[1] “Taba uurassiin goyaka enenyet ahukkumina, ommos atin laka Waakh a atin hukkumaa.
[2] A mehe saggaas atin enenyet ihukkuntaan saggaase atin laka Waakh atin ihukkuma. Geeddi atin 'doo'di addan iyeessaan, geeddaase atin liiyeela.
[3] “A i'doh urufti il walaalaah kijirto iagarta, gurtunki issaah goya kijiro la iargin?
[4] At saggoh walaalaah, ‘Alley uruftaas il kaajirto a kaabahcho,’ ikatadeeh, alla kol tuumman gurtume issaah goya kaajiraa?
[5] Iskaayyeessooy! Koloo gurtunki issaah goya kajiro bihiche, 'dee urufti il walaalaah goya kajirto mujjum agare, bihi.
[6] “Wihi munyee 'doo'di Waakh 'dii'ddan asiinna. 'Doo'da a i'di kararreti yibaate kisoonokhatti, kitaham. Wihi weyti haaggan la, 'doo'di haaggicho 'dii'ddan asiinna. 'Doo'da i'di golchuu wahaas haaggan a yabta.
[7] “Waakh wihi at 'doonto daddaahe, a kisiicho. Wihi at 'doonto Waakh kayoyyowo, a ka'hessaa. Waakh, arit ifah idahe, ulla a kifaho.
[8] I'di tahe eti tuummane walah daahe, Waakh wihi us daahe a siicha, ki walah yowti la, Waakh a ka'hela, ki ifaha yidah la, Waakh arit a ifaha.
[9] “Atinhi ooyenyee, etiinkoh chirri weeliis golol daahe dagah siicha?
[10] Ommos chirri weeliis bahag daahe toof siicha?
[11] Chirri atinhi uskeel leh ba nyaakhutiin siinti haaggan siissaan, Aabbahiinki serey jiro la geeddoo meheenye 'doo'di usu walah daahe siinti haaggan siicha!
[12] Walah tuumman ka, wihi kootte incheenka atinhi atin liiyeelo 'doontaan, 'doo'di addan iyeela. Wihi tahe, waha a wihi Chiirnaanneti Amurre ichoow Chiirnaanneti 'doo'di Waákh íyeyyeedo enenyet abchaan.
[13] “Aritti juukhe kagel, a mehe aritti 'dabi armaanjireen lakagelo, a ballaaddantahe, jiti baabaa isohti la a 'dabakhe, 'doo'di tabo la a buur.
[14] I'daasenyi aritti jiroti armaanjireen lakagelo a juukhe, jiti jiroti jirtuu imassan isohti la a miige, toro la 'doo'di jita 'helo a koo rucchul.
[15] “Taba 'doo'di 'doo'di Waákh íyeyyeedo iskaayyeelo yuubsada, i'di tahe icho uummanki iiyyaate atin ikayamiitiine, ugoka uurassicho ka a yaayti weyti sussuuje.
[16] Gurnaanki icho delaane kaabattaan. Geeyi bilhil medeer ma kaguratti, toro la geeyi khasah dommog ma kaguratti gon.
[17] Saggaas on u geeyi haaggan tuumman gurnaanki haaggane dela, i'daasenyi geeyi suuje gurnaanki suuje on dela.
[18] Geeyi haaggan gurnaanki suuje delin ma yabuu'de, geeyi suuje la gurnaanki haaggan delin ma yabuu'd.
[19] Geeyi tuummane gurnaanki haaggan idelin, a lagoocha 'dab lakalug'da.
[20] I'daakka 'doo'di 'doo'di Waákh iyeyyeedo iskaayyeelo, gurnaanki icho delaane kaabaattaan.
[21] “Eti tuummane af ka, ‘Kamuraayaaw,’ idowo mee dakhi goobi Waakh gelo. I'daasenyi eti gelo a ki wihi Aabbaheeyki serey kajiro 'doono yeelo kalday on.
[22] Maanti Waakh enenyet hukkumo, 'doo'di buure mehe ani iyadeeh ya, ‘Kamur, Kamur, magahaah ka a kiyeyyeene, toro magahaah ka ginnayyo 'doo'd a kabihinne, wihi ittaawenye weeli enenyet yeelin iubaa'dan laka yeelle.’
[23] Anna 'dow ka mehe icheeka ya, ‘An injire ma atin garan. Atinha hugun'darri kaassohattaan nyaama ikataba.’
[24] “Maantaka eti tuummane wihi an idowo daago toro la raaho, a i'di eti khareenye minkiis inti ng'aajjee kadise.
[25] Saahka hir 'deye, 'duley il khaate, hafari buure laka sookahe min gu'dde. I'daasenyi minkaas ma reyin. I'di tahe mujjume il katoolla.
[26] I'daasenyi eti tuummane yeedeeyka daago toro iraahin, a i'di eti 'dalamenye minkiis yooh goya kadise.
[27] Saahka hir 'deye, 'duley il khaate, hafari buure laka sookahe min gu'dde, min tuumman iskareye iskaambase.”
[28] Inkoo Yeesso waha tuumman cheeke ka, urur saggi us 'doo'd walah iabcho kagirmeeste.
[29] Yeesso i'di tagaammetichoti amurre mee, us saggi etoo anto khabo iche enenyet walah iabcha.