[1] Hinaqtinmi Jesusqa, saqraq wateqasqan kananpaq, ch'inniqman Espírituq pusasqan karqan.
[2] Hinan payqa, tawa chunka p'unchayta, hinallataq tawa chunka tutata ayunarqan. Chay qhepatataq yarqachikurqan.
[3] Hinan wateqaqqa chimpaykuspa, payta nirqan: —Sichus Diospa Churin kanki chayqa, kay rumikunata t'antaman tukunanpaq niy, nispa.
[4] Jesustaq kutichispa nirqan: —Qelqasqan kashan: ‘Manan t'antallawanchu runaqa kawsanqa. Aswanpas Diospa siminmanta lloqsimuq llapan simikunawanmi kawsanqa,’ nispa. (Deut. 8:3)
[5] Hinaqtinmi saqraqa, ch'uya llaqtaman Jesusta aparqan. Dios yupaychana wasiq kantun patapitaq sayaykuchirqan.
[6] Hinan saqraqa Jesusta nirqan: —Sichus Diospa Churin kanki chayqa, urayman, wikch'uykukuy. Qelqasqan kashan: ‘Angelninkunatan qanpa kasqaykiman kamachimunqa. Hinan chakiykita mana rumiman takakunaykipaq makinkupi hap'isunkiku, nispan,’ nispa. (Sal. 91:11-12)
[7] Jesustaq, payman kutichispa nirqan: —Qelqasqallataqmi kashan: ‘Aman Señor Diosniykitaqa wateqankichu,’ nispa. (Deut. 6:16)
[8] Wakmantan saqraqa, ancha alto orqo pataman Jesusta apallarqantaq. Hinaspan kay pachaq lliw qhapaq kaynintawan, hatun kaynintawan qhawarichirqan.
[9] Hinan saqraqa payta nirqan: —Sichus ñawpaqeypi qonqoriykukuspa yupaychawanki chayqa, tukuy kay imaymanakunatan qosayki, nispa.
[10] Hinaqtinmi Jesusqa payta nirqan: Satanás, qayllaymanta anchhuriy. —Qelqasqan kashan: ‘Señor Diosllaykitan yupaychanki, Pay sapallantataqmi serbinkipas,’ nispan, nispa. (Deut. 6:13)
[11] Hinan saqraqa payta saqepurqan. Chayllamanmi, angelkuna hamuspanku, Jesusta serbirqanku.
[12] Juanpa preso kashasqanta uyarispantaqmi, Jesusqa Galilea probinsiaman kutipurqan.
[13] Nazaret llaqtata saqepuspantaqmi, Zabulón suyuq, hinallataq Neftalí suyuq kantun qochapata Kapernaum llaqtapi tiyapurqan.
[14] Diospa rantinpi rimaq Isaiaspa nisqan hunt'akunanpaqmi chaytaqa ruwarqan.
[15] Isaiasqa nirqanmi: ‘Zabulonpa suyun, Neftalipa suyun, Jordán mayuq wak ladonpi lamar qochaman riq ñan, Mana-judío runakunaq tiyanan Galilea probinsia, uyariychis.
[16] Laqha-tutayaqllapi tiyaq llaqtan hatun k'anchayta rikun. Chay suyukunapi, wañuy llanthu ukhupi tiyaqkunamantaqmi, k'anchayqa k'anchariykun,’ nispa. (Isa. 9:1)
[17] Chaymantapachan, Jesusqa kay hinata nispan willayta qallarirqan: —Hanaq pacha qhapaq suyun sispaykamunña. Chayrayku yuyayman kutirikuychis, nispan.
[18] Galilea qochaq kantunta pasashaspanmi, Jesusqa iskay runakunata, Pedro sutiwan sutichasqa Simontawan, wawqen Andrestawan rikurqan. Paykunaqa, wawqentinmi karqanku. Hinallataq, challwaqkunan karqanku. Chaymi challwana llikankuta qochaman wikch'uykusharqanku.
[19] Jesustaq paykunata nirqan: —Qhepayta qatikamuwaychis, hinan runakuna challwaq kanaykichispaq ruwasaykichis, nispa.
[20] Hinaqtinmi paykunaqa, kasqan ratupacha challwana llikankuta saqerparispa qatikurqanku.
[21] Chaymanta aswanta rispantaq, wak iskay runakunata rikullarqantaq. Paykunapas wawqentinmi kallarqankutaq. Paykunaqa, Zebedeoq churin Jakobo, hinallataq wawqen Juanpiwan iman karqanku. Barkapin, taytanku Zebedeopiwan challwana llikankuta sursisharqanku. Hinan Jesusqa, paykunata waqyarqan.
[22] Kasqan ratupachataqmi, paykunaqa barkatawan, taytankutawan saqerparispanku qatikurqanku.
[23] Hinan Jesusqa, llapan Galilea probinsiantinta, judío runakunaq huñukunanku wasikunapi qhapaq suyumanta allin willakuyta willaspa purirqan. Hinallataq llapan onqosqakunatapas, nanayniyoqkunatapas qhaliyachirqan.
[24] Reqsichikuynintaqmi tukuy Siria suyuntinpi ch'eqerirqan. Hinan imaymana onqoyniyoqkunata, nanaypa ñak'arichisqankunata, supayniyoqkunata, yuyay chinkayniyoqkunata, mana kuyuriq such'ukunata Jesusman apamurqanku. Paytaqmi llapankuta qhaliyachirqan.
[25] Askha runakunataqmi, Galilea probinsiamanta, Dekápolis probinsiamanta, Jerusalén llaqtamanta, Judea probinsiamanta, Jordán mayuq wak ladonkunamanta ima qatikurqanku.