[1] Chirri Yeesso hal tahariis kasookhubte ka, ururoo buure usu sooraahe.
[2] Etoo bu'datoo uskul sar kasoofoofte la Yeesso iyimiy. Ortiis ka jilbo il kagu'dde, wihi us yidah, “Kamuraaw, chirri at 'doonto, at bi'dir ibihin a tabuu'd.”
[3] Yeesso dahan ooge, et 'daare, wihi us iyidah, “A 'doona, bi'dir bah!” Chirraas on bu'dati kootte et sar kasoofoofte baabaate, et samaate.
[4] Yeesso 'deerka wihi us iyidah, “Etoo kalday laka jit ka aleeyeedine, i'daasenyi kuhaani iiro, saggi at isamaatte istus. Sadakhati amurre Muusa kachiirane eti bu'da lakabahche bahcho bihiche, 'dee garti saggi lakisamaache a titaahe.”
[5] Chirra Yeesso ilkerengeetti Kafarnaa'hum gele ka, etoo ili Rooma koobbintoo iskareet itoollo, iyimiyye hawwaaste,
[6] wihi us iyidah, “Kamur, ilbooyeey goobe jiifa, sare a hanjaawte, weyti bolkha.”
[7] Yeesso la wihi us iyidah, “A amiite samaacha?”
[8] Etaas koobbintoo iskareet itoollo la wihi us Yeesso ilaabe, “Kamur, at minkeeyki at tamiit ma mu'dane i'daasenyi intaas on ka sooyeed, ilbooyeey la a samaataa.
[9] I'di tahe ani rubeyteey laka a etoo iskarti addane ikawewween antohicho raaho, toro la iskarti addane an andi laka a jirta. Chirri an koo, ‘Kaale,’ iidah a yamiit. Chirri an koo, ‘Nyaam iro,’ iidah la a irta. Chirri an ilbooyeey, ‘Waha yeel,’ iidah la a yeela.”
[10] Chirri Yeesso waha daage ka weyti girmeeste, wihi us ururi sooraaho iyidah, “Rume atin icheeka, an injire yaafohi Issiraayel goyaka, eti geedda weyti Waakh kakhuufo ma 'helin.
[11] Wihi an atin iadeeh, maanti harrata 'dubiche yitah, 'doo'di ittaawe beri ichoow bahaye kayamiite, Aburaaham ichoow Isakh ichoow Yaakoobo khabaani meelassicho khaattaane, dakhi goobi Waakh ka sukuuku isleegelaan.
[12] I'daasenyi 'doo'di yaafohi Issiraayelenye kootte dakhaas miinsanyahe Waakh icho khar ka mug'di goya iseya. Intaas ka la a ooyaane bolokh ka ilko iskarobaan.”
[13] Yeesso 'deerka wihi us etaas koobbintoo iskareet itoollo iyidah, “Nyaam goob iro. Saggi Waakh ilbooyaah isamaacho a rummeysatte gone, Waakh usu a samaacha.” Ilbooyi etaas iskareete ween la chirraas on samaate.
[14] Chirri Yeesso min Beetero gele ka, seyyoh Beetero ichehi sare kululaatti siriir kajiifto arge.
[15] Yeesso la dahan sookhabte, lakabukkhe iche la sookahte, usu goollisse.
[16] Chirri il gelebnowe ka, 'doo'di ittaawenye ginnayyo dakhtaan usu liikeene, ulla yeedi afoot on ka ginnayyo kabahche, toro la 'doo'di khakkhannan tuumman samaache.
[17] Ulla wahaas a yeele 'dee wihi eti Waákh íyeyyeedo Isaaya layadeeh ka lacheeke, labuuhicha. “Usu rubeytiis khannaatteteen a inno kabahche, sugeerreteen laka inno kakhaate.”
[18] Chirri Yeesso ururi khaariche arge ka abattitiis amur ibahche, beyti Gaalilaaya aficheki 'diri a imaaheen.
[19] 'Deerka etoo tagaanki amurree yimiyye, wihi us Yeesso iyidah, “Eti Weenoow, meelbaaw at iratti ka, an a kiraaha.”
[20] Yeesso wihi us ilaabe, “'Dowwohoyyo lumame khabaane, chimbirohi saraat la minchimbiroote khabaan. I'daasenyi Ínam Aadam inti us matah gesso laka ma khabo.”
[21] Etoo addane abattee wihi us Yeesso iyidah, “Kamur, alley koloo a irdi aabbaheey a laabo.”
[22] I'daasenyi Yeesso wihi us iyidah, “Isooraah. 'Doo'di tuume lamaa'do a hili 'doo'di tuume.”
[23] Yeesso 'deerka koobanhoo kadihe, abattitiis la raahte.
[24] Koloo kalday on hafaroo buure yimiyye bey gu'dde, bicche irtoo uskul bahcheene, kooban goya isootabeen. I'daasenyi Yeesso a ur'da.
[25] Abatti Yeesso iiratte, kihisse wihi iche itidah, “Kamur, inno rib, bicche a inno khaataanee.”
[26] Yeesso la wihi us ilaabe, “Eenna i'daaru marah on ikakhuuftaane, a i'doh i'duu ibur'dowteen?” 'Deerka kahe, hafar ichoow ir ba leejaakhe, chirraakka beye rukkuy goosse.
[27] Abatti girmeysatte, wihi iche worsatte, “Icho eta a ayyo, hafar ichoow ire laka yeediis daagaan?”
[28] Chirri us bey aficheki 'diri imaahe, us ili 'doo'di Gadaara eleele ka, reeroo lammeenye ginnayyo dakhtaan go'ddassi enenyet lakahawwaalo kasoobahe usu 'heleen. Icho weyti enenyet sina igoocheene, 'deerka et jitaas tabo mele.
[29] Chirraas on riireene, “Weeli Waakh, at mehe nah ka'doonta? Geeddi ibeenki Waakh nah ichiire iitaahan on tamiite bolokh nah tussa?” yidaaheen.
[30] Woyhoo buurenye golcha la intaas hagga yaakha.
[31] Ginnayyo la Yeesso hawwaasteene, “Chirri at nah bihisso, woyha golcha goya nah i'dii,” iyidaaheen.
[32] Yeesso la wihi us iyidah, “Nyaama irda!” Ginnayyo 'deerka baheene, golcha goya itabeen. Woyhi golcha kootte bur tahariis yaakho, bey goya itabe, woy tuummamba bicche khaateen.
[33] 'Doo'di golcha yaakhicho orye ilkerengeet irte, waha tuumman ichoow wihi 'doo'di ginnayyo dakhtaan kayitah cheeke.
[34] 'Doo'd tuumman 'deerka ilkerengeet kabahe Yeesso iirte. Chirri icho Yeesso argeen ka usu hawwaasteene ilicho a katabo.