[1] Saahka Farissaayotoo ichoow tagaammetoo amurre ilkerengeetti weene Yeerusaleem katimiyye, Yeesso itimiyye wihi iche worsatte,
[2] “Abattitaah a i'doh hugumme aacchinyeteen iraahine, geeddi icho igolossan dahano idikhan?” worsatte.
[3] Yeesso wihi us ilaabe, “Atin la a i'doh jeenteti hugunkiin u, amurreti Waakh ijebissaan?
[4] A mehe Waakh mehe yidah ya, ‘Aabbahaah ichoow abartaah inkaanyit,’ ichoow ‘Eti tuummane aabbahiis ommos abartiis falo, a layigaase!’
[5] I'daasenyi mehe elattaan ya, etoo a geeddi us aabbahiis ommos abartiis, ‘Gargaari atin ikasugtaan a siinti an Waakh ibahche,’ iyadeeh one,
[6] us gargaaraas ka aabbahiis iinkaanyitin. I'daas ka jeenteti hugunkiin u, antohi Yeedi Waakh a 'dii'ddaan.
[7] Iskaayyeessooy! Isaaya maanti us wori Waakhe atin miinsan kaayyeede a eysiiche.
[8] “ ‘'Doo'da af on ka ikoolicha i'daasenyi uuricho goyaka foga ileejiraan.
[9] Immarah on iwahtaan. Hugummeti enenyet soouume i'di amurreti Waakh u enenyet abchaan.’ ”
[10] Yeesso urur isiwahe, wihi us iyidah, “Dagansada, waha la abda.
[11] Walah enenyet af tabo enenyet bi'dirroocho mele. I'daasenyi yeedi enenyet af leeyamiit iche enenyet bi'dirroocha.”
[12] Abatti 'deerka itimiyye, wihi iche worsatte, “At saggi Farissaayo uus iche waha daagte ikaahollowte a garatta on a?”
[13] Yeesso wihi us ilaabe, “Icho a i'di geeyi Aabbaheeyki serey jiro rubeytiis il ikatoollinne, Aabbaheey bukkhicho.
[14] Woricho 'diicha! Icho a i'di 'doo'di indo laaye, toro enenyeti indo laa angaamicho. Etoo indo laa chu'us koo indo laa angaamicho, lammache ankhar a iskaleedihta.”
[15] Beetero la wihi us iyidah, “Mammahti kootte oraat wihiche nah isoocheek.”
[16] Yeesso wihi us icho worsate, “Atin laka uliba walah atin gelo mele?
[17] Ma abattaan a walahbaaw enenyet af tabo holoolo on gelaane, sar kabahaan.
[18] I'daasenyi wahanyeyyohi enenyet af kasoobaho uure kasoobahaane, waha la enenyet a bi'dirroochaan.
[19] A mehe enenyet uuriis goya iche mali suuje kayamiit i'di maanta ogoossi dubunuunu lagelo, mejeli makhaabassi tiis ieheynan leeur'do ichoow soho'ddarri ichoow hatto ichoow garti beenaat ichoow ham.
[20] Wahanyeyyohane enenyet bi'dirroocha, i'daasenyi dahanohi liidikhanne lakagolossati enenyet ma bi'dirroochaan.”
[21] Yeesso ili Gaalilaaya kakahe, ili ilkerengeetohi Tiiro ichoow Siidon isoodow irte.
[22] Makhaabassoo Ya'huud ieheynane ilaas taal, timiyye riirte, “Kamur, Inam Dawuud, uur isoonugleyso! Inanteey ginnati dakhatti ka weyti sina taham,” itidah.
[23] Yeesso la wohoo rucchul laka ma iidaahan. Abattitiis la itimiyye, hawwaassatte, “'Dubeenna kasoorirriirta laab,” itidah.
[24] Wihi us makhaabál ilaabe, “Ani Waakh a isooerge 'dee 'doo'di Issiraayele i'di iiyti baabaatee kalday yowda.”
[25] Makhaabale la timiyye ortiis ka jilbo il kagu'dubte, hawwaassatte, “Kamuraaw, igargaar!” tidah.
[26] Yeesso wihi us ilaabe, “Gololi nyaakhute lakhaato kararre liikhubo ma haaggan.”
[27] Iche la iitatte, “Aa, Kamuraaw! I'daasenyi kararre laka gololi eti kararre leh kasoodiddihe, a suunatta on.”
[28] Yeesso 'deerka wihi us ilaabe, “Makhaabassa, at weyti ani ikakhuufta, nyaam, wihi at daahte a kiyeelaa.” Chirraas on inantiche samaatte.
[29] Yeesso intaas katabe, Beyti Buurenye Gaalilaaya afiche tabe, irte burroo kore, orronte.
[30] Ururoo buure iyimiyye, 'doo'di luhlo laa ichoow ki indo laa ichoow ki ma'dayyee ichoow ki af laa ichoow 'doo'di addane khakkhannan sookhaate Yeesso ortiis keene, ulla icho tuumman samaache.
[31] 'Doo'd chu'us 'doo'di af laaye yeyyeedo ichoow ki elyeenye sohti ichoow ki ma'dayyeenye samaate ichoow ki indo laaye il argo arge ka weyti girmeeste Waakkhi Issiraayel saa'deen.
[32] Yeesso abattitiis wahe, wihi us iyidah, “An 'doo'da weyti uur isoonugleesda. Maan seyyah dakkhan ani on ileejire, wihi icho yamhiin la ma khabaan. Anihi ankaa khabaani laabo ma 'doono. A mehe a geeddi icho jit ka sussuuhaan.”
[33] Abattitiis wihi iche ilaabte, “Yiba ka, gololi geeddaasenye urura yaakho intoh ka'hella?”
[34] Yeesso la, “Makaate geeddoh khabtaan?” worsate. Iche la wihi iche ilaabte, “Makaate teeba ichoow bahaggoor rurrucchul laka a khabna.”
[35] Ulla urur amur ibahche orrommiche.
[36] 'Deerka makaateyyohi teebee ichoow bahag khaate, Waakh kala'd ilaabe, jejjebche, abattitiis ididdiibe, abatti la ba'h gisse.
[37] Icho tuumman golossateene ichoowka dargeen. 'Da'ddaboka abatti enjel teeba gololi jejjebane lasoowaache buuho soosuunte.
[38] Mejeli golossate deyyeho ichoow nyaakhut la liikekkaan, a elif affar.
[39] Yeesso inkoo us urur kahche ka, kooban gele, ili Magadaan irte.