[1] Sábado p'unchay pasaqtintaq, semana qallariy p'uchay illarimuyta, Magdala llaqtamanta Mariaqa, hukkaq Mariapiwan aya p'ampana t'oqota qhawaykuq hamurqanku.
[2] Chayllamanmi Señorpa huk angelninqa hanaq pachamanta uraykamurqan. Chayaramuqtin hinataqmi, qonqaylla huk hatun pacha chhaphchikuy karqan. Hinan rumita suchurichispa, chay rumi patapi tiyaykurqan.
[3] Angelpa rikch'ayninqa, rayoq lliphllikiynin hinan karqan. Hinallataq p'achanpas, rit'i hina yuraqmi karqan.
[4] Aya p'ampana t'oqota kuidaq soldadokunataq, angelta rikuspanku mancharikuymanta khatatatasharqanku. Hinaspataq wañusqa hinaraq kasharqanku.
[5] Angeltaq, warmikunaman kutichispa nirqan: —Chakatasqanku Jesusta maskhashasqaykichistaqa yachanin. Chayrayku, ama mancharikuychischu.
[6] Hamuychis, hinaspataq maymanchus Señorta churarqanku chay cheqasta qhawaykuychis. Nisqanman hinan, payqa kawsarimpunña. Chaymi manaña kaypichu kashan.
[7] Wañusqakuna ukhumanta kawsarimpusqanta yachachisqankunaman usqhaylla rispa willamuychis. Qhawariychis, qankunaq ñawpaqeykichistan Galilea probinsiaman rishan, chaypitaqmi rikumunkichis. Qhawariychis chaykunataqa ñan niykichisña, nispa.
[8] Hinan warmikunaqa, aya p'ampana t'oqomanta usqhaylla, mancharisqa lloqsimurqanku. Hinallataq ancha kusikuywan yachachisqankunaman phawaylla rispa, chay willakuyta willamurqanku.
[9] Yachachisqankunaman willaq rishaqtinkutaq, Jesusqa qonqaylla paykunawan tupaykuq lloqsimuspa nirqan: —¡Napaykuykichis! nispa. Hinan warmikunaqa, chimpaykuspa chakinta oqllaykukuspa, Jesusta yupaycharqanku.
[10] Hinaqtinmi Jesusqa paykunata nirqan: —Amaña mancharikuychischu. Aswanpas, riychis, hinaspa Galilea probinsiaman rinankupaq wawqe-panaykunaman chay willakuyta willamuychis. Hinan chaypi rikumuwanqaku, nispa.
[11] Warmikunaq rishanankukamataq, chayllaman aya p'ampana t'oqota kuidaq wakin soldadokunaqa usqhayllaman llaqtata rirqanku. Hinan tukuy chay imaymanakuna pasasqanta, umalliq saserdotekunaman willamurqanku.
[12] Umalliq saserdekunataq, umalliq runakunapiwan huñunakuspa, rimanakurqanku. Hinan askha qolqeta hap'ispanku, soldadokunaman qorqanku.
[13] Soldadokunatataq nirqanku: —Kay hinatan ninkichis: ‘Yachachisqankunan tuta hamuruspanku, puñushanaykukama suwarapusqaku,’ nispaykichis.
[14] Kamachikuq Pilato chayta yacharuqtinqa, ñoqaykuña allinta rimapayasaqku. Hinan ima mana allinpas qankunapaqqa mana kanqachu. Chayrayku ama llakikuychischu, nispanku.
[15] Aya p'ampana t'oqo kuidaq soldadokunataq qolqeta chaskikuspanku, imayna yachachisqachus karqanku, chay hinatapuni ruwarqanku. Chay rimaytaqmi, judío runakuna ukhupi kunan p'unchaykama rimakun.
[16] Chunka hukniyoq yachachisqankunataq ichaqa, may orqoman rinankupaqchus Jesusqa kamachirqan, chay Galilea orqoman rirqanku.
[17] Chaypi Jesusta rikuruspankutaq, yupaycharqanku. Wakintaq ichaqa, iskayarqanku.
[18] Paykunaman asuykuspataqmi, Jesusqa kay hinata rimaykurqan: —Hanaq pachapipas, hinallataq kay pachapipas Diosmi tukuy kamachikuyniyoq kayta qowarqan.
[19] Chayrayku llapan suyukunaman riychis. Hinaspataq qatikuqniykuna kanankupaq yachachimuychis. Yayaq, Churiq, Santo Espírituq sutinpitaq bautisamuychis.
[20] Tukuy imaymanakuna kamachisqayta kasukunankupaqtaq paykunata yachachimuychis. Qhawariychis, kay tiempoq p'uchukanankamataqmi, sapa p'unchay ñoqaqa qankunawan kashasaq, nispa. Ahinapuni kachun.