsi ka wahe, ibeenki bakkaal soobahe kaabte.
[8] Ilkerengeetti Be'deleheem ierge, toro la wihi us iyidah, “Nyaama, weel mujjum soohiisda. Maanti atin 'hesseen, amiita ani laka isoocheeka, 'dee an laka a irdi a wahdi.”
[9] Inkoo icho yeedi karnat daageen ka, jit khabteene, bakkaali kootte beri kasokoore icho sooraaheen la orcho raahe, ichoowka meessi weel kijiro sartiis ka tolossate.
[10] Chirri icho toro bakkaal argeen ka weyti hamaadeen.
[11] Chirri icho min geleen ka, weel ichoow Maariyati abartiise argeene, jilbo il kagu'ddeene weel wahteen. Urgohicho fureene, gaalkahsihi weyti gato miigenye icho sookhaateen soobahcheene, siicheen. Gaalkahsiha la a 'dahab ichoow halalle ichoow miricchinye.
[12] Inkoo Waakh issillo ka tootooche, 'Herood iinokhanna iyidah ka, jitoo addan tabeene, ilicho inokhteen.
[13] Inkoo makhaaballeti bakkaalle yeyto nokhatte ka, hertoo Kamur Yuussuf issillo ka isoobahte. Wihi iche itidah, “Kahe weel ichoow abartiis ba khaate ili Miissiri ifirid. Intaas fiddiye ichoowka ani a kisoocheeko. A mehe 'Herood dowwanoha weel ogoose yowtaa.”
[14] Yuussuf 'deerka ibeen on kahe, weel ichoow abartiis ba leefirde ili Miissiri leemiinsate.
[15] Intaas on fiddiyeene ichoowka 'Heroodhi karnate yumuy. 'Deerka wihi goorat Kamur etoo Waákh íyeyyeedo ka cheeke labuuhiche, “Weeleey ili Miissiri kasoowahe.”
[16] Inkoo 'Herood saggi makhaaballeti bakkaalle yeyto iekkeysatte kase ka, weyti hollowe. Amur bahche nyaakhuti lallabe gu'h lamma khabo ichoow ki gu'h lamma ieleelinne, ilkerengeetti Be'deleheem ichoow ilkerengeetohi isoodow kajiro tuumman a labakkicho yidah. Gu'hassa lammee ichoow maanti makhaaballeti bakkaalle yeyto karnat icheekte a israahaan.
[17] 'Deerka wihi eti Waákh íyeyyeedo Yeeremiya layadeeh ka lacheeke labuuhiche,
[18] “Hooyoo ilkerengeetti Raamah ka a ladaage. Hooyi etoo ooyo, weyti uuwwicho. Raaccheel nyaakhuticheeda ooyta, ichehi uur lakhoboocho 'dii'dda. I'di tahe icho tuumman kola a tuumeen.”
[19] Inkoo 'Herood yumuy ka, hertoo Kamur ili Miissiri ka Yuussuf issillo goyaka isoobahte,
[20] wihi iche itidah, “Kahe, weel ichoow abartiis ba khaate, ili Issiraayel inokho. I'di tahe 'doo'di goorat weel ogoos yowti, a tuume.”
[21] Yuussuf 'deerka kahe, weel ichoow abartiis ba khaate, ili Issiraayel inokhte.
[22] I'daasenyi Yuussuf chirri us saggi inam 'Heroodhi Arkeelawus layadeeh boroofenhi Ya'huudiya ka karnat iyitahye meel aabbahiis igele daage ka, intaas iran karoore. Yuussuf issillo ka latootooche, 'deerka boroofenhi Gaalilaaya irte,
[23] ilkerengeettoo Naasaret layadeeh furte. I'daas ka wihi goorat 'doo'di Waákh íyeyyeedo ka lacheeke labuuhiche, “Usu berri eti Naasarete layadeeh.”