[1] Pacha illarimuqtintaq, llapan umalliq saserdotekuna, llaqta umalliq runakunapiwan, wañuyman hap'ichinankupaq Jesuspa kontranpi rimanakurqanku.
[2] Hinan t'eqesqata apaspanku, kamachikuq Poncio Pilatoman hap'ichimurqanku.
[3] Hinaqtinmi hap'ichiqnin Judasqa, wañuyman Jesusta huchachasqankuta rikuspa, sonqonta nanachikurqan. Hinan kinsa chunka qolqe chaskisqanta umalliq saserdotekunaman, umalliq runakunamanwan kutichipurqan.
[4] Nirqantaq: —Mana huchayoq runata wañunanpaq qankunaman hap'ichispaymi ñoqaqa huchallikuni, nispa. Paykunataq ichaqa, nirqanku: —¿Ñoqaykumanri, imataq qokuwanku? Chaymantaqa qanchá yachakunki, nispanku.
[5] Hinan Judasqa, Dios yupaychana wasiman qolqeta wikch'uykuspan lloqsipurqan. Hinan ripuspa, seq'okampurqan.
[6] Umalliq saserdotekunataq, chay qolqeta hoqarispa nirqanku: —Kay qolqeqa yawarpa chaninninmi. Chayraykun, Kamachikuy Simiman hinaqa, ofrenda waqaychanaman churananchisqa mana atikunchu, nispanku.
[7] Rimanakuspankutaqmi, raqch'i ruwaqpa hallp'anta, wak suyu runakunata p'ampanankupaq rantirqanku.
[8] Chaymi chay chakraqa, kunan p'unchaykama yawar chakra nispa sutichasqa kapun.
[9] Chay hinapin Diospa rantinpi rimaq Jeremiaspa nisqanqa hunt'akurqan. Paymi nirqan: ‘Rimanakusqankuman hina, balorniyoq kinsa chunka qolqetan hap'irqanku. Chayqa, Israelpa churinkunaq presio churasqankuman hinan karqan.
[10] Hinan raqch'i ruwaqpa hallp'anta rantinankupaq, Señorpa kamachisqanman hina qorqanku,’ nispa. (Jer. 32:6-9; Zak. 11:12-13)
[11] Jesustaq, kamachikuqpa qayllanpi sayasharqan. Hinan kamachikuqqa tapurqan: —¿Qanchu judío runakunaq Reynin kanki? nispa. Jesustaq payta nirqan: —Qanpa nisqayki hinapunin, nispa.
[12] Umalliq saserdotekunaq, hinallataq umalliq runakunaq huchachasqan kaspataqmi, mana imatapas kutichikurqanchu.
[13] Hinaqtinmi Pilatoqa, payta nirqan: —¿Manachu kontraykipi imaymana willakusqankuta uyarinki? nispa.
[14] Jesustaq ichaqa, manapuni ch'ulla simillatapas Pilatoman kutichirqanku. Chaytaqmi kamachikuq Pilatoq yuyayninmanqa manapuni kaberqanchu.
[15] Sapa wata, Paskua fiestapin, kamachikuq Pilatoqa huk presota, askha runakunaq munasqanman hina kacharillaqpuni.
[16] Hinan huk ancha reqsisqa preso, Barrabás sutiyoq runata hap'isharqanku.
[17] Llaqta huñunasqa kashaqtinmi, Pilatoqa nirqan: —¿Mayqentataq kacharinaytari munankichis? ¿Barrabastachu, icha Cristo sutiyoq Jesustachu kacharipusaq? nispa.
[18] Enbidiamanta Jesusta hap'ichimusqankutan payqa yacharqan.
[19] Hinan chaninchana tiyanapi Pilato tiyashaqtin, warminqa willaqkunawan willachimurqan. Hinan paykunaq chawpinta nirqan: —Ch'isi tutan imaymana mana allinkunata chay runamanta mosqhokuni. Chayrayku chay chanin runataqa ama imanaypaschu, nispa.
[20] Hinaqtinmi umalliq saserdotekuna, umalliq runakunapiwan chay askha runakunata yachachirqanku: —¡Barrabasta kacharipuy! ¡Jesustataq wañuchiy! nispa mañakunankupaq yachachirqanku.
[21] Kamachikuqtaq kutichispan, paykunata nirqan: —¿Iskayninmanta mayqen kaqtataq kacharipunaytari munankichis? nispa. Runakunataq nirqanku: —¡Barrabasta kacharipuy! nispanku.
[22] Pilatotaq paykunata nirqan: —Chay hinaqa, ¿Cristo sutiyoq Jesustari, imanasaqtaq? nispa. Llapan runakunataqmi nirqanku: —¡Payqa chakatasqa kachun! nispanku.
[23] Kamachikuqtaq, paykunata nirqan: —¿Ima mana allintataq payri ruwarqan? nispa. Paykunataq ichaqa, aswantaraq qaparispa nirqanku: —¡Chakatasqapuni kachun! nispanku.
[24] Pilatoqa mana imapas ruway atikusqanta, hinallataq sinchi ch'aqwaraylla kasqantan rikurqan. Hinan unuta hap'ispa, llapa runaq qayllanpi makinta mayllikuspa nirqan: —Kay chanin runaq wañusqanmantaqa, manan ñoqaqa huchayoqchu kani. Qankunachá imayna kaytapas yachakunkichis, nispa.
[25] Llaqtantin runakunataq, kutichispa nirqanku: —Chay runaq wañusqanmantaqa ñoqayku, hinallataq wawaykupas huchachasqa kasaqku, nispanku.
[26] Hinaqtinmi Pilatoqa, Barrabasta kacharipurqan. Jesustataq ichaqa, hasut'ichispan chakatamunankupaq hap'ichirqan.
[27] Hinan kamachikuq Pilatoq soldadonkunaqa, chaninchana wasi patioman Jesusta apaykurqanku. Hinaspataq paypa muyuriqninman llapan tropantin soldadokunata huñumurqanku.
[28] P'achanta q'alata ch'ustiruspankutaq, yawar-puka p'istunawan patanman p'isturqanku.
[29] Kiskamanta pilluta simp'aruspankutaq, umanman churaykurqanku. Hinallataq paña makinmanpas soqosta hap'iykuchirqanku. Jesuspa qayllanpi qonqoriykukuspankutaq, asipayaspa nirqanku: —¡Judío runakunaq Reynin kawsachun! nispanku.
[30] Payman thoqaykuspankutaq, soqosta hap'ispanku, umanpi p'anarqanku.
[31] Jesusta asipayasqankumantataq, p'istuna p'achata ch'ustirqanku. Hinan pay kikinpa p'achanwan churapuspanku, chakatamunankupaq aparqanku.
[32] Llaqtamanta lloqsispankutaq, Sirene probinsiamanta Simón sutiyoq huk runata tarirqanku. Paytan, Jesuspa krusninta q'epinanpaq qatirirqanku.
[33] Hinan Gólgota nispa sutichasqa orqoman chayarqanku. Gólgota simiqa, uman tullo cheqas ninantan nin.
[34] Binagretawan, hayaqetawan chhaqruruspankutaqmi, ukyananpaq qorqanku. Malliykuspantaqmi ichaqa, mana ukyayta munarqanchu.
[35] Jesusta chakataruspankutaq, sortiaspa p'achanta paykunapurapi rakinakurqanku. Chaytaqa, Diospa rantinpi rimaqpa nisqan hunt'akunanpaqmi ruwarqanku. Paymi nisqa karqan: ‘Paykunapurapin p'achaykunata rakinakurqanku. Hinallataqmi p'achaypaqpas sortiarqanku,’ nispa. (Sal. 22:18)
[36] Chaypi tiyaykuspankutaq, Jesusta kuidasharqanku.
[37] Umanpa hawanmantaq imamantachus huchachasqanku qelqata churarqanku. Chay qelqasqaqa nirqanmi: JUDÍO RUNAKUNAQ REYNIN JESUSQA, KAYMI, nispa.
[38] Hinaqtinmi Jesustawan kuskata iskay suwakunata, hukninta paña ladonpi, huk kaqtataq lloq'e ladonpi chakatarqanku.
[39] Chayninta puriqkunataq, umankuta maywikuspa, k'amirqanku.
[40] Nirqankutaq: —Dios yupaychana wasita thuniruspa, kinsa p'unchayllapi hatarirachiy munaq, qan kikiykita qespichikuy. Hinallataq Diospa Churinpunichus kanki chayqa, krusmanta uraykamuy, nispanku.
[41] Chay hinallatataqmi, umalliq saserdotekunapiwan, kamachikuy simita yachachiqkunapiwan, umalliq runakunapiwan Jesusta asipayarqanku.
[42] Hinan nirqanku: —Hukkunataqa qespichirqanmi. Pay kikintataq ichaqa, mana qespichikuyta atinchu. Israel llaqtaq Reyninchus chayqa, krusmanta kunan uraykamuchun. Hinaspataq paypi kreesunchis.
[43] Diospa Churinmi kani, nispanmi Diosman hap'ipakurqan. Chayrayku, sichus Dios munan chayqa, kunanyá kacharichichun, nispanku.
[44] Chay hinallatataqmi, Jesuswan kuska chakatasqa kashaq suwakunapas k'amirqanku.
[45] Soqta kaq orasmanta, isqon kaq oraskaman lliw hallp'a pachantinpi laqhayay karqan.
[46] Isqon kaq orasta hinataqmi, Jesusqa kunkayoqta qaparispa nirqan: —¡Elí, Elí! ¿Lama sabaktani? nispan. Chayqa, ‘Diosniy, Diosniy, ¿imanaqtinmi saqerpariwanki?’ ninantan nin. (Sal. 22:1)
[47] Chaypi wakin kashaqkunataqmi, chayta uyarispa nirqanku: —Kay runaqa, Eliastan waqyakushan, nispanku.
[48] Paykunamanta hukninkutaq, kasqan ratupacha phawarispan, huk esponhata hap'ispan, binagreman challpurqan. Hinan chayta huk soqosman wataspa ukyananpaq haywarqan.
[49] Wakinkunataq ichaqa nirqanku: —Hinalla kachun. Sichus Elias qespichinanpaq hamunqa chayqa, rikusunchá riki, nispanku.
[50] Jesustaq ichaqa, yapamanta kunkayoqta qaparispa, espiritunta hap'ichirqan.
[51] Chayllamanmi, Dios yupaychana wasiq kortinanqa, wichaymanta uraykama iskayman llik'ikurqan. Hallp'a pachataqmi chhaphchikurqan. Hinallataq qaqakunapas ch'iqtakurqan.
[52] Hinallataqmi aya p'ampana t'oqokunapas kicharikurqan. Hinan askha ch'uya wañukapuqkunaq kuerponkupas kawsarim- pullarqankutaq.
[53] Jesuspa kawsarimpusqan qhepatataq, aya p'ampana t'oqokunamanta lloqsimuspanku, ch'uya llaqtaman rirqanku. Hinan askha runakunaman rikhurirqanku.
[54] Senturión runataq, paywan kuska Jesusta kuidaqkunapiwan ima, pachaq chhaphchikusqanta rikurqanku. Hinan imakunapiwanchus chaypi pasasqanta rikuspa, sinchi mancharisqa nirqanku: —¡Cheqaqtapunin kay runaqa Diospa Churin kasqa! nispanku.
[55] Hinan askha warmikuna karullamanta qhawaspa, chaypi kasharqanku. Chay warmikunaqa, Jesusta serbispankun Galilea probinsiamantapacharaq qatikamusqaku karqan.
[56] Paykunapurapitaqmi, Magdala llaqtamanta Mariapiwan, Jakoboq, hinallataq Josepa mamitanku Mariapiwan ima kasharqanku. Hinallataqmi Zebedeoq churinkunaq mamanpas chaypi paykunawan kashallarqantaq.
[57] Tardeyaykushaqtinñataq, Arimatea llaqtamanta José sutiyoq huk qhapaq runa rirqan. Paypas Jesuspa yachachisqanmi kasqa karqan.
[58] Paymi Pilatoman rispan, Jesuspa ayanta qopunanpaq balikurqan. Hinaqtinmi Pilatoqa, ayanta qonpunankupaq kamachikurqan.
[59] Joseqa, Jesuspa ayanta hap'ispanmi, linomanta llimphuy sabanawan k'uyuykurqan.
[60] Hinaspataq qaqapi mosoqllaraq ruwachikusqan aya p'ampana t'oqoman churarqan. Hinan aya p'ampana t'oqoq punkunman huk hatun rumita tanqaykuspa, ripurqan.
[61] Chaypitaqmi, Magdalamanta María, hinallataq huk kaq Mariapiwan kasharqanku. Paykunaqa, aya p'ampana t'oqoq ñawpaqenpin tiyasharqanku.
[62] Wakichikuy p'unchaypa qhepan sábado p'unchaytataq, umalliq saserdotekunaqa, fariseokunapiwan Pilatoq ñawpaqenman huñukurqanku.
[63] Huñukamuspankutaqmi nirqanku: —Wiraqochayku, chay q'otukuq runaq nisqantan yuyariruyku. Paymi kawsashaspanraq nirqan: ‘Wañuspaymi kinsa p'unchaymanta kawsarimpusaq,’ nispa.
[64] Chay hinaqa, aya p'ampana t'oqota kinsa p'unchaykama allinta kuidamunankupaqyá kamachiy. Mana hina kaqtinqa, yachachisqankunan tuta hamuruspa, suwarunkuman. Hinaspataq llaqtata ninkuman: —Wañusqakunamantan kawsarirampun nispanku. Hinan chay p'uchukay q'otukuyqa, ñawpaq kaqmantapas aswan mana allinraq kanman, nispanku.
[65] Pilatotaq paykunata nirqan: —Tropantin soldadokunawanyá riychis. Hinaspataq imaynatachus kuidayta yachankichis, chay hinata kuidamuychis, nispa.
[66] Paykunataq ichaqa, aya p'ampana t'oqoq kasqanman rispanku, aya p'ampana t'oqota allin-allintapuni wisq'aykurqanku. Hinan rumipi selluykurqanku. Hinallataqmi soldadokunawanpas allinta waqaychachimurqanku.