[1] Chay p'unchaykunapitaqmi, Jesusqa sábado p'unchaypi chakra-chakranta risharqan. Yachachisqankunataq yarqachikuspanku, trigoq umanta k'aphtaspa mikhuyta qallarirqanku.
[2] Hinan fariseokunaqa, chayta rikuspanku Jesusta nirqanku: —Qhawariy, yachachisqaykikunaqa mana ruwana kaqtan, sábado p'unchaypi ruwashanku, nispanku.
[3] Jesustaq ichaqa, paykunata nirqan: —¿David, hinallataq paywan kaqkunapiwan, yarqachikuspanku, imatachus ruwasqankumanta manachu ñawincharqankichis?
[4] ¿Imaynataq Davidqa, Diospa wasinman haykuspan Diosman haywasqa t'antata mikhurqan? Chaytaqa manan paypas, nitaq paywan kashaqkunapas mikhunankuchu karqan. Aswanpas saserdotekunallan chaytaqa mikhunanku karqan.
[5] Sábado p'unchaykunapin saserdotekunaqa, Diospa wasinpi mana ruwana kaqta ruwaspa sábado p'unchayta p'akinku. Ichaqa manataqmi huchachasqachu kanku. ¿Icha, manachu chaytapas Kamachikuy Simipi ñawincharqankichis?
[6] Ñoqataqmi ichaqa, niykichis: ‘Hukmi Diospa wasinmantapas aswan allin kaq kaypi kashan,’ nispay.
[7] Qelqaqa ninmi: ‘Yanapaykuytan munani. Manataqmi sakrifisiotachu munani,’ nispa. (Ose. 6:6) Chay Qelqaq nisqanta yachawaqchis chayqa, mana huchayoqtaqa, manan huchachawaqchischu.
[8] Chay hinaqa, Runaq Churinqa, sábado p'unchaypapas Señorninmi, nispa.
[9] Chaymanta ripuspataqmi Jesusqa, judío runakunaq huñukunanku wasiman haykurqan.
[10] Chayllamanmi, chaypi huk kaq makin ch'akisqa makiyoq huk runa kasharqan. Hinan Jesusta huchachayta munaspanku tapurqanku: —¿Sábado p'unchaypi qhaliyachiyqa, atikullanchu? nispanku.
[11] Jesustaq paykunata nirqan: —¿Qankunamanta mayqeniykichispapas ch'ulla obehallan kanman, hinaspataq sábado p'unchaypi t'oqoman urmaykuqtin, manachu hap'ispa horqowaqchis?
[12] Chay hinaqa, ¿manachu runaqa huk obehamantapas aswantaraq balen? Chayraykun, sábado p'unchaypi allin ruwayqa atikullanpuni, nispa.
[13] Hinaqtinmi chay ch'akisqa makiyoq runata nirqan: —Makiykita haywariy, nispa. Paytaqmi haywarirqan. Hinan huk kaq makin hina qhali kapurqan.
[14] Fariseokunataqmi ichaqa, lloqsispanku, imaynatachus wañuchinankupaq Jesuspa kontranpi rimanakurqanku.
[15] Chayta yacharuspantaqmi Jesusqa, chay cheqasmanta t'aqarikurqan. Askha runakunataqmi payta qatikurqanku. Hinan llapankuta qhaliyachirqan.
[16] Ama payta reqsichinankupaqtaq, paykunata allin-allintapuni kamachirqan.
[17] Diospa rantinpi rimaq Isaiaspa nisqan hunt'akunanpaqmi, Jesusqa chayta kamachirqan.
[18] Kaytaqmi Isaiaspa nisqanqa: ‘Qhawariychis, pitachus akllakusqay kamachiyqa kaymi. Munakusqayqa paymi. Paypitaqmi almayqa kusikun. Pay patamantaqmi, Espirituytapas churasaq. Hinan mana-judío runakunaman huchachayta willamunqa.
[19] Manan churanakunqachu, nitaqmi qaparinqapaschu. Manataqmi pipas llaqta kallekunapi kunkantaqa uyarinqakuchu.
[20] Chaninchayta llallichinankaman, q'ewisqa soqostaqa mana p'akinqachu. Hinallataq q'oshñishaq pabilotapas manan wañuchinqachu.
[21] Mana-judío suyukunataqmi, sutinpi suyakunqaku,’ nispan. (Isa. 42:1-4)
[22] Hinaqtinmi huk supayniyoq runata Jesusman apamurqanku. Paymi ñawsa, hinallataq upa karqan. Hinan payta Jesusqa qhaliyachirqan. Chay hina kaqtinmi, chay ñawsa, upa runaqa, qhawaripurqan, hinallataq rimaripurqan.
[23] Llapa runakunataqmi utirayarqanku. Nirqankutaq: —¿Kaychu Davidpa Churinri kanman? nispanku.
[24] Fariseokunataq ichaqa, chayta uyarispanku nirqanku: —Kay runaqa, supaykuna qarqoytaqa manan atinmanchu. Aswanpas supaykunaq umalliqnin Beelsebuwanmi qarqon, nispanku.
[25] Yuyaykusqankuta yachaspantaqmi, Jesusqa paykunata nirqan: —Tukuy qhapaq suyupas, kikinpa kontranpi t'aqanasqa kaspaqa ch'usaqyapunmi. Hinallataq tukuy llaqtapas, otaq wasipas kikinpa kontranpi t'aqanasqa kaspaqa, manan takyanmanchu.
[26] Sitaqchus Satanás qarqonman Satanasta chayqa, kikinpa kontranpin t'aqanasqa kashan. Chay hinaqa, ¿imaynatataq qhapaq suyunri takyashan?
[27] Sitaqchus ñoqa, supaykunata Beelsebuwan qarqoni chayqa, ¿wawaykichiskunari piwantaq qarqonku? Chay hinaqa, wawaykichiskunan chaninchaqniykichiskuna kanqaku.
[28] Ichaqa ñoqachus Diospa Espiritunwan supaykunata qarqoni chayqa, cheqaqtapunin Diospa qhapaq suyunqa chayamusunkichisña.
[29] Chay hinaqa, ¿imaynatataq huk kallpasapa runata manaraq ñawpaqta t'eqespan, wasinta haykuspa kaqninkunata q'aruyta atinman? Aswanpas t'eqeruspanñan wasin q'aruyta atinqa.
[30] Mana ñoqawan kaqqa, ñoqaq kontraypin kashan. Hinallataq mana ñoqawan pallaqpas, wishñirparinmi.
[31] Chaymi niykichis: ‘Runakunaq tukuy huchankutapas, hinallataq k'arak k'amisqankutapas Diosqa pampachanqan. Santo Espírituq kontranpi k'arak k'amisqankutan ichaqa, mana pampachanqachu,’ nispay.
[32] Pillapas ima simillatapas Runaq Churinpa kontranpi rimanman chayqa, Diosmi pampachanqa. Santo Espírituq kontranpi rimaqtan ichaqa, mana kay kawsaypipas, nitaq hamuq kawsaypipas Diosqa pampachanqachu, nispa.
[33] Nillarqantaqmi: —Rurusqanpin sach'ataqa reqsikun. Chayrayku, sach'achus allin chayqa, rurunpas allinllataqmi. Sach'ataqchus mana allin chaytaqmi ichaqa, rurunpas mana allinllataqchu.
[34] Imachus sonqopi kashan, chaytan simiqa riman. Chayrayku, ¡mach'aqway miraykuna! ¿Mana allin kashaspaykichisri, imaynatataq allin kaqta rimawaqchis?
[35] Allin runaqa, sonqonpi allin kaq waqaychasqanmantan allin kaqkunata horqomun. Mana allin runataqmi ichaqa, mana allin kaq waqaychasqanmanta, mana allin kaqkunata horqomun.
[36] Ñoqan ichaqa, niykichis: ‘Runakunaqa, llapallan chay mana baleq simikuna rimasqankumantan, taripay p'unchaypi Diosman kuentata qonqaku,’ nispay.
[37] Chay hinaqa, Diosmi rimasqaykichiskunamantaqa chaninmanpas tukuchisunkichis, otaq huchachasunkichispas, nispa.
[38] Hinaqtinmi wakin kamachikuy simita yachachiqkunapas, fariseokunapas kutichirqanku. Nirqankutaq: —Yachachikuq, qanpa señal ruwasqaykitan rikuyta munayku, nispanku.
[39] Jesustaq, paykunaman kutichispa nirqan: —Wasanchaq mana allin runa-mirayqa, señaltan mañawan. Ichaqa manan ima señalpas qosqachu kanqa, aswanpas Diospa rantinpi rimaq Jonasmanta señalmi qosqa kanqa.
[40] Imaynan hatun challwaq wiksanpi Jonasqa kinsa p'unchay kinsa tuta kasharqan, chay hinallataqmi Runaq Churinpas hallp'aq sonqon pi kinsa p'unchay kinsa tuta kashanqa.
[41] Nínive llaqtapi runakunaqa, Jonaspa willasqanwanmi yuyayman kutirikurqanku. Qhawariy, Jonasmanta aswan allin kaqmi kaypi kashan. Chayraykun taripay p'unchaypiqa, kay p'unchay miray runakunaq kontranpi Nínive llaqta runakuna hatarimuspa huchachanqaku.
[42] Salomonpa yachayninkunata uyarinanpaqmi sur ladomanta hamuq reynaqa, kay pachaq tukukuyninmantaraq hamurqan. Qhawariy, kaypin Salomonmantapas aswan allin kaq kashan. Chayraykun chay reynaqa, taripay p'unchaypi kay p'unchay runa-miraypa kontranpi hatarimuspa huchachanqa, nispa.
[43] Nillarqantaqmi: —Maypachachus runamanta qhelli supay lloqsirun chayqa, samanata maskhaspanmi ch'aki cheqasninkunanta purin. Ichaqa manataqmi tarinchu.
[44] Hinaqtinmi nin: ‘Maymantachus lloqsimurqani chay wasiyman kutipusaq,’ nispan. Kutipuspantaqmi, wasitaqa ch'usaqta, pichasqata, hinallataq sumaq allicharusqata tarin.
[45] Hinaqtinmi rispa, wak qanchis supaykunata paymanta aswan millaykunata pusamun. Hinan chayman haykuspanku, chaypi tiyanku. Chay runaq qhepaman kawsaynintaqmi, ñawpaq kawsayninmantapas aswan millaymanraq tukupun. Chay hinallataqmi, kay mana allin miray runakunawanpas kanqa, nispa.
[46] Jesusqa askha runakunaman rimashallaqtinraqmi, chayllaman mamanpiwan, wawqenkunapiwan payta rimaykuyta munaspanku hawapi kasharqanku.
[47] Huk runataq, Jesusta nirqan: —Qhawariy, mamaykin, wawqeykikunapiwan qanwan rimaykuyta munaspa, hawapi kashanku, nispan.
[48] Jesustaq chay willaqnin runaman kutichispa nirqan: —¿Pitaq mamayri, hinallataq pikunataq wawqeykunapasri kanku? nispan.
[49] Yachachisqankunaman makinta haywarispataq nirqan: —Kayqá mamaypas, hinallataq wawqeykunapas.
[50] Chay hinaqa, pikunachus hanaq pachapi kashaq Yayaypa munayninta ruwaqkunallan, wawqeypas, panaypas, hinallataq mamaypas kanku, nispa.