[1] Jesusqa nillarqantaqmi: —Hinaqtinmi chunka donsella sipaskuna lamparankuta hap'ispanku, kasarakuq qharita chaskinankupaq lloqsimurqanku. Chaymanmi, hanaq pacha qhapaq suyuqa rikch'akun.
[2] Paykunamantan phisqa yuyaysapakuna, phisqataq mana yuyayniyoqkuna karqanku.
[3] Mana yuyayniyoqkunaqa, lamparankuta hap'ispankun, mana aseitita apakurqankuchu.
[4] Yuyaysapa sipaskunataq ichaqa, lamparankuman hich'akunankupaq aseitita apakurqanku.
[5] Kasarakuq qhari mana rikhurimuqtintaq, llapanku puñuywan aysachikuspanku puñurapurqanku.
[6] Kuska tutatataq waqyakuqta uyarirqanku: ‘¡Qhawariychis, kasarakuq qhariqa kaypiñan. Payta chaskinaykichispaq lloqsimuychis!’ nispa.
[7] Hinaqtinmi llapan chay donsella sipaskunaqa, sayarispanku lamparankuta wakichikurqanku.
[8] Mana yuyayniyoqkunataq, yuyaysapakunata nirqanku: ‘Lamparaykun mana k'anchanñachu, chayrayku aseitiykichista qoykuwayku,’ nispanku.
[9] Yuyaysapakunataq ichaqa, kutichispa nirqanku: ‘Qankunatapas, hinallataq ñoqaykutapas mana pisiwananchispaq bendiqkunaman aswan riychis. Hinaspataq qankuna kikiykichispaq rantikamuychis,’ nispanku.
[10] Paykuna rantikuq rishanankukamataq, kasarakuq qhariqa chayamurqan. Wakichisqakunataq paywan kasarakuy fiestaman haykurqanku. Hinan punkuqa wisq'asqa kapurqan.
[11] Chaymantataq, wakin donsella sipaskunapas kutimuspa, nirqanku: ‘Señor, Señor punkuta kicharimuwayku,’ nispanku.
[12] Kasarakuq qharitaq ichaqa, kutichispan nirqan: ‘Cheqaqtan niykichis: “Manan reqsiykichischu,” nispay,’ nispa.
[13] Ima p'unchaytachus, hinallataq ima orastachus Runaq Churin hamunantaqa manan yachankichischu. Chayrayku rikch'aspalla suyashaychis, nispa.
[14] Nillarqantaqmi: —Hanaq pacha qhapaq suyuqa, huk runa karu llaqtaman puriripunanpaq, kamachinkunata waqyachimuspan, kaqninkunata rakiqmanmi rikch'akun.
[15] Hukninmanmi phisqa talento qolqeta qorqan. Huk kaqmantaq iskay talento qolqeta, huk kaqmanñataq huk talento qolqeta qorqan. Sapanka hukmanmi llank'ay atisqanman hina qorqan. Hinaspataq karu llaqtata ripurqan.
[16] Chay phisqa talento qolqe chaskiqqa, ripuspanmi chay chaskisqan qolqewan llank'aspa, wak phisqa talento qolqetawan ganamurqan.
[17] Hinallataq iskay talento qolqe chaskiqpas, wak iskaytawan ganamullarqantaq.
[18] Huk talento qolqellata chaskiqtaqmi ichaqa, ripuspa, pampata t'oqorqan. Hinan patronninmanta qolqe chaskisqanta chaypi pakarurqan.
[19] Unay tiempomantañataq, chay kamachikunaq patronninkuqa, kutimurqan. Hinan paykunawan kuentata ruwarqan.
[20] Phisqa talento qolqe chaskiq qayllaykamuspantaqmi, wak phisqa talento qolqetawan apamurqan. Hinan nirqan: ‘Patronniy, phisqa talento qolqetan qowarqanki. Kayqá wak phisqa talento qolqetawanmi ganaramuni,’ nispan.
[21] Patronnintaqmi payta nirqan: ‘Hunt'aq, hinallataq allin kamachi, kusapunin. Pisi llank'anallapipas hunt'aqpunin kasqanki. Chaymi kunanqa hatun llank'anaman churasayki. Patronniykiq q'ochukuyninman haykumuy,’ nispa.
[22] Iskay talento qolqe chaskiqpas, qayllaykamuspa nillarqantaq: ‘Patronniy, iskay talento qolqetan qowarqanki, kayqá wak iskay talento qolqetawanmi ganaramuni,’ nispa.
[23] Patronnintaqmi payta nirqan: ‘Hunt'aq, hinallataq allin kamachi, kusapunin. Pisi llank'anallapipas hunt'aqpunin kasqanki. Chaymi kunanqa hatun llank'anaman churasayki. Patronniykiq q'ochukuyninman haykumuy,’ nispa.
[24] Huk talento qolqe chaskiqtaq ichaqa, qayllaykamuspa nirqan: ‘Patronniy, mana tarpusqaykimanta kosechaq, hinallataq mana t'akasqaykimanta ichhuq, sinchi millay runa kasqaykitaqa reqsiykin.
[25] Chaymi manchakuspay, talento qolqeykitaqa kutipuspay, pampaman pakamurqani. Qolqeykiqa kaymi kashan,’ nispa.
[26] Patronnintaq kutichispa, payta nirqan: ‘¡Mana allin, hinallataq qella kamachi! Mana tarpusqaymanta kosechaq, hinallataq mana t'akasqaymanta ichhuq kasqaytapas yacharqankin.
[27] Chayrayku, bankopi llank'aqkunaman qolqeytaqa qowaq karqan. Ñoqa kutimuspaytaq, wachaynintinta chaskikapuyman karqan.
[28] Chay hinaqa, chay talento qolqeta qechupuychis. Hinaspataq chunka talento qolqeyoqman qopuychis.
[29] Hayk'an kaqniyoqmanqa qosqan kanqa. Hinan askha kaqniyoqraq kapunqa. Mana kaqniyoqmantataqmi ichaqa, ima kaqnillanpas qechusqa kanqa.
[30] Hinallataq, chay mana baleq kamachita hawa laqhatutayaqman wikch'upuychis. Chaypin waqaypas, kiru k'arkakichiypas kanqa,’ nispa.
[31] Nillarqantaqmi: —Runaq Churin k'anchariyninpi llapan ch'uya angelninkunawan hamuspanmi, k'ancharishaq kamachikunan tiyananpi tiyaykunqa.
[32] Llapan suyu runakunataq, paypa ñawpaqenman huñumusqa kanqaku. Hinan payqa, iskay ladoman, imaynan michiqqa obehakunata kabrakunamanta t'aqan, chay hinata wakinkunamanta hukkunata t'aqanqa.
[33] Hinan obehakunata paña ladonman, kabrakunatataq lloq'e ladonman churanqa.
[34] Reytaqmi, paña ladonpi kaqkunata ninqa: ‘Yayaypa saminchasqankuna, kay pachaq qallariyninmantapacharaq qankunapaq wakichisqa qhapaq suyuman haykuychis.
[35] Yarqasqan kasharqani, mikhuchiwarqankichistaqmi. Ch'akisqan kasharqani, ukyachiwarqankichistaqmi. Mana llaqtayoqmi purisharqani, qorpachawarqankichistaqmi.
[36] Mana p'achayoqmi kasharqani, p'achachiwarqankichistaqmi. Onqosqa, hinallataq karselpin kasharqani, watukamuwarqankichistaqmi, ’ nispa.
[37] Hinaqtinmi, chanin runakunaqa kutichiwanqaku: ‘Señor, ¿hayk'aqtaq yarqasqata rikuspari, mikhuchirqaykiku? Otaq, ¿ch'akisqata rikuspapas ukyachirqaykikuri?
[38] ¿Hayk'aqtaq mana llaqtayoqta rikuspari, qorpacharqaykiku? Otaq, ¿mana p'achayoqta rikuspa p'achachirqaykikuri?
[39] ¿Hayk'aqtaq onqosqata, hinallataq karselpipas rikuspari, watukuq hamurqaykiku?’ nispanku.
[40] Reytaqmi paykunaman kutichispa ninqa: ‘Cheqaqtan niykichis: “Kay aswan huch'uylla wawqeykunamanta hukninkupaq ruwaspaykichisqa, ñoqapaqmi ruwarqankichis,” nispay,’ nispa.
[41] Hinaqtinmi lloq'e ladonpi kaqkunata nillanqataq: ‘Saqrapaq, hinallataq angelninkunapaqwan wakichisqa wiñay nina yawrayman ñakasqakuna, ñoqamanta t'aqakuychis.
[42] Yarqasqa kashaqtiymi, mana mikhuchiwarqankichischu. Hinallataq ch'akisqa kashaqtiypas, manan ukyachiwarqankichischu.
[43] Mana llaqtayoq kashaqtiymi, mana qorpachawarqankichischu. Mana p'achayoq kashaqtiymi mana p'achachiwarqankichischu. Onqosqa, hinallataq karselpi kashaqtiypas, manallataqmi watukamuwarqankichispaschu’ nispan.
[44] Hinaqtinmi paykunaqa, kutichispa ninqaku: ‘Señor, ¿hayk'aqtaq yarqasqatapas, ch'akisqatapas, mana llaqtayoqtapas, mana p'achayoqtapas, onqosqatapas, karselpipas rikurqaykikuri, hinaspataq mana serbirqaykikuchu?’ nispanku.
[45] Hinan Reyqa, paykunaman kutichispa ninqa: ‘Cheqaqtan niykichis: “Kay aswan huch'uylla kaqkunapaq mana ruwaspaykichisqa, manallataqmi ñoqapaqpas ruwarqankichischu,” nispay,’ nispa.
[46] Hinan paykunaqa, wiñay ñak'ariyman rinqaku. Chanin kaqkunataq ichaqa, wiñay kawsayman rinqaku, nispa.