[1] Haqay p'unchaykunapitaqmi, bautisaq Juanqa Judea cheqas ch'inniqpi willakuspa rikhurimurqan.
[2] Nirqantaq: —Hanaq pacha qhapaq suyun sispaykamunña. Chayrayku yuyayman kutirikuychis, nispa.
[3] Pimantachus Diospa rantinpi rimaq Isaiaspa rimasqanqa kaymi. Isaiasqa nirqanmi: ‘Ch'inniqpin huk runa kunkayoqta waqyakun: “Señorpa ñanninta allichaychis, Purinankunatapas siwkta ruwaychis,” nispan,’ nispa. (Isa. 40:3)
[4] Juanqa, kamelloq chukchanmanta p'achawanmi p'achakurqan. Uywaq qaranmanta chumpiwantaq sinturantapas chumpikurqan. Hinallataq langostata, k'ita wanqoyroq misk'intawan ima mikhurqan.
[5] Hinan Jerusalén llaqtamantawan, llapan Judea probinsiamantawan, llapan Jordán mayuq muyuriqnintinmantawan, Juanpa kasqanman lloqsimurqanku.
[6] Huchankuta willakapusqankuman hinataqmi, Jordán mayupi, Juanpa bautisasqan karqanku.
[7] Askha fariseokuna, hinallataq saduseokunan, Juanpa bautisasqan cheqasman hamurqanku. Chayta rikuspanmi, Juanqa paykunata nirqan: —¡Machaqway miraykuna! ¿Hamuq k'arak phiñakuymanta ayqenaykichistari, pitaq yachachirqasunkichis?
[8] Yuyayman kutirikusqaykichis ruruykunata rikuchikuychis.
[9] Amataq sonqoykichis ukhupi niychischu: ‘Abrahamqa taytanchismi kapuwanchis,’ nispaqa. Ñoqan ichaqa, niykichis: ‘Diosqa Abrahampaq wawakunataqa kay rumikunamantapas hatarichiyta atinmi,’ nispay.
[10] Chaymantapas ñan hachaqa mallkiq saphinpi churasqaña kashan. Chayrayku, llapa mana allin ruruq mallkiqa wit'usqa kanqa. Hinaspataq ninaman wikch'uykusqa kanqa.
[11] Yuyayman kutirikunaykichispaqmi, ñoqaqa cheqapaq unupi bautisaykichis. Qhepayta hamuqpatan ichaqa, mana husut'allantapas apanaypaq hinachu kani. Payqa ñoqamanta aswan atiyniyoqmi. Paymi Santo Espiritupi, ninapi, ima bautisasunkichis.
[12] Trigo wayrachinanpas makinpiñan kashan. Hinan llapan erata pichanqa. Trigontataq taqeman waqaychapunqa. Pajantataq ichaqa, mana thasnuy atina ninapi ruphachipunqa.
[13] Hinaqtinmi Jesusqa, Juanpa bautisasqan kananpaq, Galilea probisiamanta, Jordán mayuman, maypichus Juanpa kashasqan cheqasman chayarqan.
[14] Juantaq ichaqa, payta hark'akuspa mana munarqanchu. Nirqantaq: —¿Ñoqa qanpa bautisasqayki kanay kashaqtinchu, ‘bautisaway,’ nispa niwanki? nispan.
[15] Jesustaqmi ichaqa, payman kutichirqan: ―Tukuy chanin kaqtan hunt'ananchispuni. Chayrayku, kunan bautisallaway, nispa. Hinaqtinmi Juanqa, Jesusta manaña hark'akurqanñachu.
[16] Jesuspa bautisakusqan qhepatataq unumanta lloqsimushaqtin, chay kasqan ratupi hanaq pacha kicharikurqan. Hinan chayllaman Diospa Espiritunta, palomata hina paypa patanman uraykamushaqta rikurqan.
[17] Chayllamanmi, huk kunka hanaq pachamanta kay hina nimushaq uyarikurqan: —Munasqay Churiyqa kaymi. Paypin anchatapuni kusikuni, nispa.