[1] Jesusqa nillarqantaqmi: Ama chaninchasqa kanaykichispaq, ama pitapas chaninchaychischu.
[2] Chaninchasqaykichis chaninchaywanmi chaninchasqa kankichis, hinallataq tupusqaykichis tupunawanmi tupusqallataq kankichis.
[3] ¿Imanaqtintaq wawqeykiq ñawinpi ichhuchatari qhawanki, ichaqa manataq ñawiykipi kashaq kurkutaqa rikukunkichu?
[4] Qhawariy, ¿ñawiykipi kurku kashaqtinri, imaynatataq wawqeykita niwaq: ‘Ñawiykimanta chay ichhuchata horqorusayki,’ nispaykiri?
[5] ¡Iskay-uya! wawqeykiq ñawinmanta ichhuchata horqonaykipaqqa, ñawiykipi kashaq kurkutaraq ñawpaqta horqokuy, hinaspataqchá allinta rikunki.
[6] Ch'uya kaqtaqa, ama alqokunaman qaraychischu. Nitaq perlaykichiskunatapas khuchikunaq kasqanman wikch'uychischu. Chaytaq chakinkuwan saruchakunkuman. Qankunaman kutirimuspankutaq, llik'irqarisunkichisman.
[7] Mañakuychis, qosunkichismi; maskhaychis, tarinkichismi; punkuta takakuychis, kicharisunkichistaqmi.
[8] Lliw hayk'an mañakuqqa chaskinmi, maskhaqpas tarillantaqmi. Punkuta takakuqtapas kicharillanqakutaqmi.
[9] ¿Qankunamanta mayqenniykichistaq, wawan t'antata mañakuqtin, rumita qonman?
[10] ¿Otaq challwata mañakuqtin mach'aqwaytari qonman?
[11] Chay hinaqa, qankuna millay runakuna kashaspaykichispas wawaykichiskunaman allin kaqkunatan qoyta yachankichis. Chaykunamantapas, ¿manachu aswantaraq hanaq pachapi kashaq Yayaykichisqa, allin kaqkunata mañakuqninkunaman qonman?
[12] Kamachikuy Simipipas, hinallataq Diospa rantinpi rimaqkunaq qelqasqankupipas, chay hinapunin kashan. Chayrayku, tukuy imaymanakunata, runakunaq ruwapunasunkichista munankichis chayqa, qankunapas chay hinallatataq paykunapaq ruwapullaychistaq, nispa.
[13] Nillarqantaqmi: —Punkuqa hatunmi, chinkayman pusakuq ñanpas hatunllataqmi. Askhataqmi chay ñanninta haykuqkunaqa kanku. Chayrayku k'illku punkunta haykuychis.
[14] Punkupas k'illkullan, hinallataq kawsayman pusakuq ñanpas k'illkullataqmi. Ichaqa, pisillan chaykunata tariqkunaqa kanku, nispa.
[15] Jesusqa nillarqantaqmi: —Falso profetakunamanta makilla qhawakuychis. Paykunaqa, obeha hina p'acharukuspankun, qankunaman hamunqaku. Ukhunkutaqmi ichaqa, suwa lobokuna hina kanku.
[16] Paykunataqa, rurusqankupin reqsinkichis. ¿Kiskayoq sach'amantachu ubasri pallakun? Otaq, ¿kiskasapa sach'akunamantachu igospas pallakullantaqri?
[17] Chay hinan llapan allin sach'aqa, allin rurukunata rurun. Mana allin sach'ataqmi ichaqa, mana allin rurukunata rurun.
[18] Allin sach'aqa, manapunin mana allin rurutaqa rurunmanchu. Hinallataqmi mana allin sach'apas allin rurutaqa mana rurunmanchu.
[19] Llapan mana allin ruruq sach'ataqa, wit'upunqakun, hinaspataq ninaman wikch'uykunqaku.
[20] Chay hinaqa, rurusqanpin reqsinkichis, nispa.
[21] Nillarqantaqmi: —Manan, llapa: ‘Señor, Señor,’ nispa niwaqniychu hanaq pacha qhapaq suyumanqa haykunqa. Aswanpas hanaq pachapi kashaq Yayaypa munayninta ruwaqkunallan haykunqa.
[22] Haqay p'unchaypiqa, askhan niwanqaku: ‘Señor, Señor, ¿manachu sutiykipi profetizarqayku, sutiykipi supaykunatapas qarqorqayku, sutiykipi askha atiywan ruwaykunatapas ruwarqayku?’ nispanku.
[23] Hinaqtinmi ñoqaqa, sut'inta paykunata nisaq: ‘Mananpunin hayk'aqpas reqsirqaykichischu. Mana allin ruwaqkuna, ñoqamanta t'aqakuychis,’ nispay, nispa.
[24] Hinan Jesusqa nillarqantaq: —Chay hinaqa, pipas chay simiykunata uyarispa ruwaqtaqa, huk yuyaysapa runa, qaqa patapi wasin ruwakuqmanmi rikch'anachisaq.
[25] Chayllamanmi paraqa chayamurqan, mayupas yapakamurqan, hinallataq wayrapas wayramurqan. Chay wasiq kontranpitaq chaykuna waqtakurqan. Ichaqa qaqa patapi ruwasqa kasqanraykutaqmi, chay wasiqa manapuni thunikurqanchu.
[26] Pipas chay simiykunata uyarishaspa mana ruwaqtan ichaqa, aqo patapi wasi ruwaq mana yuyayniyoq runaman rikch'ana chisaq.
[27] Chayllamanmi paraqa chayamurqan, mayupas yapakamurqan, hinallataq wayrapas wayramurqan. Chay wasiq kontranpitaq chaykuna waqtakurqan. Chay wasitaqmi thuniykukurqan. Hinan thunikuyninqa, may hatunpuni karqan, nispa.
[28] Chay simikunata rimayta tukuqtintaq, runakunaqa yachachikuyninmanta utirayarqanku.
[29] Jesusqa kamachikuyniyoq hinan chay askha runakunaman yachachirqan. Manataqmi kamachikuy simita yachachiqkuna hinallachu yachachirqan.