[1] Chay p'unchaypitaqmi, Jesusqa wasimanta lloqsispan, qocha kantupi tiyaykurqan.
[2] Hinan paypa kasqanman, ancha askha runakuna huñukamurqanku. Hinan Jesusqa, barkaman haykuspa tiyaykurqan. Llapan runakunataqmi, qocha kantupi sayasharqanku.
[3] Paykunamanmi askha imaymanata rikch'anachiykunapi rimaykurqan. Nirqantaq: —Qhawariychis, muhu t'akaqmi t'akaq lloqsirqan.
[4] T'akashaqtintaqmi, wakin muhuqa ñan pataman chayarqan. Hinan phalaq animalkuna hamuspa pallarapurqanku.
[5] Wakin muhutaqmi, pisi hallp'ayoq rumi t'aqraman chayarqan. Hinan mana askha hallp'aq kasqanrayku, muhuqa usqhayllaman ch'ikchiramurqan.
[6] Ichaqa inti lloqsimuspanmi rupharapurqan. Mana saphiyoq kasqanraykutaqmi, ch'akipurqan.
[7] Wakin muhutaqmi, kiskakiskaman chayarqan. Hinan kiskakunaqa, wiñaspa p'amparapurqanku.
[8] Wakin muhuñataqmi ichaqa, allin hallp'aman chayarqan. Hinan ch'ulla muhullamanta pachakta, wakin soqta chunkata, wakinñataq kinsa chunkata rururqan.
[9] Pipas uyariq ninriyoq kan chayqa, uyarichun, nispan.
[10] Hinan yachachisqankunaqa asuykuspanku, tapurqanku: —¿Imanaqtintaq chay runakunamanri rikch'anachiykunallapi rimaykunki? nispanku.
[11] Kutichispantaq, Jesusqa paykunata nirqan: —Qankunamanqa, hanaq pacha qhapaq suyu pakasqa yachaykunan qosqa kasunkichis. Paykunamantaqmi ichaqa, mana qosqachu.
[12] Hinallataq pipas kaqniyoqmanqa, aswanraq kapunanpaqmi qosqa kanqa. Mana kaqniyoqmantataqmi ichaqa, paypa kaqninpas qechusqa kanqa.
[13] Chaymi paykunamanqa, rikushaspapas mana rikunankupaq, uyarishaspapas mana uyarinankupaq, nitaq yuyayninkupipas hap'inankupaq, rikch'anachiykunapi rimaykuni.
[14] Chay hinapin, Diospa rantinpi rimaq Isaiaspa nisqanqa paykunapi hunt'akun. Isaiasqa nirqanmi: ‘Ninriykichiswan uyarishaspaykichispas Manan hayk'aqpas entiendinkichischu. Qhawashaspa rikusqaykichistapas manan reparankichischu.
[15] Kay llaqtaq sonqonmi rumiyaykapun. Hinan ninrinkuwanpas mana allintañachu uyarinku. Hinallataq ñawinkuwanpas mana rikunankupaq, ninrinkuwanpas mana uyarinankupaq, sonqonkupipas mana hap'inankupaq, mana ñoqaman kutirikunankupaq iman, ñawinkutaqa ch'illmirapunku. Mana hina kaqtinqa, qhaliyachiymanmi,’ nispan. (Isa. 6:9-10)
[16] Chay ñawiykichiskunaq rikusqanraykun, hinallataq ninriykichiskunaqpas uyarisqanraykun, kusisamiyoqqa kankichis.
[17] Cheqaqtan niykichis: ‘Askha Diospa rantinpi rimaqkunan, hinallataq chanin runakunapas rikusqaykichistaqa rikuyta munarqanku. Ichaqa manataqmi rikurqankuchu. Hinallataqmi uyarisqaykichistapas uyariyta munarqanku. Ichaqa manataqmi uyarirqankuchu,’ nispay, nispa.
[18] Jesusqa nillarqantaqmi: —Chay hinaqa, muhu t'akaqmanta rikch'anachiyta qankuna uyariychis.
[19] Maypachachus pipas qhapaq suyumanta simita uyarin, ichaqa manataq entiendinchu chayqa, mana allin hamuruspanmi chay sonqonpi t'akasqa muhuta qechurapun. Chay ñan pataman chayaq muhuqa chaymi.
[20] Hinallataq, chay rumi t'aqraman chayaq muhuqa kaymi: Pipas qhapaq suyumanta simita uyarispa hina kusikuywan chaskikun.
[21] Ichaqa mana kikinpi saphiyoq kasqanraykutaq, mana unaytachu takyan. Hinan qhapaq suyumanta simirayku llakikuykuna, hinallataq qatiykachaykuna hamuqtin, usqhayllata misk'akun.
[22] Chay kiska-kiskaman chayaq muhuqa kaymi: Pillapas qhapaq suyumanta simita uyarikun, ichaqa kay pacha kaqmanta llakipakuykuna, hinallataq qhapaq kaypa q'otukuyninkunan simi uyarisqanta p'amparapun. Hinan mana rurupunchu.
[23] Chay allin hallp'aman chayaq muhutaqmi ichaqa, kaypuni: Pillapas qhapaq suyumanta simita uyarispa yuyayninpi hap'in. Hinan payqa, cheqapaqpuni ch'ulla muhullamanta pachakta rurun, wakin soqta chunkata rurun, wakinñataq kinsa chunkata rurun, nispa.
[24] Huk rikch'anachiyta paykunaman qhawarichispanmi Jesusqa nirqan: —Hanaq pacha qhapaq suyuqa, huk runa allin muhuta chakranpi t'akaqmanmi rikch'akun.
[25] Runakunaq puñushanankukamataqmi ichaqa, awqan hamuruspan, trigo t'akasqan pataman chirisuela qorata t'akarurqan. Hinaspataq pasapurqan.
[26] Hinan wiñamuspa ruruqtinña, chirisuela qorapas rikhurillarqantaq.
[27] Chakrayoqpa kamachinkunataq hamuspa, payta nirqanku: ‘Patronniyku, ¿manachu allin muhuta chakraykipiqa t'akamurqanki? ¿Maymantataq chay chirisuela qorari rikhurirun?’ nispanku.
[28] Chakrayoqtaq kutichispan, paykunata nirqan: ‘Huk awqanchismi kaytaqa t'akarun,’ nispa. Kamachinkunataq ichaqa payta nirqanku: ‘¿Rispa t'iraramunaykuta munankichu?’ nispanku.
[29] Chakrayoqñataqmi ichaqa, paykunata nirqan: ‘Amapuni. Chirisuela qorata t'irashaspan trigotawan t'irarapuwaqchis.
[30] Hinalla chirisuela qoraqa, trigo ichhuykama kuska wiñachun. Ichhuy tiempo chayamuqtinñan ichhuqkunata nisaq: ‘Ñawpaqtaqa chirisuela qorataraq ichhuramuychis, hinaspa kanapunanchispaq maki-makita t'eqeramuychis, trigotataq ichaqa, truhiyman waqaychamuychis,’ nispay, nispa.
[31] Huk rikch'anachiytawan paykunaman qhawarichispanmi nillarqantaq: —Huk runan mostasa muhuta apaspan, chakranpi t'akamurqan. Chaymanmi hanaq pacha qhapaq suyuqa rikch'akun.
[32] Chay muhuqa, llapan muhumantapas aswan huch'uychallan. Wiñaruspantaqmi ichaqa, wakin berdurakunamantapas aswan sach'amanraq tukupun. Hinan phalaq animalkunapas hamuspanku, k'allmankunapi q'esata ruwakunku, nispan.
[33] Wak rikch'anachiytan paykunaman nillarqantaq: —Huk warmin lebadurata hap'ispa kinsa tupuy hak'uman llapanta poqochinankama p'amparqan. Chaymanmi hanaq pacha qhapaq suyuqa rikch'akun, nispan.
[34] Tukuy chaykunatan Jesusqa, rikch'anachiykunapi askha runakunaman rimaykurqan. Mana rikch'anachiykunawanqa manataqmi rimaykuqchu.
[35] Diospa rantinpi rimaqpa nisqan hunt'akunanpaqmi chaykunataqa rimaykurqan. Diospa rantinpi rimaqqa nirqanmi: ‘Simiyta kicharispan rikch'anachiykunapi rimaykusaq, Kay pachaq qallariyninmantapacha pakasqa kaqkunatan sut'inchasaq,’ nispan. (Sal. 78:2)
[36] Hinaqtinmi chay askha runakunata kacharparipuspan, Jesusqa wasiman haykurqan. Yachachisqankunataqmi payman asuykuspa nirqanku: —Chakrapi chirisuela qoraq kasqan rikch'anachiymanta sut'inchaykuwayku, nispanku.
[37] Kutichispantaq, Jesusqa paykunata nirqan: —Allin muhu t'akaqqa Runaq Churinmi.
[38] Chakraqa kay pachan. Allin muhutaqmi, qhapaq suyuq wawankuna kanku. Chirisuela qorataqmi ichaqa, mana allinpa wawankuna kanku.
[39] Chay tarpuq awqaqa saqran. Kosechataqmi kay pachaq p'uchukaynin. Ichhuqkunataqmi ichaqa, angelkuna kanku.
[40] Chay hinaqa, imaynan chirisuela qoratapas t'iraspa ninapi kananku, chay hinallataqmi kay pachaq p'uchukayninpas kanqa.
[41] Runaq Churinmi angelninkunata kachamunqa. Hinan qhapaq suyunmanta llapan laq'achiqkunata, hinallataq mana chanin ruwaqkunatawan huñumunqaku.
[42] Hinaspataq, yawrashaq hornoman wikchuykunqaku. Chaypin waqaypas, hinallataq kiru k'arkakichiypas kanqa.
[43] Hinaqtinmi chanin runakunaqa, Yayankuq qhapaq suyunpi inti hinaraq k'ancharinqaku. Pipas uyariq ninriyoq kan chayqa, uyarichun, nispa.
[44] Nillarqantaqmi: —Huk chakrapin, pakasqa qhapaq kayta huk runa tarirurqan. Hinan kaqllapi pakapaykuspa, kusisqa ripurqan. Tukuy kaqninkunata bendemuspantaqmi, chay chakrata rantikapurqan. Chaymanmi hanaq pacha qhapaq suyuqa rikch'akun.
[45] Hanaq pacha qhapaq suyuqa, allin perlakunata maskhaq huk negosiantemanmi rikch'akullantaq.
[46] Chay ancha balorniyoq perlata tarispanmi payqa, kutipuspa tukuy kaqninkunata bendemurqan. Hinaspataq chay perlata rantikapurqan, nispa.
[47] Jesusqa nillarqantaqmi: —Chaymantapas, hanaq pacha qhapaq suyuqa, huk challwana llikamanmi rikch'akullantaq. Challwana llikata qochaman wikch'uykuqtinkuqa, tukuy imaymana rikch'aq challwakunatan hap'imun.
[48] Hunt'aña kaqtintaqmi, qocha kantuman horqomunku. Hinan chaypi tiyaykuspanku, allin kaqkunata kanastakunapi hoqarinku. Mana allin kaqkunatataq ichaqa, wikch'upunku.
[49] Chay hinan kay pachaq p'uchukayninpas kanqa. Angelkunan lloqsimuspanku chanin runakunapuramanta millay runakunata t'aqapunqaku.
[50] Hinan yawrashaq hornoman wikch'uykunqaku. Chaypitaqmi waqaypas kiru k'arkakichiypas kanqa, nispa.
[51] Hinan Jesusqa paykunata nirqan: —¿Tukuy chay imaymanakunata entiendirqankichischu? nispa. Paykunataq kutichirqanku: —Arí, Señor, nispanku.
[52] Hinan Jesusqa paykunata nillarqantaq: —Chaymi, hayk'an kamachikuy simita yachachiqkunaqa, hanaq pacha qhapaq suyumanta allin yachachisqa kanku. Paykunaqa, huk wasiyoq wiraqocha qhapaq kayninmanta mosoq kaqkunata, hinallataq mawk'a kaqkunatapas horqomuqmanmi rikch'akunku, nispan.
[53] Chay rikch'anachiykunata rimayta tukuspantaqmi Jesusqa, chay cheqasmanta ripurqan.
[54] Llaqtanman hamuspataq, judío runakunaq huñukunanku wasipi yachachirqan. Hinan paykunaq yuyayninkuman mana kabeqtin nirqanku: —¿Maymantataq kay runamanri kay yachaykunapas, hinallataq ancha atiywan ruwaykunapas hamun?
[55] ¿Manachu karpinteroq churin kayqa kashan? ¿Manachu mamanqa María, hinallataq wawqenkunapas Jakobo, José, Simón, Judas ima kanku?
[56] ¿Manachu llapan panankunapas ñoqanchiswan kashanku? ¿Maymantataq kay runamanri, tukuy chay imaymanakunaqa hamun? nispanku.
[57] Jesuspaqtaqmi phiñasqa kasharqanku. Hinan Jesusqa paykunata nirqan: —Diospa rantinpi rimaqqa, manan pisipaq hap'isqaqa kanmanchu. Aswanpas kikin llaqtanpi, hinallataq wasinpi imallan pisipaq hap'isqaqa kanqa, nispa.
[58] Runakunaq mana iñisqankuraykun, chaypiqa mana askhatachu ancha atiywan ruwaykunata ruwarqan.