[1] Jesusqa, Dios yupaychana wasimanta lloqsispanmi ripusharqan. Hinan yachachisqankunaqa. Dios yupaychana wasiq perqanta qhawachinankupaq asuykurqanku.
[2] Kutichispantaq Jesusqa paykunata nirqan: —¿Llapan kaykunata rikushankichischu? Cheqaqtan niykichis: ‘Manan kaypiqa ima rumipas rumi patapi mana thunisqaqa qhepanqachu,’ nispay, nispa.
[3] Jesusqa Olibos orqo patapin tiyaykurqan. Hinan yachachisqankunaqa sapaqllapi payman asuykuspa tapukurqanku: —Niwayku, ¿hayk'aqtaq chay imaymanakunari kanqa? ¿Ima señaltaq hamunayki qayllallaña kaqtin, hinallataq kay pachaq p'uchukananpaqri kanqa? nispanku.
[4] Kutichispantaq, Jesusqa paykunata nirqan: —Qhawakuychis, amataq piwanpas q'otochikuychischu.
[5] Askhan sutiypi hamunqaku. Ninqakutaq: “Ñoqan Cristoqa kani,” nispanku. Hinan askhata q'otunqaku.
[6] Awqa tinkuykunamanta, hinallataq awqa tinkuykunamanta rimaqtapas uyarinkichismi. Tukuy chaykuna pasananpuni kasqanta, ama mancharikuspa qhawakuychis. Chaywanpas ichaqa, manan p'uchukayraqchu kanqa.
[7] Huk suyun, wak suyuq kontranpi, hinallataq huk qhapaq suyupas, wak qhapaq suyuq kontranpi hatarimunqa. Tukuy cheqaspitaqmi millay onqoykuna, yarqaykuna, hinallataq pacha chhaphchikuykuna kanqa.
[8] Lliw chaykunaqa, nanaykunaq qallariyllanraqmi kanqa.
[9] Hinaqtinmi hatun ñak'ariykunaman hap'ichisunkichis, hinallataq wañuchisunkichis. Sutiyraykutaqmi, llapan suyu runakunaq cheqnisqan kankichis.
[10] Hinaqtinmi, may askha misk'anqaku. Paykunapurataq q'otullawan hap'ichinakunqaku. Hinallataq paykunapura cheqninakunqaku.
[11] Askha falso profetakunan hatarimunqaku, hinaspataqmi askha runata q'otunqaku.
[12] Mana kamachikuy simiman hinachu kawsasqankuhawataq, askha runakunaq munakuynin chiriyapunqa.
[13] Pichus p'uchukaykama takyaqtaqmi ichaqa, qespichisqa kanqa.
[14] Qhapaq suyumanta kay allin willakuytaq, llapan suyu runakunaq yachanankupaq lliw teqsimuyuntinman willasqa kanqa. Hinamantataqmi p'uchukayqa chayamunqa, nispa.
[15] Jesusqa nillarqantaqmi: —Chay hinaqa, Diospa cheqnisqan millakuy ch'innichiqtan, Diospaq t'aqasqa cheqaspi tiyashaqta rikunkichis. Chaymantan Diospa rantinpi rimaq Danielqa rimarqan. Chayta ñawinchaqqa entiendichun. (Dan. 9:27; 11:31; 12:11)
[16] Hinaqa, Judea probinsiapi kashaqkuna, orqo patakunaman ayqekuchunku.
[17] Wasi patapi kashaqqa, imallatapas wasinmanta horqonanpaq amaña haykuchunñachu.
[18] Hinallataq chakrapi kashaqpas, kapanta apakunanpaq amaña qhepamanqa kutichunñachu.
[19] Ichaqa, ¡ay chay p'unchaykunapi, onqoq warmikunamanta, hinallataq ñuñuq wawayoq kashaqkunamantapas, imaynaraq kanqa!
[20] Ayqekuyniykichisqa, ama paray tiempopichu, nitaq sábado p'unchaypipaschu kananpaq Diosmanta mañakuychis.
[21] Hinan, kay pachaq qallariyninmanta kunankamapas, mana hayk'aq kasqan sinchi hatun ñak'ariy kanqa. Manataqmi chay hina hatun ñak'ariyqa hayk'aqpas kanqañachu.
[22] Chay p'unchaykunachus mana pisiyachisqa kanman chayqa, manan pipas qespikunmanchu. Ichaqa akllasqakunaraykun, chay p'unchaykunaqa pisiyachisqa kanqa, nispa.
[23] Nillarqantaqmi: —Sichus pipas nisunkichis: ‘Qhawariy, kaypin Cristoqa kashan,’ nispa, otaq nisunkichis: ‘Haqaypin kashan,’ nispa chayqa, aman kreenkichischu.
[24] Falso cristokuna, hinallataq falso profetakunapiwanmi hatarimunqaku. Hinan hatun señalkunata, musphana ruwaykunatawan ruwanqaku. Atikunmanchus chayqa, akllasqakunatawanraqmi q'otunqaku.
[25] ¡Qhawariychis! Ñawpaqmantaraqmi kaykunataqa nirqaykichis.
[26] Chay hinaqa, sichus pipas nisunkichis: ‘Qhawariychis, ch'inniqpin kashan,’ nispa chayqa, aman rinkichischu. Otaq sichus nisunkichis: ‘Qhawariychis, wasi ukhu kuartochakunapin kashan,’ nispa chaypas, aman kreenkichischu.
[27] Imaynan rayoq lliphllikiyninqa inti lloqsiy ladomanta, inti haykuy ladokamaraq rikuchikun, chay hinallataqmi Runaq Churinpa hamuyninpas kanqa.
[28] Maypichus ayakunaq kasqanmanmi, gallinasokunaqa huñukunqaku, nispa.
[29] Jesusqa nillarqantaqmi: —Chay hatun ñak'ariy p'unchaykuna tukukuqtin hinataqmi ichaqa, Intipas tutayapunqa, killapas mana k'anchanqañachu. Ch'askakunapas, hanaq pachamanta urmaykamunqan. Hinallataq hanaq pachapi atiykunapas chhaphchirisqan kanqa. (Isa. 13:10)
[30] Hinaqtinmi Runaq Churinpa hamuynin señalqa, hanaq pachapi rikhurimunqa. Chay tiempopitaq llapan hallp'a pachantinpi runamiray ayllukuna, khuyayta waqapakunqaku. Hinaspataq Runaq Churinta hanaq pachamanta phuyu patapi atiywan k'anchariyninpi, hamushaqta rikunqaku.
[31] Angelninkunatataq, alto kunkayoq korneta waqachiywan kachanqa. Hinan akllasqankunata hanaq pachaq huk lado k'uchunmanta, wak lado k'uchunkama, tawantin ladomanta huñuchimunqa, nispa.
[32] Nillarqantaqmi: —Igos sach'amanta rikch'anachiytapas yachallaychistaq. K'allmankuna q'omeryamuqtin, hinallataq rap'inkunapas ch'ikchimuqtinmi, poqoy tiempoqa qayllaykamushasqanta yachankichis.
[33] Chay hinallataq qankunapas, tukuy chay imaymanakunata rikuspaykichis, Señorqa punku qayllapiña kashasqanta yachaychis.
[34] Cheqaqtan niykichis: ‘Tukuy chay imaymanakunaq hunt'akunankamaqa, manan kay runa-miraykuna tukukunqachu.
[35] Hanaq pachapas, hallp'a pachapas tukukunqan, simiykunan ichaqa, manapuni tukukunqachu,’ nispay.
[36] Chay p'uchaymanta, hinallataq chay oramantan ichaqa, mana pipas yachanchu. Nitaqmi hanaq pachapi kashaq angelkunapas yachankuchu. Aswanpas sapan Yayallaymi yachan.
[37] Imaynan Noepa p'unchayninkunapi karqan, chay hinallataqmi Runaq Churinpa hamuyninpas kanqa.
[38] Noepa arkaman haykunan p'unchaykaman, manaraq ima parapas chayamusharqanchu. Hinan chay p'unchaykunapi mikhusharqanku, ukyasharqanku, kasarakusharqanku, hinallataq kasarakunankupaq rimaykusqa kasharqanku.
[39] Sinchi para chayamuspan, llapankuta millp'upunankamaqa, manan entienderqankuchu. Chay hinallataqmi, Runaq Churinpa hamuyninpas kallanqataq.
[40] Hinaqtinmi, iskay runakuna chakrapi kashanqaku. Hukninmi apasqa kanqa, huk kaqtaqmi ichaqa, saqesqa kanqa.
[41] Iskay warmikunan molinopi kutashanqaku. Hukninmi apasqa kanqa, huk kaqtaqmi ichaqa, saqesqa kanqa.
[42] Ima p'unchaytachus Señorniykichis hamunantaqa, manan yachankichischu. Chayrayku rikch'aspalla suyashaychis.
[43] Ichaqa, sichus wasiyoq wiraqocha imay orastachus suwaq hamunanta yachanman chayqa, rikch'ashaspallan suyanman. Hinan wasintaqa mana t'oqochinmanchu. Chayta yachaychis.
[44] Runaq Churinqa, mana yuyasqaykichis oraspin hamunqa. Chayrayku qankunaqa wakichisqallapuni kashaychis, nispa.
[45] Nillarqantaqmi: —¿Pitaq patronninpa wasinpi uywasqankunaman, tiemponpi mikhunata haywananpaq hunt'aq, hinallataq yuyaysapa churasqa kamachi kaqri?
[46] Sichus patronnin kutimuspa, kamachisqanman hina ruwashaqta tarinqa chayqa, chay kamachiqa kusisamiyoqmi.
[47] Cheqaqtan niykichis: ‘Patronninqa, llapan kaqninkunata qhawananpaqmi churapunqa,’ nispay.
[48] Ichaqa chay millay kamachi sonqonpi ninman: ‘Patronniyqa manan hamunmanraqchu,’ nispa.
[49] Hinaspataq kamachimasinkunata maqayta qallarinman, machaqkunawantaq mikhunmanpas, ukyanmanpas.
[50] Chay hina kaqtinqa, chay kamachiq patronninqa, mana suyasqan p'unchaypi, hinallataq mana yachasqan oraspin hamunqa.
[51] Hinan allinallintapuni kastigaykuspan, iskay-uyakunawan kuska kananpaq churanqa, chaypitaqmi waqaypas, kiru k'arkakichiypas kanqa, nispa.