[1] Hinaqtinmi Jesusqa, chay askha runakunaman, hinallataq yachachisqankunaman rimaykurqan.
[2] Nirqantaq: —Kamachikuy simita yachachiqkunapas, fariseokunapas, Moisespa yachachinan tiyananpin tiyaykunku.
[3] Paykunaqa, yachachinkun, kikinkutaqmi ichaqa, mana ruwankuchu. Chayrayku, hinaña llapan nisqasunkichista kasukunkichis, hinallataq ruwankichis chaypas, ruwasqankuta hinaqa ama ruwaychischu.
[4] Llasa q'epita, hinallataq mana apay atina q'epikunatan q'epichikunku. Chay llasa q'epi kaqkunatan, runakunaman q'epichinku. Paykunataqmi ichaqa, mana dedollankuwanpas tupaykuyllatapas munankuchu.
[5] Aswanmi tukuy ima ruwasqankutapas, runakunaq rikunallankupaq ruwayta munanku. Paykunaqa, Diospa siminta apana qaramanta ruwasqa kajachankutan hatunyarachispa, watakunku, hinallataq p'achankuq kantuntapas hatuntaraq chhaqchacharunku.
[6] Mikhuna fiestakunapipas ñawpaqllapipunin tiyayta munanku. Hinallataq judío runakunaq huñukunanku wasikunapipas ñawpaq kaq tiyanakunallapipuni tiyayta munanku.
[7] Paykunaqa, ‘Rabí, Rabí,’ nispa, runakunaq sutiyanankuta, hinallataq plasakunapipas napaykusqa kaytapunin munanku.
[8] Qankunaq Yachachiqniykichisqa, ch'ullallan. Payqa Criston. Qankunataqmi ichaqa, llapaykichis wawqe-panantin kankichis. Chayrayku ama ‘Rabí,’ nispa sutiyasqachu kaychis.
[9] Hanaq pachapi kashaq Yayaykichisqa ch'ullallan. Chayrayku, ama kay pachapiqa pitapas, ‘Yayay,’ nispaqa sutiyankichischu.
[10] Yachachiqniykichis Cristoqa ch'ullallan. Chaymi, ama ‘yachachikuq,’ nispapas sutiyachikunkichischu.
[11] Pipas qankuna ukhupi hatunpaq qhawarisqa kaqqa, kamachiykichis kachun.
[12] Pipas hatunchakuqqa, huch'uyaykuchisqan kanqa. Huch'uyaykukuqtaqmi ichaqa, hatunchasqa kanqa.
[13] Mana qankunapas, nitaq runakunaq haykunankutapas, munasqaykichisraykun hanaq pacha qhapaq suyuman runakunaq haykunanta wisq'apunkichis. Chayrayku ¡ay qankunamanta, iskayuya kamachikuy simita yachachiqkuna, hinallataq fariseokuna, imaynaraq kankichis!
[14] Biudakunaq wasinkunatan q'arunkichis. Hinan unayta mañakuqraqtaq tukusqaykichishawa, hatun huchachayta chaskinkichis. Chayrayku ¡ay qankunamanta, iskay-uya kamachikuy simita yachachiqkuna, hinallataq fariseokuna, imaynaraq kankichis!
[15] Qankunaqa, qochanta hallp'antaraqmi ch'ulla runallata judío runaman t'ikrachinaykichispaq purinkichis. Judío runaman t'ikrarukuqtintaq, qankunamanta aswan iskay kuti infiernoq wawanmanraq tukurachinkichis. Chayrayku ¡ay qankunamanta iskay-uya kamachikuy simita yachachiqkuna, hinallataq fariseokuna, imaynaraq kankichis!
[16] ¡Ay qankunamanta runa pusaykachaq ñawsakuna, imaynaraq kankichis! Qankunaqa ninkichismi: ‘Pipas Dios yupaychana wasiq sutinpi huramentuta ruwan chayqa, manan imananpaschu. Ichaqa sichus chay Dios yupaychana wasipi kashaq qoriq sutinpi huramentuta ruwan chayqa, hunt'ananpunin,’ nispaykichis.
[17] ¡Mana yuyayniyoqkuna, hinallataq ñawsakunan kankichis! ¿Mayqentaq aswan balorniyori? ¿Qorichu, icha qorita ch'uyanchaq Dios yupaychana wasichu?
[18] Nillankichistaqmi: ‘Pipas altarpa sutinpi huran chayqa, manan imananpaschu. Sitaqchus altar patapi kashaq ofrendaq sutinpi huraqmi ichaqa, hunt'ananpuni,’ nispaykichis.
[19] ¡Mana yuyayniyoqkuna, hinallataq ñawsakunan, kankichis! ¿Mayqen kaqtaq aswan chaniyoqri? ¿Ofrendachu, icha ofrendata Diospaq ch'uyaman tukuchiq altarchu?
[20] Chayrayku pipas altarpa sutinpi huraqqa, altarpa sutinpi, hinallataq llapan chay patapi kaqkunaq sutinpi iman huran.
[21] Hinallataq pipas Dios yupaychana wasiq sutinpi huran chayqa, chay Dios yupaychana wasiq sutinpin huran. Hinallataq pichus chaypi tiyaqpa sutinpin hurallantaq.
[22] Hanaq pachaq sutinpi huraqpas, Diospa kamachikuq tiyananpa sutinpin huran. Hinallataq, pichus chay tiyanapi tiyashaqpa sutinpin hurallantaq.
[23] Qankunaqa, mentamanta, eneldomanta, hinallataq kominomantapachan diezmoykichistaqa churankichis. Diospa Kamachikuy Siminmanta aswan chaniyoq kaqtataqmi ichaqa, mana ruwankichischu. Chaykunataqmi kaykuna: Chanin kaypiwan, yanapaykuypiwan, iñiypiwan ima kanku. Mana chay diezmokuykunata saqespan, kay yanapakuykunataqa ruwanallaykichispuni karqan. Chayrayku, ¡ay qankunamanta, iskay-uya kamachikuy simita yachachiqkuna, hinallataq fariseokuna, imaynaraq kankichis!
[24] Runa pusaykachaq ñawsakuna, ukyanaykichisman ch'uspicha urmayuqtinqa suysunkichismi. Kamellotataq ichaqa, enteronllataraq millp'urunkichis.
[25] Qankunaqa basoqtapas, platoqtapas patallantan maqchhirunkichis. Ukhuykichispitaq ichaqa, suwakuykunawan, mana allin ruwaykunawan hunt'aykusqa kashankichis. Chayrayku, ¡ay qankunamanta iskay-uya kamachikuy simita yachachiqkuna, hinallataq fariseokuna, imaynaraq kankichis!
[26] ¡Ñawsa fariseo! Basoq, hinallataq platoq ukhuntaraq ñawpaqtaqa maqchhiy, chay hinapin patanpas llimphuyasqa kanqa.
[27] Qankunaqa, yuraq pintarusqa aya p'ampana t'oqomanmi rikch'akunkichis. Cheqaqmanta patallanmi sumaq rikch'akun, ukhuntaq ichaqa, aya tullukunawan, hinallataq imaymana qhellikunawan hunt'a kashan. Chayrayku, ¡ay qankunamanta iskay-uya kamachikuy simita yachachiqkuna, hinallataq fariseokuna, imaynaraq kankichis!
[28] Cheqapaq qankunapas chay hinallataqmi pataykichista chaninman rikch'akuqta runakunaman rikuchinkichis. Ukhuykichispitaq ichaqa, iskay-uya kaywan, hinallataq sinchi mana kamachikuy simipichu kaywan hunt'a kashankichis.
[29] ¡Ay qankunamanta iskay-uya kamachikuy simita yachachiqkuna, hinallataq fariseokuna, imaynaraq kankichis! Qankunaqa, Diospa rantinpi rimaqkunaq p'ampasqa kasqantan perqata hatarichinkichis. Hinallataq chanin ruwaq runakunaq rikch'ayninpa kasqan saywakunatapas t'ikachankichis.
[30] Ninkichistaq: ‘Sichus machulanchiskunaq kawsasqan p'unchaykunapi kawsasunman karqan chayqa, manan Diospa rantinpi rimaqkunata wañuchiqkunaqmasinchu kasunman karqan,’ nispaykichis.
[31] Chay hinapin qankuna, kikiykichispa kontraykichispi chay Diospa rantinpi rimaqkunata wañuchiqkunaq wawankuna kasqaykichista willakunkichis.
[32] ¡Qankunapas machulaykichiskunaq chay ruway qallarisqankutayá hunt'apaychis!
[33] ¡Mach'aqwaykunan kankichis! ¡Benenoyoq mach'aqwaymanta miramuqkunan kankichis! ¿Nina yawray infiernoman huchachasqa kanaykichismantari, imaynatataq ayqekunkichis?
[34] Chayrayku qhawariychis, Diospa rantinpi rimaqkunata, yachayniyoqkunata, hinallataq kamachikuy simita yachachiqkunatan qankunaman kachamuykichis. Paykunatataqmi, hukkunata wañuchinkichis, hukkunatataq chakatankichis. Wakintataq, judío runakunaq huñukunanku wasikunapi hasut'inkichis, hinallataq llaqtan-llaqtanta qatiykachankichis.
[35] Chay hina kaqtinmi, hallp'a pachantinpi llapan chanin runakunaq yawarnin hich'asqaykichisqa, qankunaq pataykichisman hamunqa. Chay yawarqa chanin Abelpa yawarninmantapacha, Berequiaspa churin Zakariaspa yawarninkama kaqmi. Zakariastaqa, ch'uya cheqaspa, hinallataq altarpa qayllanpin wañuchirqankichis.
[36] Cheqaqtan niykichis: ‘Lliw kaykunamantan kay p'unchay runa-mirayqa, huchachasqa kanqa,’ nispay, nispa.
[37] Jesusqa nillarqantaqmi: —¡Jerusalén, Jerusalén llaqta, Diospa rantinpi rimaqkunatan wañuchishallankipuni. Hinallataqmi qanman kachamusqa kaqkunatapas rumiwan ch'aqeshallankipuni! ¡Hayk'a kutitan wawaykikunata huñuykuyta munarqani! Imaynan wallpapas chiwchinkunata raphran ukhuman huñuykun, chay hinatan huñuykuyta munarqani. Qankunataq ichaqa, mana munarqankichischu.
[38] Qhawariychis, wasiykichispas ch'usaqmanmi tukuchisqa kanqa.
[39] Niykichismi: ‘Kunanmantapachan: “Señorpa sutinpi hamuq saminchasqa kachun,” nispa ninaykichiskama, manaña aswantapas rikuwankichisñachu,’ nispay. nispa. (Sal. 118:26)