[1] Chay ratupitaqmi, yachachisqankunaqa Jesusman asuykuspa nirqanku: —¿Hanaq pacha qhapaq suyupiqa, pitaq aswan allin kaqri kanqa? nispanku.
[2] Hinan Jesusqa, huk wawata waqyaspa paykunaq chawpinkupi sayaykuchirqan.
[3] Hinan paykunata nirqan: —Cheqaqtan niykichis: ‘Manachus kay wawa hina huch'uyaykukunkichis, hinallataq wawa hina kankichis chayqa, manapunin hayk'aqpas hanaq pacha qhapaq suyumanqa haykunkichischu,’ nispay.
[4] Chay hinaqa, pichus kay wawa hina huch'uyaykukuqmi, hanaq pacha qhapaq suyupiqa, aswan allin kaqqa.
[5] Hinallataq pipas ñoqaq sutiypi, kay wawata hina, huk wawata chaskiqqa, ñoqatan chaskiwan.
[6] Nillarqantaqmi: —Pillapas ñoqapi iñiq kay huch'uykunamanta hukninta misk'achiqpaqqa, kunkanman huk hatun molino rumita watarukuspan mama-qochaq ukhunman chinkaykapuyninmi, aswan allinqa kanman.
[7] ¡Ay kay pachapi misk'achiqkunamanta! Kay pachapi misk'achiqqa kananpunin, ichaqa ¡ay haqay piqpa chawpintachus misk'akuy hamun, chay runamanta, imaynaraq kanqa!
[8] Chay hinaqa, sichus makiyki, otaq chakiyki misk'achisunki chayqa, wit'uruspa wikch'upuy. Iskaynin makiyoq, otaq iskaynin chakiyoq kashaspa wiñay nina yawrayman wikch'uykusqa kanaykimantaqa, mana makiyoq, otaq mana chakiyoq kawsayman haykuyniykin, aswan allinqa kasunki.
[9] Hinallataq, sichus ñawiyki urmachisunki chayqa, horqoruspa wikch'upuy. Iskay ñawiyoq kashaspa infierno nina yawrayman wikch'uykusqa kanaykimantaqa, ch'ulla ñawillayoq kawsayman haykuyniykin aswan allinqa kasunki, nispa.
[10] Jesusqa nillarqantaqmi: —Qhawariychis, ama kay huch'uykunamanta mayqellantapas pisipaqqa hapiychischu. Niykichismi: ‘Hanaq pachapi angelninkuna, hanaq pachapi kashaq Yayaypa uyantaqa rikushallankupunin,’ nispay.
[11] Runaq Churinqa, chinkasqa kaqkunata qespichinanpaqmi hamurqan, nispa.
[12] Nillarqantaqmi: —¿Imaniwaqchistaq? Sichus huk runaq pachak obehan kanman, hinaspataq huknin obehan chinkapunman chayqa, ¿manachu isqon chunka isqonniyoqta saqespa, orqon-orqonta chinkasqa obehata maskhaq rinman?
[13] Cheqaqtan niykichis: ‘Sitaqchus tarikampunman chayqa, chay isqon chunka isqonniyoq mana chinkasqa obehakunamanta aswantaraqqa, chay tarikampusqa obehamantan kusikun,’ nispay.
[14] Chay hinaqa, kay huch'uykunamanta ch'ullallapas chinkananqa, manan hanaq pachapi kashaq Yayaykichispa munayninchu, nispa.
[15] Jesusqa nillarqantaqmi: —Chay hinaqa, sichus wawqeyki qan kontra huchallikun chayqa, rispayki sapallanpi chay huchanmanta anyaykamuy. Uyarisunkichus chayqa, wawqeykiwanmi allipunapunkiña.
[16] Manachus uyarisunki chaytaqmi ichaqa, hukta, otaq iskay testigokunatawan pusarikuspayki rinki. Hinan iskay, otaq kinsa testigoq qayllanpi llapan imayna rimasqaykichiskunatapas uyarispa yachanqaku. (Deut. 19:15)
[17] Sichus chay testigokunatapas mana uyarinqachu chayqa, iñiq t'aqaman willay. Sichus iñiq t'aqatapas manapuni uyarinqachu, chaytaqmi ichaqa, mana iñiqta hina, otaq tributo qolqe kobraqta hina qhawaripunki.
[18] Cheqaqtan niykichis: ‘Kay pachapi tukuy watasqaykichisqa, hanaq pachapipas watasqañan kanqa. Hinallataq, kay pachapi tukuy paskasqaykichisqa, hanaq pachapipas paskasqañan kanqa,’ nispay.
[19] Nillaykichistaqmi: ‘Sichus kay hallp'a pachapi qankunamanta iskay allipunapuspa, imatapas Diosmanta mañakunqaku chayqa, hanaq pachapi kashaq Yayaymi mañakusqankutaqa qonqa.
[20] Maypichus iskay, otaq kinsa sutiypi huñunasqa kashanku, chaypin ñoqaqa paykunaq chawpinkupi kashani, nispa.
[21] Hinaqtinmi Pedroqa, Jesusman asuykuspa, nirqan: —Señor, ¿ñoqaq kontraypi wawqey huchallikuqtinri hayk'a kutikamataq pampachasaq? ¿Qanchis kutikamachu pampachasaq? nispa.
[22] Jesustaq payta nirqan: —Manan qanchis kutikamalla niykichu, aswanpas qanchis chunka kuti qanchiskama nishaykin, nispa.
[23] Nillarqantaqmi: —Chay hinaqa, hanaq pacha qhapaq suyuqa, kaymanmi rikch'akun. Huk reymi, kamachinkunawan kuentata ruwayta munarqan.
[24] Kuentata ruwayta qallariqtintaqmi, chunka waranqa talento qolqe manukuq huk runata payman pusamurqanku.
[25] Chay manukuq runaq pagapunanpaqmi mana imanpas karqanchu. Chaymi pay kikinta, warminta, wawankunata, hinallataq tukuy kapuqninkunatawan bendemuspa pagapunanpaq patronninqa kamachikurqan.
[26] Hinaqtinmi chay kamachiqa, patronninpa ñawpaqenman qonqoriykukuspa, balikurqan: ‘Wiraqochay, amahina- kaychu. Suyaykuway llapantapas pagapullasqaykin,’ nispan.
[27] Chay kamachiq patronnintaq, payta khuyapayaykuspa qolqe manukusqanta pampachaykuspan kacharipullarqan.
[28] Chay kamachi runa lloqsirapuspantaqmi ichaqa, huk kamachimasinwan tuparurqan. Paytaqmi pachak denario qolqe manun karqan. Chaymi kunkanmanta hap'ispa seq'osharqanña: ‘Manukuwasqaykita pagapuway,’ nispan.
[29] Hinan chay kamachimasinqa, ñawpaqenpi qonqoriykukuspa balikurqan: ‘Ama-hina-kaychu. Suyaykuway, ñoqaqa llapantapas pagapullasqaykin,’ nispan.
[30] Paytaq ichaqa mana munarqanchu, aswanpas manukusqanta pagapunankaman karselman wisq'achimurqan.
[31] Chay hinaqa, kamachimasinkunataq imachus pasasqanta rikuspanku, anchata llakipayarqanku. Hinan patronninkuman rispanku, llapan imachus pasasqanta willamurqanku.
[32] Hinaqtinmi patronninqa waqyachimuspa, payta nirqan: ‘Millay kamachi, balikuwasqaykiraykun llapan chay manukuwasqaykitaqa pampacharqayki.
[33] ¿Imaynan ñoqapas qanta khuyapayarqayki, chay hinata manachu qanpas kamachimasiykita khuyapayallawaqtaq karqan? nispa.
[34] Hinan patronninqa, phiñakuymanta llapan manukasqanta pagapunankama karsel kuidaqkunaman wisq'amunankupaq hap'ichirqan.
[35] Manachus sapanka hukpas tukuy sonqomanta wawqeykichista pampachankichis chayqa, chay hinallatataqmi qankunawanpas hanaq pachapi kashaq Yayayqa ruwanqa, nispa.