[1] Rey Herodespa p'unchayninkunapin, Judea probinsiapi kashaq Belén llaqtapi Jesusqa naserqan. Hinan chayllaman, inti lloqsimuy ladomanta Jerusalén llaqtaman, ch'askakunapi qhawaq yachaysapakuna chayamurqanku.
[2] Nirqankutaq: —¿Judío runakunaq Reynin naseqri maypitaq kashan? Inti lloqsimuy ladopi kashaspaykun, ch'askanta rikumurqayku. Chaymi payta yupaychaq hamushayku, nispanku.
[3] Chayta uyarispantaqmi, rey Herodesqa llapan Jerusalén llaqtapi kaqkunapiwan, llakisqa karqanku.
[4] Hinan llaqtamanta llapan umalliq saserdotekunatawan, kamachikuy simita yachachiqkunatawan waqyachispan, paykunata tapurqan: —¿Maypitaq Cristori nasenan karqan? nispa.
[5] Paykunataqmi kutichirqanku: —Judea probinsiapi kashaq Belén llaqtapipunin nasenan karqan. Diospa rantinpi rimaqpas paymantaqa qelqarqanmi.
[6] Chay qelqasqantaqmi nin: ‘Judá suyupi kashaq Belén llaqtamantan huk umalliq lloqsinqa. Paymi Israel llaqtayta michinqa. Chayrayku, Judá chawpipi umalliqkunamanta qanqa manamá huch'uychallachu kanki,’ nispan, nispanku. (Mik. 5:2)
[7] Hinaqtinmi Herodesqa, ch'askakunapi qhawaq yachaysapakunata pakallapi waqyachispan, ch'askaq imayna tiempoña rikhurimusqanmanta allintapuni tapurqan.
[8] Belén llaqtaman paykunata kachaspantaqmi, nirqan: —Haqayta riychis, hinaspa chay wawamanta allintapuni tapukamuychis. Tariruspaykichistaq, ñoqapas yupaychaq rinaypaq willaykamuwankichis, nispa.
[9] Reyta uyarispanku hinataq, paykunaqa ripurqanku. Hinan chayllaman inti lloqsimuy ladopi kashaspa rikumusqanku ch'askaqa, paykunaq ñawpaqenkuta wawaq kasqanpa hawanpi sayaykunankama rirqan.
[10] Ch'askata rikuruspankutaq, hatun q'ochukuywan anchatapuni kusikurqanku.
[11] Wasiman haykuykuspankutaq, wawata, maman Mariatawan rikurqanku. Hinan qonqoriykukuspanku, wawata yupaycharqanku. Qhapaqkay waqaychanankuta kicharispankutaq, qokuykunata haywarqanku. Qorita, insiensota, mirrata ima haywarqanku.
[12] Herodesman mana kutinankupaq mosqhoypi willasqa kaspankutaqmi ichaqa, wak ñanninta karu llaqtankuman kutipurqanku.
[13] Yachayniyoqkuna ripuqtinku hinataq, chayllaman Señorpa huk angelnin Joseman mosqhoypi rikhurirqan. Hinan nirqan: —Herodesmi wawata wañuchinanpaq maskhamunqa. Chayrayku sayariy. Hinaspataq wawata, mamantawan pusarikuspa, Egipto suyuman ayqey. Hinan chaypi willanaykama kamunki, nispa.
[14] Chaymi Joseqa rikch'arispan, kasqan tutapacha wawata, mamantawan pusarikuspa, Egipto suyuman ripurqan.
[15] Chaypitaq Herodespa wañunankama kamurqan. Chay hinapin, Diospa rantinpi rimaqpa chawpinta Señorpa nisqan hunt'akunankama kamurqan. Señorqa nirqanmi: Egipto suyumantan Wawaytaqa waqyampurqani, nispan. (Ose. 11:1)
[16] Herodesqa, paymanta yachaysapakunaq q'otuspa pukllakusqankupi rikukuspanmi, sinchita phiñakurqan. Hinaqtinmi Belén llaqtapi, hinallataq muyuriqnintinpi, imayna tiempoñachus pasasqanta yachaysapakunata tapurqan. Hinan chayta yachaspan, iskay watayoqmanta urayman, llapan qhari wawakunata wañuchimunankupaq kamachikurqan.
[17] Chay hinapin, Diospa rantinpi rimaq Jeremiaspa nisqan hunt'akurqan.
[18] Paymi nirqan: ‘Ramá llaqtapin huk kunkata uyarirqanku. Hatun waqapakuy, waqay, qapariy iman karqan. Raquelmi wawankunamanta waqan. Manaña wawankuna kapusqanraykun, mana sonqochasqa kaytaqa munarqanchu,’ nispa.(Jer. 31:15)
[19] Herodespa wañupusqan qhepatataq ichaqa, chayllaman Señorpa huk angelnin, Egipto suyupi Joseman mosqhoypi rikhurirqan.
[20] Hinan nirqan: ―Sayariy, hinaspa wawata, mamantawan pusarikuspa, Israel llaqtaman ripuy. Wawata wañuchiy munaqkunaqa wañupunkuñan, nispa.
[21] Hinaqtinmi Joseqa sayariruspan, wawata, mamantawan pusarikuspan, Israel llaqtaman ripurqan.
[22] Ichaqa Judea probinsiapi, taytan Herodespa rantinpi, Arquelao rey kasqanta uyarispantaqmi, chayman riyta manchakurqan. Hinan mosqhoy rikhuriypi willasqa kaspan, Galilea pribinsiaman ripurqan.
[23] Diospa rantinpi rimaqkunan nisqaku karqan: —Nazaret llaqtayoq sutiwan sutichasqan kanan karqan, nispanku. Chay nisqanku hunt'akunanpaqmi, Nazaret sutiyoq llaqtaman chayarqan. Hinan chaypi tiyapurqan. (Isa. 11:1)