[1] Orqo patamantan Jesusqa uraykamusharqan. Hinan askha runakuna payta qatikamusharqanku.
[2] Chayllamanmi huk lepra onqoyniyoq runaqa chimpaykurqan. Jesuspa ñawpaqenpi qonqoriykukuspantaq nirqan: —Señor, sichus munanki chayqa, qhaliyaykachiwaytaqa atinkin, nispa.
[3] Jesustaq makinta haywarispa, llamiykurqan. Nirqantaq: —Munanin, qhaliyachisqa kay, nispa. Kasqan ratupachataqmi, lepra onqoyninqa chinkarparipurqan.
[4] Hinaqtinmi Jesusqa payta nirqan: —Qhawariy, aman pimanpas willankichu. Aswanpas rispa, saserdoteman qhawachikamuy. Runakunaq rikunankupaqtaq, Moisespa kamachikusqanman hina ofrendaykita churamuy, nispa.
[5] Kapernaum llaqtamanmi Jesusqa haykusharqan. Hinan huk senturión runaqa, payman qayllaykuspa balikurqan.
[6] Nirqantaq: —Señor, uywasqaymi such'uyaspa sinchi nanaywan wasiypi wikch'urayashan, nispa.
[7] Hinan Jesusqa payta nirqan: —Ñoqa rispay, qhaliyachimusaq, nispa.
[8] Senturión runataq, kutichispa nirqan: —Señor, manan wasiyman haykunaykipaq hinachu kani. Uywasqay qhaliyapunanpaqqa, rimariykullay. Hinan uywasqayqa qhali kapunqa.
[9] Ñoqapas kamachiqniyoqmi kani. Hinallataq ñoqa kikiypas soldadokunata kamachiqmi kani. Hinan huknin soldadoyta nini: ‘Hamuy,’ nispay, hinan payqa hamun. Huknintapas nillanitaq: ‘Rirqoy,’ nispay, hinan payqa rin. Kamachiytapas nillanitaq: ‘Kayta ruway, ‘ nispay, hinan payqa ruwan, nispa.
[10] Chay uyarisqantaqmi, Jesuspa yuyayninman mana kaberqanchu. Hinan qatikuqninkunata nirqan: —Cheqaqtan niykichis: ‘Manan Israel llaqtantinpipas kay hina iñiytaqa tarirqanichu,’ nispay.
[11] Nillaykichistaqmi: ‘Askhan inti lloqsimuy ladomanta, hinallataq inti haykuy ladomantapas hamunqaku. Hinan hanaq pacha qhapaq suyupi Abrahamwan, Isaakwan, Jakobwan ima tiyaykunqaku.
[12] Qhapaq suyu wawakunataqmi ichaqa, hawa laqha-tutayaqman wikch'usqa kanqaku. Chaypin waqaypas, kiru k'arkakichiypas kanqa,’ nispay, nispa.
[13] Hinaqtinmi Jesusqa, senturión runata nirqan: —Ripuy, iñisqaykiman hinataq ruwasqa kachun, nispa. Hinan uywasqanqa Jesuspa rimarisqan chay oraspi qhaliyasqa kapurqan.
[14] Jesusqa, Pedroq wasintan rirqan. Hinan Pedroq suegranta ruphapakuy onqoywan puñunapi kashaqta tarirqan.
[15] Makinmanta llamiykuqtintaq ruphapakuy onqoyqa thanipurqan. Sayarispantaqmi, Jesusman mikhunata serbiyta qallarirqan.
[16] Rasphiyaykushaqtinñataqmi, askha supayniyoqkunata Jesusman pusamurqanku. Hinan payqa, rimariyllanwan supaykunatapas qarqorqan, hinallataq llapan onqosqakunatapas qhaliyachirqan.
[17] Diospa rantinpi rimaq Isaiaspa nisqan hunt'akunanpaqmi chaykunataqa ruwarqan. Isaiasqa nirqanmi: ‘Paymi onqoyninchiskunata aparqan, hinallataq nanayninchiskunata q'epirqan,’ nispan. (Isa. 53:4)
[18] Jesusqa, askha runakunaq muyuykusqanta rikuspanmi, qochaq wak ladon chimpaman chimpanankupaq kamachikurqan.
[19] Kamachikuy simita yachachiqkunamanta huknintaq Jesusman asuykuspa nirqan: —Yachachikuq, maymanña rinki chaypas, qatikusaykipunin, nispa.
[20] Jesustaq payta nirqan: —Atoqkunaqpas mach'ayninkunaqa kanmi. Hinallataq phalaq animalkunaqpas q'esankuqa kanmi. Runaq Churinpan ichaqa, mana maypi umanta siriykuchinallanpaqpas kanchu, nispa.
[21] Huknin yachachisqantaq, Jesusta nirqan: —Señor, ñawpaqtaqa simiykimanta taytayta p'ampaqraq rirqosaq, nispa.
[22] Jesustaq ichaqa payta nirqan: —Qatikamuway, hina wañusqakunaqa ayankuta p'ampashachunku, nispa.
[23] Hinan Jesusqa, barkaman haykurqan. Yachachisqankunataqmi qatikurqanku.
[24] Hinan chayllaman, huk sinchi wayra qochapi hatarimurqan. Unu phuqchiytaq, barkataraq p'ampamusharqan. Jesustaqmi ichaqa, puñusharqan.
[25] Yachachisqankunataqmi Jesusman qayllaykuspa rikch'achirqanku. Nirqankutaq: —Señor, chinkaykapushanchisñan, qespichiwayku, nispanku.
[26] Hinan Jesusqa paykunata nirqan: —Pisi iñiyniyoq runakuna, ¿imanaqtintaq mancharisqari kashankichis? nispa. Hinaqtinmi Jesusqa sayarispa, wayratapas, qochatapas phiñarikurqan. Thanipuynintaqmi, may hatunpuni karqan.
[27] Runakunataq yuyayninkupi mana kabesqa kaspa nirqanku: ¿Wayraqpas, qochaqpas kasunankupaq, pitaq kay runari? nispanku.
[28] Qocha chimpa Gadara suyumanmi Jesusqa chayarqan. Hinan chayllaman supayniyoq iskay runakuna, aya p'ampana t'oqokunamanta Jesuswan tupaq lloqsimurqanku. Paykunaqa, sinchi phiñan karqanku. Chaymi chay ñannintaqa, manaña pipas puriyta atiqkuñachu.
[29] Hinan qonqaylla qaparirqanku: —¿Diospa Churin Jesús, iman qanwan ñoqaykuwan ruwananchis? ¿Manaraq tiemponpi ñak'arichiwanaykikupaqchu kayman hamurqanki? nispanku.
[30] Tropantin askha khuchikunataqmi paykunamanta karupiraq mikhusharqanku.
[31] Hinan supaykunaqa, Jesusta balikurqanku: —Sichus qarqowankiku chayqa, haqay tropantin khuchikunaman kachawayku, nispanku.
[32] Jesustaq nirqan: —Riychis, nispa. Supaykunataq, lloqsispanku chay tropantin khuchikunaman rirqanku. Chayllamanmi llapan tropantin khuchikunaqa, alto qaqamanta qochaman wikch'uykukurqanku, hinan unupi wañupurqanku.
[33] Khuchi michiqkunataqmi ichaqa, llaqtaman ayqekurqanku. Chay llaqtaman chayaspankutaq, tukuy imakunachus pasasqanta, hinallataq supayniyoq runakunamantapas willakurqanku.
[34] Hinan chayllaman llaqtantin runakuna Jesuswan tupaq lloqsimurqanku. Rikuruspankutaq, suyunkumanta ripunanpaq balikurqanku.