[1] Jesusqa, chunka iskayniyoq yachachisqankunatan kamachiyta tukurqan. Hinan yachachisqankunaq llaqtankupi yachachimunanpaq, hinallataq allin willakuyta willamunanpaq chaymanta ripurqan.
[2] Juantaqmi ichaqa, karselpi kashaspan, Cristoq ruwasqankunamanta uyarirqan. Hinan Cristota tapumunankupaq, iskay yachachisqankunata payman kacharqan.
[3] Tapumurqankutaqmi: —¿Pichus hamunan karqan chaychu qan kanki, ichari huktachu suyasaqku? nispanku.
[4] Jesustaq paykunaman kutichispa nirqan: —Rispaykichis, Juanman imaymanakuna uyarisqaykichista, hinallataq imaymanakuna rikusqaykichista willamuychis.
[5] Ñawsakunan qhawarinku, such'ukunataq puririnku, lepra onqoyniyoqkunan qhaliyapunku, roqt'okunataq uyarinku, wañusqakunapas kawsarimpunku, hinallataq wakchakunamanpas allin willakuyqa willasqañan kashan.
[6] Hinallataq ñoqapi mana misk'ay tariqqa kusisamiyoqmi, nispa.
[7] Paykuna ripushanankukamataqmi, Jesusqa chay askha runakunaman Juanmanta rimayta qallarirqan. Nirqantaq: —¿Ch'inniqmanri, ima qhawaqtaq lloqsirqankichis? ¿Wayraq maywiykachasqan soqosta qhawaqchu, lloqsirqankichis?
[8] Otaq, ¿ima qhawaqtaq lloqsirqankichisri? ¿Sumaq p'achawan p'acharusqa runata qhawaqchu lloqsirqankichis? Qhawariychis, sumaq p'achawan p'acharusqakunaqa, reykunaq wasinkupin kashanku.
[9] Ichaqa, ¿ima qhawaqpunitaq lloqsirqankichisri? ¿Diospa rantinpi rimaqta qhawaqchu lloqsirqankichis? ¡Arí! Niykichismi: ‘Payqa Diospa rantinpi rimaqmantapas aswan hatunpaq qhawarisqapunin,’ nispay.
[10] Haqay pimantachus qelqasqa kashan chayqa paymi. Qelqaqa nintaqmi: ‘Qhawariy, qanpa ñawpaqeykitan willaqniyta kachani, Paymi ñawpaqeykipi ñanniykita allichanqa,’ nispan. (Mal. 3:1)
[11] Cheqaqtan niykichis: ‘Warmimanta naseqkunapurapiqa, manan ch'ullallapas Bautisaq Juanmanta aswan allinqa hatarirqanchu. Hanaq pacha qhapaq suyupin ichaqa, aswan huch'uylla kaq, paymanta aswan allin kanqa,’ nispay.
[12] Bautisaq Juanpa p'unchayninkunamanta kunankaman, hanaq pacha qhapaq suyuqa, sinchi millay mana allinkunaq ñak'arichisqan kashan. Hinallataq millay runakunapas sinchi kallpawan qhapaq suyuta qechushanku.
[13] Llapan Diospa rantinpi rimaqkunapas, Kamachikuy Simipas, Juankamallan profetisarqanku.
[14] Ichaqa sichus chaskiyta munankichis chayqa, pichus hamunan karqan chay Eliasqa paymi.
[15] Pipas uyariq ninriyoq kan chayqa, uyarichun.
[16] Ichaqa, ¿imawantaq kay runa-miraykunatari rikch'anachisaq? Plasakunapi puriqmasinkunawan waqyanakuspa tiyaq waynachakunamanmi rikch'akunku.
[17] Kay hinatataqmi, waqyakunkuqa: ‘Qenatan tukapurqaykiku, manataq tusurqankichischu. Hinallataq aya p'ampanapaq takikunatan takimpurqaykiku, manataq khuyaytaqa waqapakurqankichischu,’ nispanku.
[18] Juanmi hamurqan. Payqa manan mikhurqanpaschu, nitaq ukyarqanpaschu. Hinan nirqanku: ‘Supayniyoqmi kashan,’ nispanku.
[19] Runaq Churintaqmi hamurqan. Hinan payqa mikhunpas, ukyanpas. Hinan ninku: ‘Qhawariychis, kay runaqa rakrapu runan, hinallataq binotapas ukyanmi. Tributo qolqe kobraqkunaqpas, huchasapakunaqpas amigonmi,’ nispanku. Yachaypa wawankunataqmi ichaqa, yachayqa chanin kasqanta rikuchinku,’ nispa.
[20] Chay hinaqa, may llaqtakunapichus askha ancha atiywan ruwaykunata ruwasqa karqan. Chay llaqtakunaq mana yuyayman kutirikusqankuraykun, Jesusqa phiñarikuyta qallarirqan.
[21] Kay hinatataqmi phiñarikurqan: —¡Ay qanmanta, Korazín llaqta! Hinallataq, ¡ay qanmanta Betsaida llaqta! Qankunapin ancha atiywan ruwaykunata ruwarqani. Sichus Tiro, hinallataq Sidón llaqtakunapi chay ancha atiywan ruwaykunata ruwayman karqan chayqa, maypachañan luto p'achawan churakuspanku, hinallataq usphawan hach'ikuspa yuyayman kutirikunkuman karqan.
[22] Chayraykun niykichis: ‘Qankunamantaqa Tiro llaqtapas, Sidón llaqtapas taripay p'unchaypiqa pisi muchuchisqallan kanqaku,’ nispay.
[23] Kapernaum llaqta, qanpin ancha atiywan ruwaykunata ruwarqani. Sichus Sodoma llaqtapi chay ancha atiywan ruwaykunata ruwayman karqan chayqa, kunan p'unchaykaman kashanman karqan. Chayrayku Kapernaum llaqta, ¿qanri, hanaq pachakamaraqchu hoqarisqa kanki? ¡Manan! Aswanpas Hadeskamaraqmi wikch'uykusqa kanki.
[24] Ichaqa niykichismi: ‘Taripay p'unchaypiqa, Sodoma llaqtamantapas aswantaraqmi qanqa muchuchisqa kanki,’ nispay, nispan.
[25] Chay tiempokunapitaqmi Jesusqa, kutichispa nirqan: —Yayay, kay imaymanakunataqa, yachaysapakunamantawan, allin yuyayniyoqkunamantawanmi pakarqanki. Wawakunamantaqmi ichaqa, rikuchirqanki. Chaymi Yayay, hanaq pachaqpas, kay pachaqpas Señornin, qanta yupaychayki.
[26] Arí Yayay, chay hinatapunin munarqanki.
[27] Tukuy imaymanakunatan Yayayqa hap'ichiwarqan. Manataqmi pipas Churitaqa reqsinchu, aswanpas Yayallan reqsin. Nitaqmi Yayataqa pipas reqsinchu, aswanpas Churillan reqsin. Hinan pimanchus Churi reqsichiyta munan, paykunallamanmi reqsichin.
[28] Llapan sayk'usqakuna, hinallataq q'episapakuna ñoqaman hamuychis. Ñoqataqmi samaykuchisaykichis.
[29] Yuguyta q'epiychis. Hinaspataq samp'alla kasqaymanta, hinallataq huch'uyaykukuq sonqoyoq kasqaymanta yachaqakuychis. Hinan almaykichispaq samakuyta tarinkichis.
[30] Yuguyqa ch'usallan, hinallataq q'epiypas manan llasanchu, nispa.