[1] Hanaq pacha qhapaq suyuqa, ubas chakrayoq huk wiraqochamanmi rikch'akun. Paymi tutallamanta ubas chakranpaq llank'aqkunata mink'aq lloqsirqan.
[2] Sapa p'unchay huk denario qolqeta pagapunanpaq llank'aqkunawan rimanakuspankutaqmi, ubas chakranman kacharqan.
[3] Kinsa kaq orasta hinapas lloqsillarqantaqmi. Hinan hukkunatapas plasapi mana ima ruwanayoqta tarimurqan.
[4] Paykunatataq nirqan: ‘Qankunapas ubas chakrayman rillaychistaq. Hinan iman pagapunata pagapusqaykichis,’ nispa. Hinaqtinmi paykunaqa rirqanku.
[5] Yapamantan soqta kaq orastapas, hinallataq isqon kaq orastapas lloqsilla- rqantaq. Hinan kasqallantataq ruwarqan.
[6] Hinallataqmi chunka hukniyoq kaq orastapas lloqsillarqantaq. Hinan chaypi mana ima ruwashaqta hukkunatapas tarimurqan. Paykunatataqmi nirqan: ‘¿Imanaqtintaq kaypiri ch'isiyaqnintin mana imatapas ruwaspa kashankichis?’ nispa.
[7] Paykunataq nirqanku: ‘Manan pipas mink'akuwarqankuchu, chaymi kaypi kashayku,’ nispanku. Hinan chakrayoqqa nirqan: ‘Qankunapas ubas chakrayman rillaychistaq. Hinan iman pagapunata chaskinkichis,’ nispa.
[8] Inti haykuy tardenña kashaqtintaq, ubas chakrayoq wiraqochaqa, mayordomunta nirqan: ‘Llank'aqkunata waqyaspayki pagapuy. Qhepa hamuqkunamanta qallarispataq, ñawpaq kaq hamuqkunapi tukupunki,’ nispa.
[9] Hinan chunka hukniyoq kaq orasta hamuqkunaqa, qayllaykuspanku sapankankupas huk denario qolqeta chaskikapurqanku.
[10] Ñawpaq kaqkuna hamuspankutaq, askha chaskiyta yuyaykurqanku. Ichaqa paykunapas sapankankun huk denario qolqeta chaskikapullarqankutaq.
[11] Chaskispanku hinataq, ubas chakrayoq wiraqochaq kontranpi chhuchupakurqanku.
[12] Nirqankutaq: ‘Kay qhepa hamuqkunaqa huk orallan llank'arqanku, ñoqaykuman hinataq pagashanki. Ñoqaykuqa ch'isiyaqnintinmi sayk'uytapas, ruphaytapas muchurqayku,’ nispanku.
[13] Chakrayoqtaq ichaqa, llank'aqkunamanta hukninman kutichispan nirqan: ‘Amigoy, manan ima mana chanin kaqtapas ruwaykichu, ¿manachu huk denario qolqeta pagapunaypaq rimanakurqanchis?
[14] Kayqa pagoyki, chaskispaykitaq ripuy. Ichaqa kay qhepa hamuqmanpas qanman hinan pagapuyta munani.
[15] ¿Manachu ñoqaq kaqkunawanqa munasqayta ruwayta atiyman? ¿Ichari allin runa kasqayraykuchu enbidiakuwanki?’ nispa.
[16] Chay hinaqa, askhan waqyasqakunaqa kanku. Pisillataqmi akllasqakunaqa kanku. Chaymi ñawpaq kaqkunaqa, qhepa kanqaku. Qhepa kaqkunataq, ñawpaq kanqaku, nispa.
[17] Jerusalén llaqtaman wichashaspantaqmi Jesusqa, yachachisqankunata ñanpi wak ladoman pusaspa rimaykurqan.
[18] Nirqantaq: —Qhawariychis, Jerusalén llaqtamanmi wichashanchis. Hinan Runaq Churinqa, umalliq saserdotekunaman, kamachikuy simita yachachiqkunaman hap'ichisqa kanqa. Wañunanpaqtaqmi hucha chanqaku.
[19] Hinan mana-judío runakunaman, asipayanankupaq, hasut'inankupaq, chakatanankupaqwan ima hap'ichinqaku. Ichaqa kinsa p'unchaymantataqmi kawsarimpunqa, nispa.
[20] Hinaqtinmi Zebedeoq churinkunaq mamanqa, churinkunapiwan Jesusman asuykurqan. Ñawpaqenpi qonqoriykukuspantaqmi, huk mañakuyta mañakurqan.
[21] Jesustaq warmita nirqan: —¿Imatan munashanki? nispa. Warmitaq Jesusta nirqan: —Qhapaq suyuykipi kay iskaynin wawaykuna, huknin paña ladoykipi, huknintaq lloq'e ladoykipi tiyaykunankupaq kamachiy, nispa.
[22] Hinan Jesusqa kutichispa nirqan: —Manan imachus mañakusqaykichista yachankichischu. ¿Ukyanay kashaq basomanta ukyaytari atiwaqchischu? Hinallataq, ¿bautisakusqay bautismupi bautisakuytari atiwaqchischu? nispa. Paykunataq nirqanku: —Atiykumanmi, nispanku.
[23] Jesustaqmi paykunata nirqan: —Cheqapaq ukyanay basomantaqa ukyawaqchismi, hinallataq bautisakusqay bautismopipas bautisakuwaqchismi. Paña ladoypi, otaq lloq'e ladoypi tiyana qoymi ichaqa, mana ñoqaq qonaychu. Aswanpas pikunapaqchus Yayayqa wakichirqan, paykunallapaqmi, nispa.
[24] Chunkantin yachachisqankunataqmi, chayta uyarispanku, chay iskaynin wawqentinpaq phiñakurqanku.
[25] Hinaqtinmi Jesusqa, paykunata waqyaspa, nirqan: —Mana-judío runakunaq kamachikuqninku paykuna ukhupi munaychakusqankutaqa, hinallataq paykuna ukhupi uma kaqkunapas kamachikuyniyoq kasqankutaqa yachankichismi.
[26] Qankunapurapin ichaqa, mana chay hinachu kanqa. Aswanpas, pipas qankunapurapi hatun kayta yuyaykuqqa, kamachiykichismi kanqa.
[27] Hinallataq pipas qankunapurapi ñawpaq kaq kayta yuyaykuqqa, kamachiykichismi kanqa.
[28] Chay hinallataqmi, Runaq Churinpas, mana serbichikunanpaqchu hamurqan. Aswanpas serbinanpaq, hinallataq kawsayninta qospa askha runakunata rantipapunanpaqmi hamurqan, nispa.
[29] Jesusqa yachachisqankunapiwanmi, Jerikó llaqtamanta lloqsimusharqan. Hinan ancha askha runakuna qatikamurqanku.
[30] Chayllamanmi, iskay ñawsakunaqa ñan patapi tiyasharqanku. Hinan Jesuspa pasashasqanta uyarispa qaparirqanku. Nirqankutaq: —!Davidpa Churin Señor, ñoqaykuta yanapaykuwayku! nispanku.
[31] Hinan chay ancha askha runakunaqa, upallanankupaq phiñarikurqanku. Ñawsakunataqmi ichaqa, aswan kallpawanraq qaparirqanku. Nirqankutaq: —!Davidpa Churin Señor, ñoqaykuta yanapaykuwayku! nispanku.
[32] Hinan Jesusqa, sayaykuspan ñawsakunata waqyaspa nirqan: —¿Qankunapaq ima ruwapunaytataq munankichisri? nispa.
[33] Ñawsakunataq nirqanku: —Señor, ñawiyku kicharisqa kanantan munayku, nispanku.
[34] Hinaqtinmi Jesusqa, sonqon ukhupi khuyalliykukuspan, ñawinkuta llamiykurqan. Chaymi kasqan ratupacha qhawaripurqanku. Hinaspataq Jesusta qatikurqanku.