[1] Rubeyti Munyee saahka Yeesso woyte, ichoowka hidaad geesse, 'dee Seytaan kajmeti uskeel kalugu'ddo ikeena.
[2] Inkoo us ibeen tomon affar maalintiche khabto af hiite ka, weyti ankaye.
[3] Seytaanki 'Dookkaje layadeeh la iyimiyye, iiyeyye, “Chirri at Weeli Waakh tahe, dagahta leeyeede makaate a titaahe.”
[4] Yeesso la wihi us ilaabe, “Wihi chiiran, ‘Weeli enenyet golol kalday mee kanoolyahe, i'daasenyi yeedi tuummane afi Waakh kasoobaho kanoolyahe.’ ”
[5] Seytaan toro Yeesso khaate, ilkerengeetti weene lagane Yeerusaleem ka minki Waakhe buure guutiis korche.
[6] “ ‘Waakh hertiis amure ibahcha, iche la dahanohiche ka serey kiokkhissa, uus 'dee luhtaah dagah gu'ddine.’ ”
[7] Yeesso wihi us ilaabe, “Chiirnaanneti Waakh toro mehe tadeeh ya, ‘Kamuri Waakkhaahe kajme agelin.’ ”
[8] Seytaan toro Yeesso khaate, haloo weyti deer korche, yaafohi harra tuumman ichoow kamurroonkicho ba tuse.
[9] Seytaan wihi us Yeesso iyidah, “Chirri at jilbo il kagu'dubte at ani iwahatte, waha tuumman a kisiicha.”
[10] Yeesso wihi us iyidah, “Seytaan, nyaam ikatab! A mehe wihi chiiran, ‘Kamuri Waakkhaahe waho toro la usu kalday on ihil.’ ”
[11] Seytaan 'deerka Yeesso katabe, herti Waakh la timiyye Yeesso gargaarte.
[12] Yeesso inkoo us saggi Yoohana jeela liigesse daage ka, boroofenhi Gaalilaaya inokhte.
[13] Ilkerengeetti Naasaret katabe, ilkerengeetti Kafarnaa'hume beyti Gaalilaaya aficheenye ili yaaf Seebulon ichoow Naaftalee irte furte.
[14] Waha la a yateehiine, 'dee wihi eti Waákh íyeyyeedo Isaaya layadeeh ka lacheeke, labuuhicha.
[15] 'Doo'di harrati yaaf Seebulon ichoow yaaf Naaftali toolla yaalle, jiti beyti Gaalilaaya liikasohti, hawti 'dusso Yoordan bahayhiise yaal, harrati Gaalilaaya 'doo'di Waakh igaran yaalliine yaal.
[16] Atinhi mug'dihi uskeel goya fiddiiteen, banayhi Waakhe buure a agarteen. 'Doo'di ili oosinti omooteet fiddiye, banay a isookoreen.
[17] Uus maantaas Yeesso Yeedi Waakh 'doo'd icheeke, wihi us iyidah, “Uskeeliin kasoonokhda, a mehe dakhi goobi Waakh a soodowwaatee.”
[18] Yeesso Beyti Buurenye Gaalilaaya afiche kasohtaayi, reeroo lammeenye isleedesse arge. Waha a Siimonhi Beetero layadeeh ichoow Andereeya. Iche la oroohti bahag lakakhabti bey goya isaate, a mehe hiliche a ki bahag lakhabti.
[19] Yeesso la wihi us iyidah, “Kaaleya isooraaha abattiteey ateeha, hiloo husube enenyet Waakh liikeeno a atin korcho.”
[20] Chirraas on oroohti kootte iche bahag kakhabatti 'diisse Yeesso raahte.
[21] Toro orey isohte yeeletoo addane lammeenye isleedelatte too Sebedaayee arge. Iche la a Yaakoobo ichoow Yoohana. Lammache aabbahiche khabtaayi kooban goya fiddiita, oroohti bahag lakakhabti haagsatta. Yeesso yeele lammache wahe.
[22] Iche la chirraas on kooban ichoow aabbahiche ba katabte Yeesso raahte.
[23] Yeesso boroofenhi Gaalilaaya tuumman goya tabe, minassichoki weysiite Ya'huud ka Wori Haaggane dakhi Waakh miinsan cheeke, 'doo'di khakkhannane khannaattetiis fil dakkhan tahe laka samaache.
[24] Woriis boroofenhi Siiriya tuumman kataa'he, 'doo'd la 'doo'di tuummane khakkhannane sugeerreti yeerare khabo ichoow ki bolokkhi uskul khabo ichoow ki ginnayyo dakhtaan ichoow ki sungaal khabo ichoow ki ma'dee ikeene, ulla icho tuumman samaache.
[25] Ururreti buurenye boroofenhi Gaalilaaya ichoow Dekaabolis ichoow ilkerengeetti weene Yeerusaleem ichoow boroofenhi Ya'huudiya ichoow hawti 'dusso Yoordan berihichee kayimiy Yeesso raahe.