[1] Diospa Churin Jesucristomanta allin willakuypa qallariyninqa kaymi.
[2] Imaynan Diospa rantinpi rimaqkuna qelqankupi qelqarqanku: ‘Qhawariy, ñawpaqeykitan willaqniyta kachamuni. Paymi ñawpaqeykipi ñanniykita allichanqa. (Mal. 3:1)
[3] Ch'inniqpin huk runa kunkayoqta waqyakun: “Señorpa hatun ñanninta allichaychis. Purinankunata siwkta ruwaychis,” nispan,’ nispa. (Isa. 40:3)
[4] Chayman hinan, Juanqa ch'inniqpi rikhurirqan, hinaspa bautisarqan. Paymi, yuyayman kutirikuy huk bautismomanta willakurqan. Chay bautismoqa, huchanku pampachasqa kananpaqmi karqan.
[5] Hinan llapan Judea probinsiamanta, hinallataq Jerusalén llaqtamanta llapan runakuna payta uyarinankupaq lloqsimurqanku. Huchankuta willakapuqtinkutaqmi, Juanqa Jordán mayupi llapankuta bautisarqan.
[6] Juanqa, kamelloq chukchanmanta p'achawanmi p'achakurqan. Qaramanta chumpiwantaqmi sinturanta chumpikurqan. Hinallataq langostatawan, k'ita wanqoyruq misk'intawanmi, mikhurqan.
[7] Hinan willarqan: —Ñoqamanta aswan atiyniyoq kaqmi qhepayta hamushan. Manan k'umuykuspa husut'anpa watullantapas paskanaypaq hinachu kani.
[8] Ñoqaqa unupin bautisarqaykichis. Paymi ichaqa, Santo Espirituwan bautisasunkichis, nispa.
[9] Haqay p'unchaykunapitaqmi kay hina karqan. Galilea probinsiapi Nazaret llaqtamantan Jesusqa chayamurqan. Hinan Juanqa Jordán mayupi payta bautisarqan.
[10] Kasqan ratu unumanta lloqsimushaspataq, Jesusqa hanaq pachata kicharikushaqta rikurqan. Espiritutataq palomata hina pay pataman uraykamushaqta rikullarqantaq.
[11] Hinan hanaq pachamanta huk kunka nimurqan: —Qanmi munakusqay Churiy kanki. Qanpin kusikuyniy kapuwan, nispa.
[12] Hinallamanmi Espirituqa, Jesusta ch'inniqman pusarikurqan.
[13] Hinan ch'inniqpi, tawa chunka p'unchay kamurqan. Chay p'unchaykunapitaqmi Satanasqa payta wateqarqan. Hinan phiña animalkunawan kamurqan. Angelkunataqmi payta serbirqanku.
[14] Juan, karselman wisq'asqa kasqan qhepatataqmi Jesusqa, Galilea probinsiaman rirqan. Diospa qhapaq suyunmanta allin willakuyta willaspanmi rirqan.
[15] Hinan Jesusqa nirqan: —Tiempoqa hunt'akunñan. Diospa qhapaq suyunpas qayllaykamunñan. Chayrayku yuyayman kutirikuychis, hinallataq allin willakuypipas iñiychis, nispa.
[16] Galilea qochaq kantunta rishaspantaq, Simonta, hinallataq wawqen Andrestawan rikurqan. Paykunaqa challwaqkunan karqanku. Chayraykun, qochaman challwana llikata wikch'uykusharqanku.
[17] Jesustaq paykunata nirqan: —Qhepayta qatikamuwaychis. Hinaspa runa challwaqkuna kanaykichiskama tukuchisaykichis, nispa.
[18] Kasqan ratutaq, challwana llikankuta saqerparispa, payta qatikurqanku.
[19] Jesusqa, asllatawan puririspataq, Zebedeoq churin kunata, Jakobota, hinallataq wawqen Juantawan rikurqan. Paykunaqa, barkankupin challwana llikankuta sursisharqanku.
[20] Kasqan ratutaqmi paykunatapas waqyarqan. Hinan paykunaqa, taytanku Zebedeota, llank'apakuqkunatawan barkapi saqerparirqanku. Hinan Jesusta qatikurqanku.
[21] Hinan Kapernaum llaqtaman haykurqanku. Sábado p'unchaykunapitaqmi Jesusqa, judío runakunaq huñukunanku wasiman haykuspa, yachachirqan.
[22] Manan kamachikuy simita yachachiqkuna hinachu, aswanpas kamachikuyniyoq kaywanmi yachachirqan. Chayraykun yachachikuyninmanta utirayarqanku.
[23] Chay ratupitaqmi, paykunaq huñukunanku wasipi qhelli supayniyoq huk runa kasharqan. Hinan payqa qaparirqan.
[24] Nirqantaq: —¡Yaw! Nazaret llaqtayoq Jesús, ¿imatan qanwan ñoqaykuwan ruwananchis? ¿Ñoqaykuta mana allinman churaqchu hamurqanki? Pichus kasqaykitaqa yachanin: ¡Qanqa Diospa Ch'uya akllasqanmi kanki! nispa.
[25] Jesustaq payta phiñarikurqan: —¡Upallay, hinaspa kay runamanta lloqsiy! nispa.
[26] Hinan qhelli supayqa chay runata sinchi millayta chhaphchikacharqan. Chaymantataq, qhelli supayqa kunkayoqta qaparispan, paymanta lloqsirqan.
[27] Hinan llapa runakunaq yuyayninkuman tapunakunankukamaraq manapuni kaberqanchu. Nirqankutaq: —¿Imataq kayri? ¿Ima mosoq kamachikuyniyoq yachachikuytaq kayri? ¡Qhelli supaykunapas paytaqa kasusqakumá! nispanku.
[28] Hinan tukuy cheqaspi, hinallataq llapan Galilea probinsiaq muyuriqnin suyuntinpiraq reqsichikuyninqa usqhayllata ch'eqerirqan.
[29] Judío runakunaq huñukunanku wasimantan Jakobowan, Juanpiwan lloqsimurqanku. Hinan Simonpa, hinallataq Andrespa tiyasqanku wasita rirqanku.
[30] Simonpa suegrantaqmi, puñunapi ruphapakuy onqoywan kasharqan. Chayaqtinku hinataq, onqosqa kasqanmanta Jesusman willarqanku.
[31] Jesustaq payman asuykurqan. Hinan makinmanta hap'iykuspa, onqosqata sayarichirqan. Kasqan ratupachataqmi ruphapakuy onqoyqa thanipurqan. Qhaliyaruspa hinataq, payqa paykunaman serbirqan.
[32] Inti haykuytataq rasphiyaykuytaña, llapa onqosqakunata, hinallataq supayniyoqkunatapas Jesusman pusamurqanku.
[33] Hinan llaqtantin runakuna punkuman huñukamurqanku.
[34] Hinaqtinmi Jesusqa, imaymana onqoywan askha onqosqakunata qhaliyachirqan. Hinan askha supaykunatapas qarqollarqantaq. Supaykuna Jesusta reqsisqankuraykutaqmi manapuni paykunataqa rimarichillarqanpaschu.
[35] Ancha tutallamantan, Jesusqa sayarirqan. Manaraq sut'imushaqtintaq, lloqsispan huk ch'inniq cheqasman rirqan. Chaypitaqmi Diosman parlasharqan.
[36] Hinan Simonqa, paywan kashaqkunapiwan Jesusta maskhaq rirqanku.
[37] Jesusta tarispankutaq nirqanku: —Tukuymi maskhashasunkiku, nispanku.
[38] Paykunatataq nirqan: —Diospa siminta willamunaypaqmi hamurqani. Chayrayku qaylla llaqtakunapipas willamunaypaq, haku huk cheqasman risunchis, nispa.
[39] Hinan Galilea probinsiantinpi, judío runakunaq huñukunanku wasipi Diospa siminta willarqan. Hinallataq supaykunatapas qarqorqan.
[40] Lepra onqoyniyoq huk runataqmi, Jesusman hamurqan. Hinan qonqoriykukuspa balikurqan: —Sichus munanki chayqa, qhaliyaykachiwaytaqa atinkin, nispa.
[41] Jesustaq payta khuyalliykukuspa, makinta haywarirqan. Llamiykuspantaq, onqosqa runata nirqan: —Munanin. Qhali kapuy, nispa.
[42] Jesuspa nisqanman hinataq, kasqan ratupacha, lepra onqoyninqa chay runamanta chinkarapurqan. Hinan qhali kapurqan.
[43] Chaymantataq Jesusqa, payta allin-allintapuni kamachispa kacharparipurqan.
[44] Nirqantaq: —Qhawariy, aman pimanpas imatapas qhaliyachisqa kasqaykimantaqa willakunkichu. Aswanpas, saserdoteman rispa, rikuchikamuy. Hinallataq Moisespa kamachikusqanman hina, chay ch'uyanchasqa kasqaykimanta sakrifisiota haywamuy. Hinan paykunapas chayta rikuspa yachanqaku, nispa.
[45] Chay runataqmi ichaqa, lloqsispan, anchatapuni willakuyta qallarirqan. Hinallataq tukuy imachus pasasqanta anchatapuni ch'eqerichirqan. Chayraykun Jesusqa, manaña alayritachu mayqen llaqtamanpas haykuyta atirqan. Aswanpas hawa ch'inniq cheqaskunapin kamurqan. Hinan tukuy cheqasmanta runakuna payman hamurqanku.