[1] Fariseokunapiwan, saduseokunapiwanmi Jesusman asuykurqanku. Hinan wateqanankupaq, hanaq pachamanta huk señalta rikuchinanpaq mañarqanku.
[2] Jesustaq ichaqa, kutichispa nirqan: —Inti haykuytan qankunaqa ninkichis: ‘Antawaramushanmi, chayrankun, allin tiempo kanqa,’ nispaykichis.
[3] Tutaymantantaqmi ninkichis: ‘Yana phuyun antawaramushan, chayraykun paranqa,’ nispaykichis. ¡Iskay-uyakuna! Tiempoq imaynachus kanantaqa waputamá reparankichis, kay p'unchaykunapi señalkunatataq ichaqa, mana reparankichischu.
[4] Kay mana allin, hinallataq wasanchaq runa-mirayqa señaltan mañawan. Ichaqa manataqmi señaltaqa qosqachu kanqa. Aswanpas Diospa rantinpi rimaq Jonasmanta señalmi qosqa kanqa, nispa. Hinan paykunata saqerparispa ripurqan.
[5] Jesuspa yachachisqankunaqa, qocha chimpamanmi chayasharqanku. Hinan t'anta apakuyta qonqakusqaku karqan.
[6] Jesustaq paykunata nirqan: —Fariseokunaq, hinallataq saduseokunaq lebadurankumanta, qhawakuychis, hinallataq kuidakuychis, nispa.
[7] Yachachisqankunataq paykunapurapi churanakuspa ninakurqanku: —T'antata mana apakamusqanchisraykun kaytaqa nishawanchis, nispanku.
[8] Jesustaq ichaqa, paykunapurapi churanakusqankuta reparaspa nirqan: —Pisi iñiyniyoq runakuna, ¿mana t'antaykichis kasqanraykuchu qankunapurapi churanakushankichis?
[9] ¿Phisqa t'antallamanta, phisqa waranqa runakunaman mikhuchiqtiy, hayk'a kanastakunatachus huñunpusqaykichista manachu entiendinkichis, hinallataq yuyankichispas?
[10] ¿Manallataqchu qanchis t'antallamanta tawa waranqa runakunaman mikhuchiqtiy hayk'a hatun kanastakunatachus huñunpusqaykichistapas yuyallankichistaq?
[11] Manan t'antamantachu nirqaykichis. Aswanpas fariseokunaq, hinallataq saduseokunaq lebadurankumanta waqaychakunaykichispaqmi nirqaykichisqa. ¿Imaynataq mana chaytari entiendirqankichischu? nispa.
[12] Hinaqtinmi mana t'antaq lebaduranmantachu, aswanpas fariseokunaq, hinallataq saduseokunaq yachachikuyninkumanta waqaychakunankupaq Jesuspa nisqanta, entiendirqanku.
[13] Cesarea Felipo llaqtaq suyuman chayaspantaq, Jesusqa yachachisqankunata tapurqan. Nirqantaq: —¿Runakunari, Runaq Churin pi kasqantataq ninku? nispan.
[14] Yachachisqankunataqmi nirqanku: —Wakin runakunan bautisaq Juanmi ninku, wakintaq Eliasmi ninku, wakinkunañataq Jeremiasmi otaq Diospa rantinpi rimaqkunamanta hukninmi ninku, nispanku.
[15] Paykunatataq nirqan: —¿Qankunari, ñoqa pi kasqaytataq ninkichis? nispa.
[16] Simón Pedrotaq kutichispan nirqan: —Qanqa, kawsaq Diospa Churin Cristopunin kanki, nispa.
[17] Hinaqtinmi Jesusqa, kutichispan payta nirqan: —Manan chaytaqa aychayoq, yawarniyoq runachu sut'incharqasunki. Aswanpas hanaq pachapi kashaq Yayaymi chaytaqa sut'incharqasunki. Chayraykun, Jonaspa churin Simón, kusisamiyoq kanki, nispa.
[18] Ñoqapas nillaykitaqmi: ‘Qanqa Pedron kanki. Kay qaqa patapitaqmi, iñiq t'aqayta hatarichisaq. Hinan iñiq t'aqaytaqa, Hadespa punkunkunapas mana atipanqachu.
[19] Qanmantaqmi hanaq pacha qhapaq suyuq llabenta qosayki. Lliw kay pachapi watasqaykiqa, hanaq pachapipas watasqañan kanqa. Hinallataq hallp'a pachapi paskasqaykipas, hanaq pachapiqa paskasqañan kanqa,’ nispay, nispa.
[20] Hinaqtinmi yachachisqankunata kamachirqan: —Aman pimanpas ñoqa Jesús, Cristopuni kasqaytaqa rimarinkichischu, nispan.
[21] Chaymantapachan, Jesusqa yachachisqankunaman sut'inchayta qallarispa nirqan: —Jerusalén llaqtamanqa rinaypunin. Hinan kurak runakunaqpas, umalliq saserdotekunaqpas, kamachikuy simita yachachiqkunaqpas, sinchi ñak'arichisqan kasaq. Hinan wañuchiwanqaku. Kinsa p'unchaymantataqmi ichaqa, kawsarimpusaq, nispa.
[22] Hinaqtinmi Pedroqa, huk ladoman pusarispan, Jesusta anyaykuyta qallarirqan. Nirqantaq: —Señor, qan kikiykita khuyapayakuy. ¡Amapuni kayqa imaynallanmantapas kasunkichu! nispan.
[23] Jesustaq ichaqa, Pedroman kutirispa nirqan: —Qanqa, manan Diospa kaqninkunapichu yuyaymananki. Aswanpas runakunaq kaqninkunallapin yuyaymananki. Chayrayku, ¡Satanás, ñawpaqeymanta anchhuriy! Laq'achiwaqniymi kanki, nispa.
[24] Hinaqtinmi Jesusqa, yachachisqankunata nirqan: —Sichus pipas ñoqaq qhepayta hamuyta munan chayqa, pay kikinta mananchakuchun. Krusninta apayukuspantaq, qhepayta qatikamuwachun.
[25] Pipas kawsayninta qespichiyta munaqqa, kawsaynintan chinkachinqa. Pipas ñoqarayku kawsayninta chinkachiqtaqmi ichaqa, kawsayninta tarikapunqa.
[26] Huk runachus kay pachantintaña tarinman, ichaqa kawsaynintataq chinkachipunman chayqa, ¿chay runapaqri imapaqtaq balenman? Hinallataq ¿imatataq runari kawsayninta rantipapunanpaq qonman?
[27] Runaq Churinqa, Yayanpa k'anchariyninpin angelninkunawan hamunqa. Hinan sapankankuman, imachus ruwasqankuman hina pagapunqa.
[28] Cheqaqtan niykichis: ‘Kaypi, kashaqkunamanta wakinniykichismi, Runaq Churinta qhapaq suyunpi hamushaqta rikunaykichiskama mana wañunkichisraqchu,’ nispay.