[1] Abrahampa churin David, Davidpa churin Jesucristoq mirayninmanta rimaq qelqa.
[2] Abrahammi, Isaakta churiyarqan. Isaaktaq Jakobta; Jakobtaq Judata, wawqenkunatawan ima churiyarqan.
[3] Judataq, warmin Tamarpi Faresta, Zeratawan churiyarqan. Farestaq Esronta; Esrontaq Aramta churiyarqan.
[4] Aramtaq Aminadabta churiyarqan. Aminadabtaq Naasonta churiyarqan. Naasontaq Salmonta churiyarqan.
[5] Salmonmi, warmin Rahabpi Boozta churiyarqan. Booztaq warmin Rutpi Obebta churiyarqan. Obebtaq Isaita churiyarqan.
[6] Isaitaq rey Davidta churiyarqan. Rey Davidtaq Uriaspa warminpi Salomonta churiyarqan.
[7] Salomontaq Roboamta churiyarqan. Roboamtaq Abiasta churiyarqan. Abiastaq Asata churiyarqan.
[8] Asataq Josafatta churiyarqan. Josafattaq Joranta churiyarqan. Jorantaq Uziasta churiyarqan.
[9] Uziastaq Jotanta churiyarqan. Jotantaq Akazta churiyarqan. Akaztaq Ezequiasta churiyarqan.
[10] Ezequiastaq Manasesta churiyarqan. Manasestaq Amonta churiyarqan. Amontaq Josiasta churiyarqan.
[11] Babilonia suyuman apasqa kasqanku p'unchaykunapitaqmi, Josiasqa Jekoniasta wawqenkunatawan, churiyarqan.
[12] Babilonia suyuman apasqa kasqanku qhepatataq, Jekoniasqa Salatielta churiyarqan. Salatieltaq Zorobabelta churiyarqan.
[13] Zorobabeltaq Abiudta churiyarqan. Abiudtaq Eliaquinta churiyarqan, Eliaquintaq Azorta churiyarqan.
[14] Azortaq Sadokta churiyarqan. Sadoktaq Aquinta churiyarqan. Aquintaq Eliudta churiyarqan.
[15] Eliudtaq Eleazarta churiyarqan. Eleazartaq Matanta churiyarqan, Matantaq Jakobta churiyarqan.
[16] Jakobtaq Maríaq qosan Joseta churiyarqan. Mariamantataqmi, Cristo sutiwan sutichasqa Jesusqa naserqan.
[17] Chay hinapin llapan miraykunaqa, Abrahammantapacha Davidkama chunka tawayoq karqan. Davidmanta Babilonia suyuman apasqa kasqankukamataq, chunka tawayoq miraykuna karqan. Hinan Babilonia suyuman apasqa kasqankumanta Cristokamaqa chunka tawayoq miraykuna kallarqantaq.
[18] Jesucristoq naseyninqa kay hinan karqan. Jesuspa maman Mariaqa, Josewan kasarakunanpaqmi rimaykusqaña kasharqan. Manaraq kuska tiyashaqtinkutaqmi, Santo Espiritumanta wiksallisqa rikhurirqan.
[19] Maríaq qosan Joseqa, chanin runa kaspanmi, mana p'enqayman churayta munarqanchu. Chaymi payqa, Mariata pakallapi saqepuyta yuyaykusharqan.
[20] Chayta pay yuyaykushaqtintaqmi, chayllaman Señorpa huk angelninqa mosqhoyninpi rikhurirqan. Hinan payta nirqan: ―Davidpa churin José, esposayki Mariapi churiyasqaqa, Santo Espiritumanta churiyasqan. Chayrayku, esposayki kananpaq, payta chaskiytaqa ama manchakuychu.
[21] Hinan huk qhari wawata wachakunqa. Paymi llaqtanta huchankunamanta qespichinqa. Chaymi Jesús sutiwan payta sutichanki, nispa.
[22] Tukuy chaykunaqa, Diospa rantinpi rimaqpa chawpinta Señorpa nisqan hunt'akunanpaqmi karqan.
[23] Señorqa nirqanmi: ‘Qhawarillaypas, huk donsella sipasmi wiksallikunqa, Hinan huk qhari wawata wachakunqa. Emanuel sutiwantaqmi sutichanqaku,’ nispan. (Isa. 7:14) Emanuel sutiqa ‘Diosmi ñoqanchiswan’ ninantan nin.
[24] Hinan Joseqa, puñusqanmanta rikch'arispan, Señorpa angelninpa nisqanman hina ruwarqan. Mariatataq, esposan kananpaq chaskiykapurqan.
[25] Ichaqa, Maríaq phiwi qhari wawata wacha kunankaman, Joseqa esposanwan mana puñurqanraqchu. Hinan payqa, Jesús sutiwan suticharqan.