[1] Inkoo Yeesso yeedaas massiche ka, boroofenhi Gaalilaaya kakahe, anki beri ili Ya'huude hawti Yoordane 'dusso 'dirihiise irte.
[2] Ururoo buure la raahe, ulla intaas ka 'doo'di khakkhannan samaache.
[3] Farissaayotoo la timiy, Yeesso angey gelin 'doontaa. Wihi iche worsatte, “Eti makhaabassiis walahbaaw us 'doono ka tuum riho ichoow amurreteen a israahaan?”
[4] Yeesso wihi us ilaabe, “Atin saggi uumaccho ka Waakkhi walah tuumman soouume ‘labo ichoow deyyeho isoouume’ ma soomin a?
[5] Wihi chiiran, ‘Jeentetuu mejel aabbahiis ichoow abartiis a kataba, usu ichoow makhaabassiis la wohoo kalday yateehiine, lammacho ba sartoo kalday yateehiin.’
[6] 'Deerka kola et lamma menye, a sartoo kalday. Maantaka wihi Waakh isikeene uus weeli enenyet seley bihin.”
[7] Iche la wihi iche worsatte, “A i'doh Muusa amurreti us inno siiche ka, ‘Eti makhaabassiis tuum riho khadaabi saggi us iriho tuso a siicho,’ iyidah?”
[8] Yeesso wihi us ilaabe, “Jeenteti matahmiigtiinna Muusa amuri atin oboorrihiin tuum karihtaan atin isiiche. I'daasenyi uumaccho ka i'da ma eheynan.
[9] Wihi an atin icheeko, eti tuummane makhaabassiis tuum rihe makhaabassoo addan diste, chi'iche mejeloo addan leeu'durte on menye, makhaabalaas uskeeli us makhaabassi tiis ieheynan leeur'do, iche gele.”
[10] Abatti wihi iche Yeesso itidah, “Chirri makhaabal jeenteti makhaabassiis etoo addan ileeu'durto kalday on seley ibahaan, eti min idisan gon deefa.”
[11] Yeesso wihi us ilaabe, “Eti Waakh gargaaro on menye, enenyet tuumman mee yeeda raaho.
[12] I'di tahe 'doo'doo usuhi sang'eenye ladele, gaasoo laka enenyete sang'a kayeele, gaasoo laka wihi icho minan kadisawwaayaan, a jeenteti icho dakhi goobi Waakh igelaane icho wihi Waakh 'doono iyeelaan. Eti yeeda khaannaan yabuu'd a khaatti.”
[13] 'Deerka nyaakhuti rurrucchul Yeesso liikeene, 'dee ulla dahano korcha iweesta. I'daasenyi abatti 'doo'di nyaakhut sookhaate leejaakhte.
[14] Yeesso la wihi us abatti iyidah, “Nyaakhuti rurrucchul ajeyinna 'diicha ani a iyimaatee, a mehe dakhi goobi Waakh a ki 'doo'di i'dee.”
[15] Inkoo us dahanohiis korche iweeste ka, intaas katabe.
[16] Etoo Yeesso iyimiyye wihi us worsate, “Eti ween mehe haaggane yeela 'dee jiroti jirtuu imassan 'hela?”
[17] Yeesso wihi us ilaabe, “A i'doh wihi haaggan iworsatta? Waakh kalday on haaggan. Chirri at jiro 'helin 'doonto, amurreti Waakh raah.”
[18] Ulla, “Amurretoh?” worsate. Yeesso wihi us ilaabe, “ ‘Weeli enenyet dubunuunu iigaasan, makhaabali kaah ieheynan ommos makhaabassi taah ieheynan aleeur'din, hatto iiran, garti beenaat ayeedin,
[19] aabbahaah ichoow abartaah inkaanyit, ollokkaah geeddi at is'doonto 'doon.’ ”
[20] Et la wihi us yidah, “Wahaas tuumman koo an iraahin mala. Mehe uliba ikaankhan?”
[21] Yeesso wihi us ilaabe, “Cha'at tuum jiroti el ikhabin jirin 'doonto, nyaame, wihi at khabto tuumman ororiche, chilimme miskiin siiche, 'dee kamurroonki goobi Waakh 'hele, 'dee kaale isooraah.”
[22] Etaas nugul chu'us waha daage ka, usuhi fool ribowe nokhte, a mehe hoolahi buurenye khabe.
[23] Yeesso 'deerka wihi us abattitiis iyidah, “Rume atin icheeka, weyti 'hooltahe chi' eti kamure dakhi goobi Waakh gelo.
[24] Toro wihi an atin iadeeh, naffi gaale issi irbi kakhaduutti weyti 'hooltahe. Eheet a, 'hoossi eti kamurenye dakhi Waakh gelo iche weyti kutta.”
[25] Chirri abatti waha daagte ka, weyti girmeysatte, “Ayyo 'deerka lariba?” worsatte.
[26] Yeesso icho yeye, wihi us iyidah, “Weeli enenyet ka waha a wihi koloo kalday laka iitaahan. I'daasenyi Waakh ka walah tuumman a geeddi icho yateehiin.”
[27] Beetero wihi us ilaabe, “Nah weheenyo tuumman a kasootabne 'dee ati kiraahna. Waakh berri mehe nah siicha?”
[28] Yeesso la wihi us icho iyidah, “Rume atin icheeka, maanti Waakh walah tuumman husubnaacho, Ínam Aadam kombortiisti antoote ababto koorronti, atinhi isooraahteen laka komborohi antoote tomon ichoow lammeenye koorrommattaane, yaafoheenki Issiraayele tomon ichoow lammee anattaan.
[29] Eti tuummane minan ommos walaalinyetiis ommos albehi leedesse ommos aabbahiis ommos abartiis ommos nyaakhutiis ommos gosiis jeenteti us abattiteey iyahuu kasootabe la, kol kude wahaas us kasootabe 'dirihiis 'hela, toro la jiroti jirtuu imassan laka a 'hela.
[30] I'daasenyi 'doo'di ittaawenye oraate ki 'duboot yateehe, ki 'duboot la ki oraat yateeh.”