[1] Yeesso saahka wihi us urur ichoow abattitiis ba iyidah,
[2] “Tagaammeti amurre ichoow Farissaayo ba antohi icho amurre Muusa enenyet kaabchaan a khabaan.
[3] Maantaka wihi icho atin idowaan nabah isuda, toro la yeela, i'daasenyi wihi icho yeelaan ayeelina, i'di tahe icho wihi icho cheekaan ma raahaan.
[4] Icho huleesi buurenye atin kararaane adah atin korchaane, i'daasenyi icho rubeycho far ma okkhichaane enenyet ma leekhabtaan.
[5] “Wihi iche yeesso tuumman a yeessa, 'dee enenyet arga. Saabohi balballaaddane miinan ichoow keymo kahiitaan. Saabassaas la Chiirnaanneti Waakhe goya kakhabaan.
[8] “I'daasenyi uus, ‘Eti ween,’ atin liidowin. A mehe Kamuriin a koo kaldach one, atin la a 'doo'di yaaftoo kaldach.
[9] Harrata ka la etoo kalday laka, ‘Aabba!’ iidaahana. I'di tahe Aabbahoo kaldache serey jiro on khabtaan.
[10] Toro la uus, ‘Eti ween,’ atin liidowin, i'di tahe atin wohoo kaldache titaaheene, eti atin iween la a koo one, ulla a Ki Lasubhe.
[11] Eti goytiin ka weyti ween, a falfatiinna.
[12] A mehe eti tuummane isweynaacho a lanuglaacha, eti tuummane isnuglaacho la a laweynaacha.”
[13] “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin aritti dakhi goobi Waakhe 'doo'd kahiddaane, atin rubeytiin la goobi Waakh ma gessaane, toro la 'doo'di gelin 'doono kajeyissaan.
[15] “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin harra tuumman ichoow beyohi burbuurenye tabtaane, 'dee etoo kalday wihi 'doo'di Ya'huud wahti iurgiyissaane, chu'us atin sooraahe ka, weyti 'dirihiin baabiissaan. Saggi atin meessi 'dabi armaanjireen iirattaan u, etaas laka 'dirihiinna baabiissaane meessi 'dabi armaanjireen irta.
[16] “Atinha indolaaye 'doo'd angaamissaan, sinati atin sugto eenna a buure! Atin, ‘Chirri etoo daatte, minki Waakhe buure wahe laka a walahba on,’ iche elattaan. I'daasenyi ‘Chirri etoo 'dahabi minki Waakhe buure kadaatte, wihi us kadaatte a buuhicho,’ iche elattaan.
[17] 'Dalammeti indo laa! Mehe khumman, 'dahab a, bal minki Waakhe buurenye 'dahabaas munyaacho?
[18] Toro wihi addane atin 'doo'd abissaan a mehe ya, ‘Chirri etoo chalagti hoola lakasoorriyoocho kadaatte, daatotiis a geeddi lajebcho, i'daasenyi chirri etoo wihi us Waakh siicho kadaatte, wihi us kadaatte a buuhicho.’
[19] Indomeleyyo! Mehe khumman, wihi us Waakh siicho bal chalagti wihi us Waakh siicho munyaasso? Chalag on khumman!
[20] Toollaka eti tuummane chalag kadaatti, chalag ichoow wihi tuummane sarche fuulo iche kadaatta.
[21] Eti minki Waakhe buure kadaatti la minki Waakhe buure ichoow Waakkhi goya fiddiyo iche kadaatta.
[22] Eti goobi Waakh kadaatti la, komborti Waakhe antoot ichoow Waakkhi kafiddiyo kadaatta.
[23] “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! I'di tahe atin wihi ikhummaneynane i'di geeyohi golol haaggicho i'di maanta nyaaykee ichoow bisaaree ka, Kamur gisi tomonnaatteet a ibihissaan. I'daasenyi wihi amurre ka wihi weyti khumman liiekkaacho a 'diisseen. Waha a i'di maanta 'doo'di jiti fissan ka lahukkumo ichoow uurnugleel ichoow atinhi 'doo'di lakakhuufo tateehiin a 'diisseen. Kamur gisi tomonnaatteet ibahcha i'daasenyi wahanyeyyohi weyti khumman a'diinna.
[24] Atinha indo laaye toro 'doo'd angaamissaan, atin dahassihi bicchehi atin tabhuubiin goya kajiro taartaane i'daasenyi naffi gaal khorkhissaan!
[25] “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin kokkoob ichoow baakhuul khariissa dikhtaane, i'daasenyi gololi goytiin kijiro a wihi atin 'damaam ka 'doo'd sarteen.
[26] Atinha Farissaayo indo laa, koloo uurassiin goya dikha, 'dee wahanyeyyoha kharaat laka bi'dir a bahaanee.
[27] “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin a i'di hawwaalohi sarcho riingihi dakhan lakadowe, kharicho haagganyahe, i'daasenyi goya lafohi 'doo'di tuume ichoow wahanyeyyohi bi'direnye buuha.
[28] Atin laka i'daasu, cha'atin laargo 'doo'doo fiffissane iyoogtahiine, ugoka uuriin goyaka, atin a 'doo'di iskaayyeelo toro hugun'darri kaassohti.
[29] “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atine go'ddassi enenyet lakahawwaalo 'doo'di Waákh íyeyyeedo idissaane, toro hawwaalohi 'doo'di fiffissan eykoddaan.
[30] Atin mehe elattaan ya, ‘Kootte maanti goorat aacchinyeteen jirte jirre ka, diiggi 'doo'di Waákh íyeyyeedo icho khubeen ma leegello.’
[31] Atin 'deerka 'doo'da goorat 'doo'di Waákh íyeyyeedo bakkiche a aacchinyetaanya elattaane, i'daas ka la saggi atin rubeytiin uskeel iyeessaane cheektaan.
[32] Maantaka taba atin laka i'di aacchinyetiin u, uskeelaas inti icho dabarroocheen buuhicha.
[33] “Atinha i'di toofafe! Dessi toof! Saggoh meessi 'dabi armaanjireene Waakh atin igooche ikabahsattaan?
[34] Maantaka, 'doo'di Waákh íyeyyeedo a atin isooerga, 'doo'di kharayyee ichoow 'doo'di jiti Waakh enenyet abcho a atin isooerga. Atin la gaasichekoo a tagiisiine, gaasoo laka massalaaba kakaahtaane, gaasoo laka minassiinki weysiite Ya'huud ka jahtaane, gaasoo laka kolba ilkerengeettoo ka sina omhissaan.
[35] Jeentetaas u la, diiggi 'doo'di fiffissane harra kakhubte tuumman berri atine atin fuula, uus diig Aabelhi fissan lakasookhabti ichoowka ínam Barachiiyahi magahiis Sakkariiya layadeeh. Ulla minki Waakhe buure ichoow chalagti hoola lakasoorriyoocho dahchooda dubunuunu kayigaaseen. Atin laka uskeelaas a leegesseen gon.
[36] Rume atin icheeka, waha tuumman 'doo'di i'dee iche lakahukkuma.
[37] “Yeerusaleemoow, ilkerengeetti weenoow, atin 'doo'di Waákh íyeyyeedo a tagiisiine, 'doo'di Waakh atin isooerge la dagah kachibtaan. Saggi orran lukki weylassiis barbarre goya igessatuu, an geeddi buurenye anihi dahanoheey atin koogoogo 'doone, i'daasenyi atin ma 'doonin.
[38] Yeya, Waakh rubeytiis minki Waakhe buurenye kiine a kaguure, minki marah kalday atin ikatabe.
[39] A mehe wihi an atin icheeko, yombuu toro ma iargartaane ichoowka, ‘Waakh ki magahi Kamur kayamiit a imaale,’ tadeehiin.”