[1] Hinaqtinmi Jesusqa, huk barkaman haykuspan, qochaq wak ladon chimpaman chimparqan. Chaymantataq llaqtanman hampurqan.
[2] Chayllamanmi, huk mana kuyuriq such'u runata kallapupi siriykusqata Jesusman apamurqanku. Hinan Jesusqa, chay runakunaq iñiyninkuta rikuspa, such'u runata nirqan: —Waway, kallpachakuy, huchaykikunataqa pampachaykiñan, nispa.
[3] Chayllamanmi, wakin kamachikuy simita yachachiqkunaqa, sonqonku ukhupi nirqanku: —Kay runaqa, Diostan k'arakta k'amishan, nispanku.
[4] Hinan Jesusqa, paykunaq yuyaykusqankuta yachaspa nirqan: ¿Imanaqtintaq sonqoykichispiri mana allinkunata yuyaykunkichis?
[5] Chay hinaqa, —¿Mayqentaq aswan fasilchalla niyri: ‘Huchaykikunatan pampachayki niychu, icha sayarispa ripuy niytaqchu’? nispa.
[6] Aswanpas Runaq Churin hallp'a pachapi hucha pampachananpaq atiyniyoq kasqanta yachanaykichispaqmi mana kuyuriq such'u runata nini: —Sayariy, puñunaykita hoqarispataq wasiykiman ripuy, nispay.
[7] Hinaqtinmi mana kuyuriq such'u runaqa, sayarispan wasinman ripurqan.
[8] Chay askha runakunataqmi, chayta rikuspanku yuyayninkupi mana kabesqa kasharqanku. Hinallataq Diospa runakunaman chay hina atiyta qosqanrayku Diosta hatuncharqanku.
[9] Chaymanta rishaspantaqmi, Jesusqa Mateo sutiyoq huk runata, llaqtaq tributo qolqe qonan tiyanapi tiyashaqta rikurqan. Hinan payta nirqan: —Qatikamuway, nispa. Mateotaq sayarispa qatikurqan.
[10] Chaymantataq wasipiña mesapi tiyashaqtin, chayllaman askha tributo qolqe kobraqkuna, hinallataq huchasapakunapas chayamurqanku. Hinan paykunaqa, Jesuspiwan, yachachisqankunapiwan kuska mesaman tiyaykurqanku.
[11] Chayta rikuspankutaq, fariseokunaqa Jesuspa yachachisqankunata nirqanku: —¿Imanaqtintaq Yachachiqniykichisri, tributo qolqe kobraqkunawan, hinallataq huchasapakunawanpas mikhushanri? nispanku.
[12] Chayta uyarispanmi Jesusqa, paykunata nirqan: —Qhali kaqkunaqa, manan hampiqta nesesitankuchu. Aswanpas onqosqakunallan nesesitanku.
[13] Manan, chanin kaqkunata waqyaqchu hamurqani, aswanpas huchasapakunaq yuyayman kutirikunankupaq waqyaqmi hamurqani. Chayraykun, mana sakrifisiotachu, aswanpas yanapakuytan munani. Chay imaninantachus nisqanta rispaykichis yachamuychis, nispa. (Ose. 6:6)
[14] Hinan Juanpa yachachisqankunaqa, Jesusman asuykuspanku tapurqanku: —¿Imanaqtintaq ñoqaykuri, hinallataq fariseokunapas sapa kuti ayunashallayku, qanpa yachachisqaykikunataq ichaqa, mana ayunankuchu? nispanku.
[15] Jesustaq paykunaman kutichispa nirqan: —¿Maypachachus kasarakuq qharita kompañaqkuna paykunawan kasarakuq kashanankamari, yana p'achawan churakunkumanchu? Ichaqa kasarakuq qhari qechusqa kanan p'unchayqa chayamunqan, chayñan ayunanqaku.
[16] Hinallataq mosoq telawan remiendoqa, q'estispanmi mawk'a p'achata aswantaraq llik'ipun. Chayraykun, mana pipas mawk'a p'achataqa, mosoq telawan remiendanmanchu.
[17] Manallataqmi pipas upi binotaqa, mawk'a odrekunamanqa hillp'unmanchu. Sichus chay hina kanman chayqa, odrekunan phatapunman. Hinallataq binopas hich'arparikapunman. Hinan odrekunaqa wikch'usqa kapunman. Aswanmi upi binotaqa, mosoq odrekunaman hillp'unku, chay hinapin iskayninku waqaychanakunku, nispa.
[18] Chay imaymanakunamantan Jesusqa rimashallarqanraq. Hinan chayllaman, judío runakunamanta huk umalli runaqa, chayamurqan. Jesuspa ñawpaqenpi qonqoriykukuspantaqmi nirqan: —Ususichaymi chayllaraq wañurapun. Ama hina kaychu, hamuspayki, makiykita pay pataman churaykampuway, hinan kawsallanqa, nispan.
[19] Sayarispantaqmi Jesusqa, yachachisqankunapiwan umalli runaq qhepanta rirqan.
[20] Hinan chayllaman, huk warmi chunka iskayniyoq wataña yawar-apay onqoyniyoq hamurqan. Hinan chay warmiqa, Jesusman asuykuspa qhepanmanta p'achanpa kantunta llamiykurqan.
[21] Chay warmiqa, sonqonpin yuyaykurqan: —Sichus p'achanpa kantullantapas llamiykusaq chayqa, qhaliyasaqmi, nispa.
[22] Jesustaqmi ichaqa kutirispa, chay onqosqa warmita qhawaykuspa nirqan: —Ususiy, iñiyniykin qhaliyachisunki, kallpachakuy, nispa. Chay oramantapachataqmi, warmiqa qhali kapurqan.
[23] Jesustaq chay umalli runaq wasinman chayarqan. Hinan qena tukaqkunata, hinallataq askha runakunata ch'aqwarashaqta rikurqan.
[24] Nirqantaq: —Sipaschaqa manan wañusqachu kashan, aswanpas puñushallanmi, chayrayku achhuriychis, nispa. Hinan chayta uyarispanku, Jesusta asipayarqanku.
[25] Chay askha runakunata hawaman qarqospantaq ichaqa, sipaschaq kasqanman haykuspan, makinmanta aysarirqan. Hinan sipaschaqa sayaripurqan.
[26] Chay ruwasqankunataqmi, tukuy llaqtakunaman ch'eqerirqan.
[27] Jesustaqmi chaymanta ripusharqan. Hinan iskay ñawsakuna qaparispa qatikurqanku. Nirqankutaq: —¡Davidpa Churin, ñoqaykuta yanapaykuwayku! nispanku.
[28] Hinan Jesús, wasiman chayaqtin, chay ñawsakunaqa payman asuykamurqanku. Jesustaqmi paykunata nirqan: —¿Kay ruwayta atinaypaq kreenkichischu? nispa. Paykunataq nirqanku: —Arí Señor, nispanku.
[29] Hinaqtinmi Jesusqa, ñawsakunaq ñawinkuta llamiykuspa nirqan: —Kreesqaykichisman hina ruwasqa kachun, nispan.
[30] Hinan ñawsakunaq ñawinkuqa, kicharisqa kapurqan. Jesustaqmi paykunata anchatapuni anyaykurqan: —Qhawariychis, amapunin pimanpas willankichischu, nispan.
[31] Paykunataqmi ichaqa, chaymanta lloqsipuspanku, Jesuspa ruwasqanta tukuy chay llaqtakunapi ch'eqerichirqanku.
[32] Paykuna lloqsiqtinku hinataq, chayllaman supayniyoq huk upa runata Jesusman apamurqanku.
[33] Chay upa runamanta supayta qarqoruqtin hinataq, chay upa runaqa rimarirqan. Hinan chay askha runakunaqa, mana yuyayninkuman kabesqa kaspa nirqanku: —Manapunin hayk'aqpas kay hina ruwayqa Israel llaqtantinpipas rikukurqanchu, nispanku.
[34] Fariseokunataqmi ichaqa, nisharqanku: —Supaykunaq umalliqninkuq atiyninwanmi supaykunataqa qarqoshan, nispanku.
[35] Tukuy llaqtakunata, llaqta kantukunatawanmi Jesusqa purirqan. Hinallataq judío runakunaq huñukunanku wasikunapipas Diospa qhapaq suyunmanta allin willakuyta willarqan. Hinallataqmi, runakunaq llapan onqoyninkunatapas, llapan nanayninkunatapas qhaliyachirqan.
[36] Ancha askha runakunan, wikch'usqa, ch'eqerisqa, hinallataq mana michiqniyoq obehakuna hina kasharqanku. Chaymi chay ancha askha runakunata chay hinata rikuspan, Jesusqa paykunamanta khuyalliykukurqan.
[37] Hinaqtinmi Jesusqa, yachachisqankunata nirqan: —Cheqapaqmi kosechanaqa askha kashan. Llank'aqkunataqmi ichaqa, pisilla kanku.
[38] Chay hinaqa, chakrayoq wiraqochata llank'aqkunata kosechanman kachamunanpaq balikuychis, nispa.