[1] Jesusmi paykunaman kutichispa, wakmanta rikch'anachiypi rimaykullarqantaq.
[2] Nirqantaq: —Hanaq pacha qhapaq suyuqa, kasarakuy fiestata churinpaq wakichiq huk reymanmi rikch'akun.
[3] Hinan kamachinkunata kasarakuyman waqyasqakunata pusamunankupaq kacharqan. Waqyasqakunataq ichaqa, mana hamuyta munarqankuchu.
[4] Wakmantan wak kamachinkunatapas kachaspa nillarqantaq: ‘Kasarakuyman waqyasqakunata nimuychis: “Qhawariychis, mikhunaytaqa wakichiniñan. Toroykunatapas, wirayachisqa uywaykunatapas ñak'achiniñan, llapantaqmi wakichisqaña kashan. Kasarakuy fiestaman hamuychis,” nispaykichis,’ nispa.
[5] Waqyasqakunataq ichaqa, mana kasukuspanku, huknin chakraman, huknintaq qhatunanman pasakurqanku.
[6] Wakinkunañataq reypa kamachinkunata hap'ispanku, p'enqayta maqaspa wañuchirqanku.
[7] Reytaq phiñakurqan. Hinan ejersitunkunata kachaspan, chay runa wañuchiqkunata wañuchichimurqan. Hinallataq llaqtankutapas ninawan kanaykachimurqan.
[8] Hinaqtinmi kamachinkunata nirqan: ‘Cheqaqtapunin kasarakuy fiestaqa wakichisqaña kashan. Fiestaman waqyasqakunataq ichaqa, mana haykunankupaq hinachu karqanku.
[9] Chay hinaqa, ñan t'aqarikuykunaman riychis, hinaspa hayk'an tarimusqaykichista kasarakuy fiestaman waqyamuychis,’ nispa.
[10] Chay kamachikunataq, ñan patakunaman rispanku, hayk'an tarimusqankuta, allinkunatapas, mana allinkunatapas huñuruspa pusamurqanku. Hinan kasarakuy fiestaqa waqyasqakunaq hunt'aykusqan karqan.
[11] Kasarakuy fiestaman waqyasqakunata qhawaq rey haykumuspantaq ichaqa, chaypi mana kasarakuy fiesta p'achawan p'achasqa huk runata rikurqan.
[12] Hinan reyqa nirqan: ‘Amigoy, ¿imaynapitaq kasarakuy fiesta p'achawan mana p'achasqa kashaspayki, kaymanri haykumurqanki?’ nispa. Paytaq ichaqa, mana rimarirqanchu.
[13] Reytaq serbiqkunata nirqan: “Chakinkunata, makinkunatawan t'eqeychis. Hinaspataq hawa tutayaqman wikch'umuychis,” nispan. Chaypitaqmi, waqaypas, kiru k'arkakichiypas kanqa, nispa.
[14] Askhan waqyasqakunaqa kanku. Ichaqa, pisillataqmi akllasqakunaqa kanku.’ nispa.
[15] Hinaqtinmi fariseokunaqa, kutipuspanku, Jesusta ima rimasqallanpipas pantarusqanta hap'irqonankupaq rimanakamurqanku.
[16] Chaymantataq fariseokunaqa, yachachisqanku runakunata, hinallataq Herodes t'aqamanta kaqkunatawan Jesusta tapumunankupaq kacharqanku: —Yachachikuq, manan runakunaq rikch'aynintachu qhawanki. Chayraykun mana llullakuspa rimaq kasqaykitapas, hinallataq mana pitapas mancharikuspa cheqaq kaywan Diospa ñanninta yachachiq kasqaykitapas yachayku.
[17] Chay hinaqa, ¿imaynataq rikch'akusunki? ¿Rey Cesarman tributo qolqe pagayniyku allinchu, icha manachu? Chayta niykuwayku, nispanku.
[18] Jesustaq ichaqa, paykunaq chay mana allin yuyayninkuta yachaspa, nirqan:S —Iskay-uyakuna, ¿imanaqtintaq wateqawankichisri?
[19] Chay tributo pagana qolqeta qhawachiwaychis, nispa. Paykunataq, huk denario qolqeta qorqanku.
[20] Hinaqtinmi Jesusqa paykunata nirqan: —¿Piqpa rikch'aynintaq, hinallataq piqpa sutintaq kay qolqepiri qelqasqa kashan? nispa.
[21] Paykunataq nirqanku: —Rey Cesarpan, nispanku. Hinaqtinmi Jesusqa, paykunata nirqan: —Chay hinaqa, Cesarpa kaqta Cesarman qopuychis. Hinallataq Diospa kaqtapas Diosman qopuychis, nispa.
[22] Chayta uyarispankutaq, muspharisqa kasharqanku. Hinan Jesusta saqespa, ripurqanku.
[23] Chay p'unchaymi wakin saduseokunaqa, manan kawsarimpuy kanchu niqkuna, Jesusman asuykuspanku tapurqanku.
[24] Nirqankutaq: —Yachachikuq, Moisesmi nirqan: ‘Pipas mana mirayninta saqespa wañukapun chayqa, wawqenmi chay warminwan kasarakunqa, hinaspataq wawqenpa mirayninta hatarichinqa,’ nispa.
[25] Ñoqayku ukhupin qanchis wawqekuna karqanku. Ñawpaq kaqmi kasarakurqan, hinamantataq wañukapurqan, manataq wawan karqanchu. Hinan wawqenman warminta saqerqan.
[26] Chay hinallataqmi, iskay kaqwanpas, chay hinallataq kinsa kaqwanpas, qanchis wawqentinwanpas mana wawanku karqanpunichu.
[27] Llapankuq qhepankutataqmi, warmipas wañukapullarqantaq.
[28] Qanchisnintinpa warminmi karqan. Chayrayku, ¿kawsarimpuy p'unchaypiri, mayqenninkuq warmintaq kanqa? nispanku.
[29] Hinaqtinmi Jesusqa, paykunaman kutichispa nirqan: —Qelqakunataqa manan yachankichischu, nitaq Diospa atiynintapas reqsinkichischu, chaymi pantankichis.
[30] Kawsarimpuy p'unchaypiqa, manan kasarakuypas, nitaq kasarachiypas kanqañachu, aswanpas hanaq pachapi kashaq angelkuna hinallañan kanqaku, nispa.
[31] Ichaqa wañusqakunaq kawsarimpunanmanta, Diospa nisqanta, ¿manachu ñawincharqankichis?
[32] Diosqa nirqanmi: ‘Ñoqan Abrahampa, Isaakpa, hinallataq Jakobpa Diosninqa kani,’ nispan. (Éxo. 3:6) Diosqa manan wañusqakunaq Diosninchu, aswanpas kawsashaqkunaq Diosninmi, nispa.
[33] Chayta uyarispankutaqmi, chay askha runakunaqa yachachikuyninmanta sinchi utirayasqa kasharqanku.
[34] Hinaqtinmi fariseokunaqa, saduseokunata Jesuspa upallachisqanta uyarispanku, ch'ulla runa hinalla huñunakurqanku.
[35] Paykunamanta hukninkutaq, kamachikuy simita sut'inchaq karqan. Paymi Jesusta wateqananpaq tapurqan.
[36] Nirqantaq: —¿Yachachikuq, Kamachikuy Simipi aswan ancha chaniyoq kaq kamachikuyri mayqen kaqtaq? nispan.
[37] Jesustaq payta nirqan: —Kamachikuy Simi qelqaqa ninmi: ‘Señor Diosniykitan tukuy sonqoykiwan, tukuy almaykiwan, tukuy yuyayniykipiwan ima munakunki,’ nispan. (Deut. 6:5)
[38] Ñawpaq kaq, hinallataq aswan ancha chaniyoq kamachikuyqa chaymi.
[39] Iskay kaq kamachikuypas, chay hinallataqmi. Chay kamachikuytaqmi nin: ‘Runamasiykitan qan kikiykita hinapuni munakunki,’ nispa. (Leb. 19:18)
[40] Llapan Kamachikuy Simi qelqapas, hinallataq Diospa rantinpi rimaqkunaq qelqankupas, chay iskaynin kamachikuypin hukllachasqa kashan, nispa.
[41] Fariseokuna huñunasqa kashaqtinkutaq, Jesusqa paykunata tapurqan.
[42] Nirqantaq: —¿Cristomantari, imaninkichistaq? ¿Piqpa churinmi ninkichistaq? nispan. Paykunataq nirqanku: —Payqa Davidpa Churinmi, nispanku.
[43] Jesustaq paykunata nirqan: —¿Chay hinari, imaynatataq Davidqa, Espírituq yuyaychasqan kaspa, ‘Señorniy,’ nispa, sutiyarqan?
[44] Davidqa nirqanmi: ‘Señormi, Señorniyta nirqan: “Awqaykikunata chakiykiq pachanman churanaykama, paña ladoypi tiyaykuy,” nispan, nispa. (Sal. 110:1)
[45] Chay hinaqa, ¿Davidtaq ‘Señorniy,’ nispa sutiyan chayri, imaynatataq churinri kanman? nispa.
[46] Hinan mana pipas ima simillatapas kutichiyta atirqanchu. Nitaqmi pipas chay p'unchaymantapacha tapuyta munarqanñachu.