[1] Jerusalén llaqtaman qayllaykushaspankutaqmi, Betfagé llaqta qayllapi kashaq Olibos orqoq kasqanman chayarqanku. Hinan Jesusqa, iskay yachachisqankunata kacharqan.
[2] Nirqantaq: —Chimpaykichis, llaqta kantuta riychis. Chaypin huk watasqa china asnota chaywan kashaq huk asnochatawan tarimunkichis. Paskaruspaykichistaq aysaramuychis.
[3] Sitaqchus pipas imanispapas nisunkichis chayqa, ninkichis: ‘Señormi nesesitashan, chaymantaqa kutirachimpullasunkin,’ nispaykichis, nispa.
[4] Tukuy chaykunaqa, Diospa rantinpi rimaqpa nisqan hunt'akunanpaqmi pasarqan.
[5] Payqa nirqanmi: ‘Sión llaqtaq ususinta nimuychis: “Qhawariychis, Reyniykin qanman hamushan. (Isa. 62:11) Llamp'ulla huk asnopi sillaykusqa, hinallataq huk asnocha patapi sillaykusqa hamushan. Chay asñochaqa, karga apaq uywaq uñanmi,” nispaykichis,’ nispa. (Zak. 9:9)
[6] Hinan yachachisqankunaqa rispanku, imaynatachus Jesuspa kamachisqanman hina ruwarqanku.
[7] Hinan chay china asnotaqa, uñantinta aysamurqanku. Chay asnokunaq patanmantaq p'achankuwan karunaykurqanku. Hinan chay patapi Jesusqa sillaykukurqan.
[8] Chay ancha askha runakunataqmi, ñan pataman p'achankuta mast'arqanku. Wakinkunañataqmi ichaqa, mallkikunaq k'allmankunata wit'umuspanku ñan pataman mast'allarqankutaq.
[9] Chay askha runakunataq Jesuspa ñawpaqenta riqkunapas, hinallataq qhepanta qatikuqkunapas qaparispa, nirqanku: —!Hosanna Davidpa Churinman kachun! ¡Señorpa sutinpi hamuqqa, saminchasqa kachun! (Sal. 118:26) ¡Hosanna hanaq pachapipas kachun! nispanku.
[10] Jerusalén llaqtaman Jesús haykuqtintaq, llaqtantin runakuna ch'aqwaraspa tapunakurqanku. Nirqankutaq: —¿Pitaq kay runari? nispanku.
[11] Chay askha runakunataqmi nirqanku: —Kayqa, Diospa rantinpi rimaq Galilea probinsiapi Nazaret llaqtamanta Jesusmi, nispanku.
[12] Dios yupaychana wasimanmi Jesusqa haykurqan. Hinan Diospa wasinpi llapan qhatuqkunatapas, rantiqkunatapas hawaman qarqorqan. Hinallataq qolqe kambiaqkunaq mesankutapas, paloma bendiqkunaq sillankutapas t'ikrarparirqan.
[13] Hinan paykunata nirqan: —Qelqasqan kashan: ‘Wasiyqa Diosman parlana wasi sutichasqan kanqa,’ nispa. (Isa. 56:7) Qankunataq ichaqa, suwakunaq mach'ayninman tukurachisqankichis, nispa. (Jer. 7:11)
[14] Jesusmantaqmi, ñawsakunapas, wist'ukunapas, Dios yupaychana wasipi kashaqtin hamurqanku. Paytaqmi qhaliyachirqan.
[15] Jesusmi musphana ruwaykunata ruwarqan. Hinan Dios yupaychana wasipi wawakunaqa qaparispa, nirqanku: —!Hosanna Davidpa Churinman kachun! nispanku. Chayta rikuspankutaqmi ichaqa, umalliq saserdotekunapiwan, kamachikuy simita yachachiqkunapiwan, sinchita phiñakurqaku.
[16] Hinaspataq Jesusta nirqanku: —¿Kay wawakunaq imanispachus nisqankuta uyarishankichu? nispanku. Hinan Jesusqa paykunata nirqan: —Arí. ¿Manachu hayk'aqpas Qelqaq nisqanta ñawincharqankichis? Qelqaqa ninmi: ‘Wawakunaq siminmanta, hinallataq ñuñuq wawakunamantan Dios yupaychana takita wakichirqanki,’ nispan, nispa. (Sal. 8:2)
[17] Paykunata saqerparispantaqmi, chay llaqtamanta lloqsipuspa, Betania llaqtaman ripurqan. Hinan chaypi qorpachakurqan.
[18] Jerusalén llaqtaman tutamantan kutimushaspantaq, Jesusqa yarqachikurqan.
[19] Ñan qayllapi huk igos sach'ata rikuspantaq, chay sach'aman asuykurqan. Ichaqa manan imatapas chay sach'apiqa tarirqanchu. Aswanpas rap'ikunallatan tarirqan. Hinan sach'ata nirqan: —Manapunin hayk'aqpas rurunkiñachu, nispa. Igos sach'ataqmi usqhayllaman ch'akirqapurqan.
[20] Chayta rikuspankutaqmi, yachachisqankunaqa yuyayninkuman mana kabesqa kaspa nirqanku: —¿Imaynataq kay igos sach'ari usqhayllaman ch'akirqapun? nispanku.
[21] Jesustaq kutichispan, paykunata nirqan: —Cheqaqtan niykichis: ‘Iñiyniykichischus kanman, amataq iskayrayawaqchischu chayqa, manan kay igos sach'awan ruwasqallaytachu ruwawaqchis. Aswanpas kay orqota niwaqchis: “Achhuriy, hinaspa qochaman wikch'uykukuy,” nispaykichis chayqa, wikch'uykukunmanmi,’ nispay.
[22] Tukuy iñiywan Diosman parlaspa mañakusqaykichistataqmi, chaskiwaqchis, nispa.
[23] Jesustaq, Dios yupaychana wasiman hamurqan. Hinan chaypi yachachishaqtin, umalliq saserdotekunapiwan, llaqta umalliq runakunapiwan Jesusman asuykuspanku, payta nirqanku: —¿Ima kamachikuywantaq kay imaymanakunatari ruwanki? ¿Pitaq chay kamachikuyniyoq kaytari qorqasunki? nispanku.
[24] Hinaqtinmi Jesusqa, kutichispa paykunata nirqan: —Ñoqapas hukta tapullasqaykichistaq. Kutichiwankichischus chayqa, ñoqapas ima kamachikuyniyoq kaywanchus chay imaymanakunata ruwani, chayta nillasqaykichistaq.
[25] ¿Maymantataq Juanpa bautismonri karqan? ¿Hanaq pachamantachu, ichari runakunallamantachu karqan? nispa. Hinan paykunaqa, paykunapurapi yuyaymanaspa nirqanku: ‘Hanaq pachamanta nisunchis chayqa, ¿imanaqtintaq paytari mana kreerqankichischu? nispachá niwasunchis.
[26] Llapa runakunan Juantaqa Diospa rantinpi rimaqpuni kasqanta hap'inku. Chayrayku, sichus nisunchis: ‘Runakunallamantan hamun,’ nispa chayqa, llaqta runakunawanqa imaraqchá kanman,’ nispanku.
[27] Kutichispankutaq, Jesusta nirqanku: —Manan yachaykuchu, nispanku. Hinan Jesusqa paykunata nillarqantaq: —Ñoqapas manallataqmi ima kamachikuywanchus kay imaymanakuna ruwasqayta nisqaykichischu, nispa.
[28] Jesusqa nillarqantaqmi: —¿Imaynataq rikch'akusunkichis? Huk runan, iskay churiyoq karqan. Hinan kurak kaqman asuykuspan nirqan: ‘Waway, kunan p'unchay ubas chakrapi llank'aq riy,’ nispa.
[29] Kutichispantaq, churinqa nirqan: ‘Manan riymanchu,’ nispan. Chaymanta yuyayman kutirikuspantaq ichaqa, rirqan.
[30] Huk kaq churinman asuykuspanpas, kasqallantataq nirqan. Churintaq ichaqa, kutichirqan: ‘Arí, papay, ñoqaqa risaqmi,’ nispa. Ichaqa, manataqmi rirqanchu.
[31] ¿Iskayninmantari, mayqen kaqtaq taytanpa munayninta ruwarqan? nispa. Hinan paykunaqa nirqanku: —Kurak kaqmi, nispanku. Jesustaq paykunata nirqan: —Cheqaqtan niykichis: ‘Tributo qolqe kobraqkunapas, qhellipi puriq warmikunapas, qankunaq ñawpaqeykichistaraqmi Diospa qhapaq suyunmanqa rishanku,’ nispay.
[32] Juanqa, chanin kaq ñanta qankunaman reqsichinasunkichispaqmi hamurqan. Manataqmi payta kreerqankichischu. Qankunaqa rikusharqankichisña chaypas, manapunin kreenaykichispaq yuyayman kutirikurqan kichischu. Tributo qolqe kobraqkunapiwan, qhellipi puriq warmikunapiwantaqmi ichaqa, kreerqanku, nispa.
[33] Wak rikch'anachiytapas uyarillawaychistaq: —Wasiyoq huk wiraqochan, chakrayoq karqan. Paymi, chay chakranman ubasta tarpurqan. Kanchawantaq muyurachirqan, hinallataq ubas saruna t'oqotapas t'oqorqan. Chakra qhawana torretapas ruwarqan. Llank'aqkunaman arrendaspantaq, karu llaqtata ripurqan.
[34] Kosechana tiempo chayamuqtintaq ichaqa, chay llank'aqkunamanta chakraq rurusqanta chaskimunankupaq kamachinkunata kacharqan.
[35] Llank'aqkunataq chay wiraqochaq kamachinkunata hap'ispanku hukninta k'irirqanku, huk kaqtataq wañuchirqanku, huk kaqtañataq rumiwan ch'aqerqanku.
[36] Chakrayoqqa, wakmantan wak kamachinkunata ñawpaq kachasqanmantaqa aswan askhata kachallarqantaq. Chay llank'aqkunataqmi kasqallantapuni ruwarqanku.
[37] Chaymanta tukukuypiñataq ichaqa, llank'aqkunaman churinta kacharqan: ‘Churiytaqa respetaykunqakupunin,’ nispan.
[38] Llank'aqkuna churinta rikuruspankutaq ichaqa, paykunapurapi rimanakurqanku: ‘Kayqa taytanpa kaqnin chaskiqmi. Hamuychis wañurachisunchis, hinaspa taytanpa kaqninmanta tupaqninta hap'ikapusunchis,’ nispanku.
[39] Hap'ispankutaq ubas chakramanta horqorqanku. Hinan payta wañuchirqanku.
[40] ¿Chakrayoq wiraqocha hamuspanri, imatataq chay llank'aqkunawan ruwanqa? nispa.
[41] Chayta uyariqkunataq, Jesusta nirqanku: —Chay millay runakunataqa, mana khuyapayakuywanmi wañuchipunqa. Chay ubas chakrantataqmi wak llank'aqkunaman, pikunachus tiemponpi chakraq rurusqanta pagapunankupaq kaqkunaman arrendapunqa, nispanku.
[42] Jesustaq paykunata nirqan: —¿Manachu hayk'aqpas Qelqakunatari ñawincharqankichis? Qelqaqa ninmi: ‘Perqaqkunaq wikch'upusqanku rumin, eskina hap'iq teqsi-rumi kapurqan. Señortaqmi kaykunataqa ruwarqan. Ñoqanchispa ñawinchiskunapaqtaqmi, ancha musphana,’ nispan. (Sal. 118:22-23)
[43] Chayraykun niykichis: —Diospa qhapaq suyunqa qankunamanta qechusqan kanqa. Hinan Diospa qhapaq suyunqa, ruruchiq llaqtaman qosqa kapunqa, nispay.
[44] Hinallataqmi, pillapas chay rumi pataman urmaqqa, p'akisqan kanqa. Piqpa patanmanpas chay rumi urmaykuspantaqmi ichaqa, ñut'urapunqa, nispa.
[45] Chay rikch'anachiy siminkunata uyarispankutaqmi, umalliq saserdotekunapiwan, fariseokunapiwan, paykunamanta rimashasqanta entienderqanku.
[46] Llaqta runakunaqa, Diospa rantinpi rimaqta hinapuni Jesusta hap'irqanku. Chayraykun, imaynanmantapas hap'irqoytapuni munasharqanku. Ichaqa, llaqta runakunatataqmi, manchakusharqanku.