[1] Inkoo Yeesso yeedaas tuummane saggi us isoonokhti miinsan massiche ka, abattitiis mehe iyidah ya,
[2] “Saggi atin igarattaan u, ibeen lamma on ankhane 'dee daawti Baasakka lagela, Ínam Aadam la ladiiba massalaaba lakakaaha.”
[3] Maanassaas on kuhaaniyyohi wewween ichoow ewweenki Ya'huud ba uranti kuhaanihi weyti weene magahiis Kayaafa layadeeh ka kulmeen.
[4] Icho la saggi icho ekkeysi ka Yeesso ikhabtaane 'dee iyagiisiin, iche rerreegaan.
[5] Wihi icho isiyidaaheen, “I'daasenyi uus inno daawta goyaka khaban, enenyet a geeddi us hol ka il baabiicho.”
[6] Yeesso ilkerengeetti Be'daaniya ka minki etoo Siimonhi Ki Bu'da Khabe layadeeh kijiraayi,
[7] makhaabassoo kurunkoo daakki alabaasta lakahaaggiche miricchihoo weyti gato miige kijiro leetimiyye, Yeessohi komborti ballaaddane lakagolossati ka dikkil kajiifo golossati matakkiis kakhubte.
[8] Abatti chi'iche waha agarte ka weyti hollowte, “Miricchiha a i'doh immarah labaabiicho?” worsatte.
[9] “Miricchiha kootte chilimmeti buurenye lakoororicha, chilimme la miskiin lasiicha!”
[10] Yeesso la wihi icho essaan a garta, wihi us iyidah, “A i'doh makhaabassa imalalissaan? Wihi iche iyeesse a haaggi weyti buure.
[11] Miskiin kol dakkhan goytiinna kakhabtaane, i'daasenyi ani kol dakkhan ma ikhabtaan.
[12] Miricchiha iche sarteey kakhubte ka, ani hawwaal itannabissa.
[13] Rume atin icheeka, meelbaaw Wora Haaggan harra tuumman ka lacheeko ka, wihi iche yeesse laka a lacheeka, iche la lakasoo'hela.”
[14] Yomboka abatti Yeessoti tomon ichoow lammee kichekoo, ki Yuuda Iskaariyoot layadeeh, kuhaaniyyohi wewween iirte,
[15] wihi us worsate, “Chirri an Yeesso dahantiin soogesse, mehe isiissaan?” Iche la chilimmeti lahaageete tomon seyyahe iekkaasse.
[16] Uus chirraas, Yuuda inti leemujjumenye us Yeesso dahanohicho kagesso yowte.
[17] Ibeenki oraate Daawti Makaateti Liikhasin, abatti Yeesso itimiyye wihi iche worsatte, “Intoh 'doonta iranna katannabanna, 'dee gololi daawti Baasakka kataham?”
[18] Wihi us ilaabe, “Nyaama, ilkerengeet gela, etoo iirda wihi atin itadeehiin, ‘Eti Ween mehe essa ya, ibeenki ani liigooche a soodowwaate. Abattiteey khabaayi, minkaahha daawti Baasakka kagella.’ ”
[19] Abatti 'deerka i'di kootte Yeesso iyidah on yeesse, gololi daawti Baasakka haaggisse.
[20] Chirri il gelebnowe ka, Yeesso ichoow abattitiisti tomon ichoow lammee komborti ballaaddane lakagolossati ka dikkille kajiifaan.
[21] Golossataani, Yeesso wihi us yidah, “Rume atin icheeka, etiinkoo 'dub igoocha.”
[22] Icho tuumman fool ribowe, kooba ki addan 'dubiis ka, “Kamur rumanka ani mee menya?” yidah.
[23] Yeesso wihi us ilaabe, “Eti toolla karam dahan ikaleelug'de, iche 'dub igoocha.
[24] Ínam Aadam i'di usu miinsane lachiiruu, a yamuut. I'daasenyi eti Ínam Aadam 'dub goocho, sinati sugto eenna a buure! Usuhi goorat idelanne deefta.”
[25] Yuudahi 'dee Yeessó 'dub soogoocho la, “Eti ween, rumanka ani mee menya?” iyidah. Yeesso wihi us ilaabe, “Aa a ati.”
[26] Golossataani Yeesso makaate khaate Waakh kala'd ilaabe, jejjebche abattitiis ididdiibe, wihi us yidah, “Khaata, amha waha a sartaayaa.”
[27] Toro kokkoob khaate, Waakh kala'd ilaabe, abatti idiibe, wihi us yidah, “Atin tuumman isleeanguunda.
[28] Waha a diiggeeyki ayyinti husube Waakh enenyet igoocho, a diiggi iroonoti enenyeti buure liikhubo, 'dee uskeelicho liikakuto.
[29] Wihi an atin icheeko, uus toolla kakhabatti, an farsoti sabiib toro ma damo, ichoowka ibeenkaas an wihi husub goob Aabbaheey ka atin leedamo yateeh.”
[30] Inkoo icho geeyoo Waakh dowteen ka, Hali Geeyohi Oolif ibaheen.
[31] Yeesso wihi us abatti iyidah, “Ibeenka goya rubeytiis, atin tuumman jeenteti wihi liiyeeluu, a ikafiriddaan, a mehe wihi chiiran, “ ‘An ersime gu'dda, woyhi iiyyaat la seley baaba.’
[32] I'daasenyi inkoo an omoot kasookahe, boroofenhi Gaalilaaya ortiin a irda.”
[33] Beetero wihi us ilaabe, “Chirri iche tuumman jeenteti wihi lakiyeeluu kaafiridde laka, an jirtuu ma kaafirdo.”
[34] Yeesso wihi us ilaabe, “Rume kisoocheeka, ibeenka goya rubeytiis, geeddi lukki iriirin at kol seyyahe ma igaratti tadeeh.”
[35] I'daasenyi Beetero wihi us yidah, “Cha'an kileeamuut laka, jirtuu ma kigardi ma adeeh!” Abattiti addan tuumman laka i'daas tidah.
[36] Yeesso 'deerka abattitiis khabaayi, meessi Gesseemane layadeeh irte, wihi us icho iyidah, “Inta orronda, geeddi an intuus irdi Waakh wahdi.”
[37] Beetero ichoow yeele Sebedaayoti lammee khaatte. Yeesso weyti bolkhe toro mali uskul gele.
[38] 'Deerka wihi us seyyahche iyidah, “Huleesi rubeyteey kijiro, huleesi omooteet laka a ikeena. Inta fiddiya, ileetoorribda la.”
[39] I'daaru orey isohte, il isi'diiche, fool harra ka'daare, Waakh wahte wihi us yidah, “Aabbahaaw, chi'iche tateeh kokkooba sinayyoot a liikakhaato! I'daasenyi in an 'doono menye, in at 'doonto on a titaahe.”
[40] 'Deerka abattitiis inokhte, ichehi u'durto 'hele, Beetero leeyeede, “Atin geeddi saha'ddoo kalday laka ma ileetoorribattaan a?” iyidah.
[41] “Toorribda Waakh wahda, 'dee kajmeti uskeel atin kalugu'ddo akidihina. Rubeyohiin wihi mujjumenye 'doonaane, i'daasenyi sartiinna 'dabakhe.”
[42] Toro koli lammaatteet nokhte, irte Waakh wahte, “Aabbahaaw, kokkooba sinayyoot chirri sammata an idamin liikakhaatin, in at 'doonto on a titaahe,” yidah.
[43] Chu'us soonokhti, ichehi u'durto, indo hulees kore toro 'hele.
[44] Toro koli seyyahnaatteet katabe, irte Waakh wahte. Wihi kootte us yidah on inokhte yidah.
[45] 'Deerka abatti inokhte wihi us iyidah, “Atin uliba a u'durtaane nassaan? Yeya, saha'ddi Ínam Aadam 'dub lagoocho, dahanohi 'doo'di uskeel leh lagesso a soodowwaatte.
[46] Sookaha a iranni! Eti 'dub igoocho kalla soosohtaa!”
[47] Yeesso yeyyeedaayi, Yuudahi ullaka abattiti tomon ichoow lammee kichekoowe yimiy. 'Doo'di sooraahe, a ururoo buurenye birlabbe ichoow khokkhoomme khabo, kuhaaniyyohi wewween ichoow ewweenki Ya'huud sooergate.
[48] Eta Yeesso 'dub goocho la mehe urur iskakhabeen ya, “Eti 'dee an dongade, a usu, khabda.”
[49] Yuuda chirraas on Yeesso iirte, bariitiche, “Eti weenoow!” iyidahye dongate.
[50] Yeesso wihi us ilaabe, “Aalaaw, wihi at itimiy yeel.” 'Doo'd la orey isookute, Yeesso khabte hide.
[51] Geeddaas on ka, etoo ullaka wahal Yeessee, birlabiis sootogte, soo'hiire falfati kuhaanihi weyti ween gu'dde, nabah ng'ure.
[52] Yeesso la wihi us iyidah, “Birlabaah min ilaab, i'di tahe eti tuummane birlab ka enenyet yagiis, ullaka birlabe lakayagiis.
[53] At saggi chirri an Aabbaheey gargaar idaahe, us herti Waakhe aliffe goosso koloo kalday isooergo ma garatti?
[54] I'daasenyi chirri an i'daas yeele, saggoh 'dee wihi Chiirnaanneti Waakh kachiirane sooyateeh liibuuhicha?”
[55] Yeesso chirraakka wihi us urur iyidah, “Cha'atin khokkhoomme ichoow birlabbe leetimaateene ikhabattaan, an a etoo enenyet walah saro? Maan tuumman ani uranti minki Waakhe buure a fiddiye Yeedi Waakh atin abche, atin la ma ikhaban.
[56] I'daasenyi wahanyeyyoha a yitaaheene 'dee wihi 'doo'di Waákh íyeyyeedo chiire labuuhicha.” 'Deerka abatti tuumman usu katabte firidde.
[57] 'Doo'di Yeesso khabte Yeesso khaate min Kayaafahi kuhaanihi weyti weene geeche. Tagaammeti amurre ichoow ewweenki Ya'huud la intaase kakulme.
[58] I'daasenyi Beetero fogaka Yeesso 'dubiis sooraahe, ichoowka uranti kuhaanihi weyti ween goya gele. Uus uram goya gele ka, irte, iskarti meel yaakhisso leeorronte, wihi Yeesso layeelo suge.
[59] Kuhaaniyyohi wewween ichoow Jaldaabti Weene Ya'huud tuumman, garti beenaate iche yeeddo, 'dee icho Yeesso omoot ikagoochaan, yowteen.
[60] I'daasenyi walah icho 'heleen mele, chi' 'doo'di ittaawenye garti beenaat cheeko soobahe laka. 'Da'ddaboka 'doo'doo lammee sookahe,
[61] wihi icho yidaaheen, “Reenka mehe yidah ya, ‘An minki Waakhe buurenye an jejjebcho, toro maan seyyah goyaka diso a abuu'd.’ ”
[62] Chirraakka kuhaanihi weyti ween kahe, wihi us Yeesso iyidah, “Walah at soolaabto mele? Yeeda enenyet kaacheekti, mehe jira?”
[63] I'daasenyi Yeesso gammadiche. Kuhaanihi weyti ween la wihi us iyidah, “Magahi Waakkhi jiro ka daato, usu at Ki Lasubhe toro Weeli Waakh tahe, nah isoocheek”
[64] Yeesso wihi us ilaabe, “Aa! A i'daas maanta at tidah on. I'daasenyi wihi an atin tuumman atin iadeeh, 'dee berri Ínam Aadam usuhi Waakkhi Miig Leh anki dahantiisti miigeet fiddiyo toro mirsohi saraat fuulaayi yamiit a agartaan.”
[65] 'Deerka kuhaanihi weyti ween hol on ka gaaddiis kharradiche wihi us yidah, “Wihi us yidah ka a gafe! A i'doh 'doo'doo addane gar laabo iyowanna? Yeya, toolla saggi us igafe a daagteen.
[66] Mehe goosseen?” enenyet worsate. Wihi icho ilaabeen, “Omoote imasse.”
[67] 'Deerka Yeesso fool hanjuf katufeene, khomhoyyo ka gu'ddeen. Gaasoo fodoorre jahte,
[68] “Ki Lasubheey, Waakh iyeyyeed. Ayyo kigu'dde?” idoween.
[69] Beetero la geeddaka uram goya fiddiya. Inantoo falfee la itimiyye, wihi iche itidah, “At laka Yeessohi boroofenhi Gaalilaaya a leejirte.”
[70] I'daasenyi 'doo'd tuumman ortiis ka 'dii'de, “An wihi at elatti ma gardi,” iyidah.
[71] Chirraakka bahe aritti uram lakagelo irte. Inantoo addan agarte, 'doo'di intaas kajiro wihi iche itidah, “Reenka Yeessohi Naasaret a leejire.”
[72] Ulla toro 'dii'de, daatte, “An et ma gardi!” yidah.
[73] Inkoo geeddoor lafiddiye ka 'doo'doo intaas toollo Beetero iirte, wihi us iyidah, “Rumanka at a kichekoo. A mehe saggi at iyeyyeeddo a tussa.”
[74] 'Deerka Beetero isabaare, Waakh dowe, wihi us yidah, “An et ma gardi!” Chirraas on lukki riire.
[75] 'Deerka Beetero yeedi Yeesso iyidah kasoo'hele. “Geeddi lukki iriirin, at kol seyyah, ‘Ma kigardi!’ tadeeh.” Ulla khar ibahe, bolokh ka ooye.