[1] Chay p'unchaykunapin, tetrarka Herodesqa, Jesusmanta rimayta uyarirqan.
[2] Hinan uywasqankunata nirqan: —Chayqa Bautisaq Juanmi, wañusqakunamantan kawsariramun. Chayraykun payqa, ancha atiywan ruwaykunata ruwan, nispa.
[3] Herodesqa, wawqen Felipeq warminhawan, Juanta hap'ichimuspan kadenawan watachispa, karselman wisq'achimurqan.
[4] Juanmi Herodesta nisqa karqan: —Manan allinchu Herodiaswan tiyasqaykiqa, nispa.
[5] Juantaqa, Diospa rantinpi rimaqta hinapunin runakunaqa hap'irqanku. Chayraykun Herodesqa, llaqta runakunata manchakusqanhawa, wañuchiytapuni munashaspapas mana atirqanchu.
[6] Ichaqa Herodespa wata hunt'akuynin fiesta kashaqtinmi, Herodiaspa ususin chawpinkuman haykuspa tusurqan. Hinan chay tususqanwan Herodespa sonqonta suwarqan.
[7] Chaymi payqa, tukuy ima mañakusqantapas qonanpaq huramentowan prometirqan.
[8] Sipastaq, mamanpa yachachisqanta hina nirqan: —Bautisaq Juanpa umanta, huk qhata puruñapi kunan qoway, nispa.
[9] Hinaqtinmi rey Herodesqa llakikurqan. Ichaqa mesapi tiyaqmasinkunaq sipasman hurasqanta uyarisqankuhawataq, chay mañakusqanta qonanpaq kamachikurqan.
[10] Hinan karselman kachaspan, Juanpa umanta qhoruchimurqan.
[11] Hinaspataq, Juanpa umanta huk qhata puruñapi apamuspa, sipasman qorqanku. Sipastaq mamanman aparqan.
[12] Hinaqtinmi Juanpa yachachisqankunaqa, chayamuspanku Juanpa ayanta apaspa p'ampampurqanku. Chaymantataq Jesusman willaq rirqanku.
[13] Chayta uyarispantaqmi Jesusqa, chay cheqasmanta barkapi huk ch'inniq cheqasman t'aqarikapurqan. Hinan askha runakunaqa, chayta uyarispanku wakin llaqtakunamanta imaraq chakillapi qatikurqanku.
[14] Jesustaq barkamanta lloqsispan, chay ancha askha runakunata rikurqan. Hinan paykunamanta khuyalliykukurqan. Chay runakuna ukhupi onqosqa kashaqkunatataqmi qhaliyachirqan.
[15] Tardeyaykushaqtinñataqmi, Jesuspa yachachisqankunaqa payman asuykuspa nirqanku: —Kay cheqasqa ch'inmi, tardeñataq kanpas. Llaqta kantukunaman rispanku, imallatapas rantikamuspa mikhunankupaq runakunata kacharparipullayña, nispanku.
[16] Jesustaq ichaqa paykunata nirqan: —Runakunaqa manan ripunankupunichu, qankuna mikhunataqa qoychis, nispa.
[17] Yachachisqankunataqmi nirqanku: —Manan kaypiqa imaykupas kanchu. Aswanpas phisqa t'anta, hinallataq iskay challwakunallapiwanmi kashan, nispanku.
[18] Jesustaq paykunata nirqan: —Kayman apamuwaychis, nispa.
[19] Hinaspataqmi askha runakunata q'achu-q'achupi tiyanankupaq kamachirqan. Phisqantin t'antatawan, iskaynin challwatawan hap'ispantaq, hanaq pachata qhawarispan, saminchaykurqan. T'antata phakmispantaq, yachachisqankunaman qorqan. Hinan paykunaqa, runakunaman rakimurqanku.
[20] Llapallankutaqmi saksata mikhuykurqanku. Phakmisqamanta puchuqkunatataqmi ichaqa, chunka iskayniyoq kanastakunapi hunt'ata huñunpurqanku.
[21] Hinan mikhuqkunaqa, yaqa phisqa waranqa qharikuna karqanku. Warmikunawan, wawakunawantaqmi ichaqa, mana yupasqachu karqanku.
[22] Chaymantataqmi, Jesusqa barkaman haykuspa, paypa ñawpaqenta qocha chimpaman rinankupaq, yachachisqankunata kamachirqan. Chaykamataqmi payqa, askha runakunata despedipusharqan.
[23] Askha runakunata despedipusqan qhepatataqmi, sapaqllapi Diosman parlananpaq, orqoman wicharqan. Tutayay- kapuqtintaq, sapallan chaypi kasharqan.
[24] Wayra, barkaq ñawpaqenmanta wayramushasqanraykutaqmi, barkaqa, unu phoqchiypa apaykachasqan kaspa, qocha chawpipiña kasharqan.
[25] Yaqa pacha illarimuytañataqmi Jesusqa, yachachisqankunaman unu patanta purispa hamurqan.
[26] Hinan yachachisqankunaqa, Jesusta unu patanta purishaqta rikuruspanku, mancharikuymanta qaparirqanku: —¡Kukuchi! nispanku.
[27] Chayllamanmi Jesusqa, yachachisqankunata rimaykurqan: —¡Kallpachakuychis, ñoqan kani, ama mancharikuychischu! nispan.
[28] Hinaqtinmi Pedroqa, Jesusman kutichispa nirqan: —Señor, sichus qan kanki chayqa, ñoqapas unu patanta qanman hamunaypaq kamachiway, nispa.
[29] Jesustaq nirqan: —¡Hamuy! nispa. Hinan Pedroqa, barkamanta uraykuspan, unu patanta purispa Jesuspa kasqanman risharqan.
[30] Sinchi wayraq wayramusqanta rikuspantaqmi ichaqa, mancharikurqan. Hinan unuman chinkaykuyta qallarirqan. Qaparispantaq nirqan: —¡Señor qespichiway! nispan.
[31] Kasqan ratupachataqmi, Jesusqa makinta haywarirqan. Hinan Pedrota hap'iykuspa nirqan: —Pisi iñiyniyoq runa, ¿imanaqtintaq iskayrayankiri? nispa.
[32] Paykuna barkaman wicharapuqtinkutaq, wayraqa thanipurqan.
[33] Hinaqtinmi barkapi kashaqkunaqa asuykuspa Jesusta yupaycharqanku. Nirqankutaq: —Cheqaqtapunin qanqa Diospa Churin kanki, nispanku.
[34] Qochata chimpaspankutaq, wak lado chimpa Genesaret suyuman chayarqanku.
[35] Chaypi tiyaqkunataq, Jesusta reqsiruspanku, chay llapa muyuriqnintin suyukunaman willachimurqanku. Hinan llapan onqosqakunata, Jesusman apamurqanku.
[36] Hinaspataq p'achanpa kantullantapas llamiykuchinanpaq Jesusta balikurqanku. Llapallan p'achanpa kantunta llamiykuqkunataqmi, qhali kapurqanku.