[1] Tukuy chay simikuna rimayta tukuruspantaqmi, Jesusqa yachachisqankunata rimaykurqan.
[2] Nirqantaq: —Iskay p'unchaymanta Paskua fiestaq kanantaqa yachankichismi. Hinan Runaq Churinqa, chakatasqa kananpaq hap'ichisqa kanqa, nispan.
[3] Hinaqtinmi umalliq saserdotekuna, kamachikuy simita yachachiqkuna, hinallataq llaqta umalliq runakunapas, Kaifás sutiyoq hatun umalli saserdoteq wasi pationpi huñunakurqanku.
[4] Hinan Jesusta q'otullawan hap'ispa, wañuchinankupaq paykunapurapi rimanakurqanku.
[5] Ichaqa nirqankun: —Llaqtapi mana ch'aqwaray kananpaq, ama fiestapiqa wañuchisunchu, nispanku.
[6] Hinaqtinmi, Betania llaqtapi lepra onqoyniyoq Simonpa wasinpi Jesusqa kasharqan.
[7] Hinan huk warmi, alabastro rumimanta tuminchapi, ancha askha balorniyoq q'apashaq hawinata apayukuspa hamurqan. Hinaspataq chay warmiqa, Jesuspa uman pataman mesapi tiyashaqtin hich'aykurqan.
[8] Chayta rikuspankutaq, yachachisqankunaqa phiñakuspa nirqanku: —¿Imapaqtaq kay hinatari usuchikun?
[9] Kay hawinataqa askha qolqemanchá aswan bendikunman karqan. Hinaspataq wakchakunaman qokunman karqan, nispanku.
[10] Chayta entiendispantaqmi, Jesusqa paykunata nirqan: —¿Imapaqtaq kay warmitari rimapayankichis? Payqa allin ruwaytan ñoqapaq ruwarqan.
[11] Wakchakunaqa, qankunawan kashallanqapunin. Ñoqan ichaqa, manaña qankunawan kashallasaqpunichu.
[12] Hinallataq, kay q'apashaq hawinata kuerpuyman hich'aykuwaspanqa, p'ampasqa kanaypaqmi wakichishan.
[13] Cheqaqtan niykichis: ‘Teqsimuyuntinpi may cheqaspiña kay allin willakuy willasqa kasqanpipas, kay warmiq ruwasqanmanta yuyarinapaqmi willasqallataq kanqa,’ nispay, nispa.
[14] Hinaqtinmi, chunka iskayniyoqmanta huknin Judas Iskariote sutiyoqqa, umalliq saserdotekunaman rirqan.
[15] Hinan Judasqa, paykunata nirqan: —¿Jesusta qankunaman hap'ichiqtiyri, imatataq qowankichisman? nispa. Paykunataq, kinsa chunka qolqeta Judasman qorqanku.
[16] Chaymantapachataqmi, Judasqa ima ratupichus Jesusta hap'ichinanpaq maskhasharqan.
[17] Mana lebadurayoq t'anta mikhuna fiesta qallariy p'unchaypitaqmi, yachachisqankunaqa Jesusman asuykuspa nirqanku: —¿Maypitaq Paskua fiestapi t'anta mikhunaykipaq wakichimunaykutari munanki? nispanku.
[18] Jesustaq nirqan: —Llaqtapi kashaq huk runaman riychis. Hinaspataq chay runata ninkichis: ‘Yachachikuqmi nin: “Wañunay p'unchaymi qayllaykamunña, wasiykipin yachachisqaykunawan Paskua fiestapi mikhuna t'antata mikhusaq,” nispan,’ nispaykichis, nispa.
[19] Yachachisqankunataq, imaynatachus kamachisqanman hina, Paskua fiestapi t'antata mikhunanpaq wakichimurqanku.
[20] Sasphiyaykushaqtinñataq, Jesusqa chunka iskayniyoq yachachisqankunapiwan mesaman tiyaykurqan.
[21] Mikhushaqtinkutaq, Jesusqa nirqan: —Cheqaqtan niykichis: ‘Qankunamanta hukniykichismi hap'ichiwankichis,’ nispay, nispa.
[22] Hinan paykunaqa, sinchi llakisqa kaspanku, sapanka hukninku tapukuyta qallarirqanku: —Señor, ¿ñoqachu kasaq? nispanku.
[23] Hinaqtinmi Jesusqa, kutichispa nirqan: —Pichus ñoqawan kuska p'ukuman makinta challpuqmi hap'ichiwanqa.
[24] Cheqaqtapunin Runaq Churinqa, imaynachus paymanta qelqasqa kashan, chayman hina rishan. Ichaqa ¡ay Runaq Churinta hap'ichiq haqay runamanta, imaynaraq kanqa! Chay runaq mana naseyninqa, allinmi kanman karqan, nispa.
[25] Hap'ichiqnin Judastaq, kutichispa nirqan: —Rabí, ¿ñoqachu kasaq? nispa. Jesustaq nirqan: —Qan kikiykin ninki, nispa.
[26] Paykuna mikhushaqtinkutaqmi, Jesusqa t'antata hap'ispa, saminchaykuspa phakmirqan. Hinan yachachisqankunaman qospa nirqan: —Hap'iychis, hinaspa mikhuychis. Kayqa kuerpoymi, nispa.
[27] Hinan kopatapas hap'ispan, grasiasta qorqan. Paykunaman qospantaqmi nirqan: —Llapaykichis kay kopamanta ukyaychis.
[28] Askha runakunaq huchanku pampachasqa kananpaq, hinallataq mosoq rimanakuypaq hich'akuq yawarniyqa kaymi.
[29] Ichaqa niykichistaqmi: ‘Yayaypa qhapaq suyunpi qankunawan mosoq ubas rurumanta ukyanaykaman, manaña kunanmantaqa kay ubas rurumanta ukyasaqñachu, ’ nispay, nispa.
[30] Dios yupaychana takita takispankutaq, Olibos orqoman lloqsirqanku.
[31] Hinaqtinmi Jesusqa, yachachisqankunata nirqan: —Kay hina qelqasqan kashan: ‘Michiqtan k'irisaq, hinaspataq obehakunaqa, tropanmanta ch'eqechisqa kanqaku,’ nispa. (Zak. 13:7) Chayraykun llapaykichis kunan tuta misk'akunkichis.
[32] Kawsarimpusqay qhepatataq ichaqa, qankunaq ñawpaqeykichista Galilea probinsiaman risaq, nispa.
[33] Pedrotaq kutichispa nirqan: —Llapankuña qanhawa misk'akunqaku chaypas, ñoqaqa manapunin hayk'aqpas misk'akusaqchu, nispa.
[34] Jesustaq Pedrota nirqan: —Cheqaqtan niyki: ‘Kunan tutan manaraq gallo waqamushaqtin, kinsa kutita mananchawanki,’ nispay, nispa.
[35] Hinan Pedroqa Jesusta nirqan: —Qanwan kuskaña wañunay kaqtinpas, manapunin hayk'aqpas mananchasaykichu, nispa. Chay hinallatataqmi llapan yachachisqankunapas, nirqanku.
[36] Hinan Jesusqa, yachachisqankunawan Getsemaní nisqa cheqasman chayarqan. Hinaspataq paykunata nirqan: —Kayllapi tiyashaychis, ñoqataq haqay ladoman rispay, Diosman parlamusaq, nispa.
[37] Hinan Pedrotawan, Zebedeoq iskaynin churinkunatawan pusarikurqan. Hinaspataq anchatapuni khuyay kayta, hinallataq llakikuyta qallarirqan.
[38] Hinaqtinmi Jesusqa, paykunata nirqan: —Sonqoymi sinchi llakisqa wañunayaq hinaraq kashan. Kayllapi rikch'aysiwaspa kashaychis, nispa.
[39] Jesusqa aswanta ñawpaqman rispantaq, qonqorinmanta pampakama k'umuykurqan. Hinan Diosman parlaspa nirqan: —Yayay, atikunmanchus chayqa, kay ñak'ariy kopata ñoqamanta anchhurichiy. Ichaqa ama ñoqaq munasqaychu kachun, aswanpas qanpa munasqaykipuni kachun, nispa.
[40] Yachachisqankunaman kutimuspantaq puñushaqta tarirqan. Hinan Pedrota nirqan: —Chay hinaqa, ¿manachu huk orallapas rikch'aysiwayta atirqankichis?
[41] Mana wateqasqa kanaykichispaq rikch'ashaychis, hinallataq Diosman parlaychis. Cheqapaqmi, espirituqa munashanpuni, aycha kuerpotaqmi ichaqa, pisi-kallpa kashan, nispa.
[42] Wakmanta t'aqarikuspantaq, iskay kutinpi Diosman parlaspa nirqan: —Yayay, sichus kay ñak'ariy kopata manaraq ukyashaqtiy, ñoqamanta mana anchhurichisqa kayta atikunmanchu chayqa, qanpa munayniyki ruwasqa kachun, nispa.
[43] Wakmanta kutimuqtintaqmi, yachachisqankunaq ñawinkuqa sinchi puñuywan atipasqa kasharqan. Chayraykun puñushaqtaqa tarirqan.
[44] Wakmanta paykunata saqeykuspantaq, t'aqarikurqan. Hinan kasqan simikunallawantaq, kinsa kutinpi Diosman parlarqan.
[45] Hinaqtinmi yachachisqankunaman kutimuspa, kay hinata nirqan: —¿Puñushankichisraqchu? ¿Samashankichisraqchu? Qhawariychis, ñan oraqa chayamunña. Runaq Churintataqmi huchasapakunaq makinman hap'ichinqaku.
[46] ¡Sayarispa hakuchis! Qhawariychis, hap'ichiwaqniymi qayllaykamushanña, nispa.
[47] Jesús manaraq rimayta tukushaqtinmi, chayllaman chunka iskayniyoq yachachisqankunamanta huknin, Judasqa chayamurqan. Hinan umalliq saserdotekunaq, hinallataq llaqtamanta umalliq runakunaq kachamusqanku, askha runakuna paywan kuska, espadakunantin, k'aspikunantin ima, hamurqanku.
[48] Jesusta hap'ichiq Judasqa, señaltan qosqa karqan: —Pitachus ñoqa much'aykusaq paymi. Hinan payta hap'inkichis, nispan.
[49] Kasqan ratupachataq, Jesusman asuykuspa nirqan: —¡Rabí, napaykuyki! nispa. Hinan payta much'aykurqan.
[50] Jesustaq Judasta nirqan: —Amigoy, ¿imamanmi hamushanki? nispa. Hinaqtinmi paywan hamuqkunaqa asuykurqanku. Jesusta hap'ispankutaq, presocharqanku.
[51] Chayllamanmi Jesuswan kaqkunamanta hukninqa, makinta haywarispan, espadanta horqorqan. Hinan hatun umalli saserdoteq kamachinpa ninrinta qhorururqan.
[52] Hinaqtinmi Jesusqa payta nirqan: —Espadata lliw hap'iqkunaqa espadawanmi wañuchisqa kanqaku. Chayrayku espadaykitaqa maypi kananman churapuy.
[53] ¿Yayayta waqyakuqtiy kunanpacha wara-waranqa angelninkunata qomuwanantaqa icha manachu yuyaykunki?
[54] Chay hinapunin kanan. Mana chay hina kaqtinqa, ¿imaynatataq Qelqakunari hunt'akunman? nispa.
[55] Chay kasqan ratupin chay askha runakunata nirqan: —¿Suwaman hinachu espadakunantin, k'aspikunantin hap'iqniy hamuwarqankichis? Sapa p'unchaymi, Dios yupaychana wasipi yachachispay, qankunawan kasharqani. Ichaqa manataqmi hap'iwarqankichischu.
[56] Diospa rantinpi rimaqkunaq Qelqasqanku hunt'akunanpaqmi, tukuy kaykunaqa pasashan, nispa. Hinaqtinmi, llapan yachachisqankunaqa Jesusta saqerparispa, ayqekurqanku.
[57] Jesusta hap'imuqkunataq, hatun umalliq saserdote Kaifaspa ñawpaqenman aparqanku. Maypichus kamachikuy simita yachachiqkuna, hinallataq umalliq runakuna huñunasqa kashasqankumanmi aparqanku.
[58] Pedrotaq ichaqa, karullamanta hatun umalliq saserdoteq wasi pationkama qatikurqan. Ukhuman haykuspantaq, imaynapipunichus tukunqa chayta rikunanpaq guardiakunawan tiyasharqan.
[59] Umalliq saserdotekuna, llaqta umalliq runakunapiwan, hinallataq llapan Konsilio Sanedrinpi kaqkunapiwanmi, Jesuspa kontranpi yanqa qasinmanta tumpaspa willakuyta maskhasharqanku. Wañuyman hap'ichinankupaqmi, maskhasharqankuqa.
[60] Chay askha falso testigokunaña rikhuriqtinkupas, manan imatapas tarirqankuchu. Tukukuyllapiñan ichaqa iskay falso testigokuna rikhurimurqanku.
[61] Hinan nirqanku: —Kay runan rimarqan: ‘Dios yupaychana wasita thuniruspaymi, kinsa p'unchayllapi hatarirachisaq,’ nispan, nispanku.
[62] Hatun umalliq saserdote sayarispantaq, nirqan: —¿Kay runakunan, kontraykipi willakushanku chayri, manachu imatapas kutichikunki? nispa.
[63] Jesustaq ichaqa, upallalla karqan. Hinan hatun umalliq saserdoteqa Jesusta nirqan: —!Kawsaq Diospa sutinpi usqhayta niwayku! ¿Qanchu Diospa Churin Cristori kanki? nispa.
[64] Jesustaq payta nirqan: —Qanpa nisqayki hinapunin. Chaymantapas nillaykichistaqmi: ‘Kunanmantapachan Runaq Churintaqa Atiyniyoqpa paña ladonpi tiyashaqta rikunkichis. Hinallataq hanaq pachamanta phuyupi hamushaqta rikullankichistaq,’ nipay, nispan.
[65] Hinaqtinmi hatun umalliq saserdoteqa, p'achanta llik'ikuspa nirqan: —Diostan k'arakta k'amishan. ¿Ima testigokunatañataq nesesitanchisri? Qhawariychis, kunanmi qankuna kikiykichis Diosta k'arak k'amisqanta uyarishankichis.
[66] ¿Chayri, imaynataq rikch'akusunkichis? nispa. Chaypi kashaqkunataq, kutichispa nirqanku: —Wañuchisqapunin kanan, nispanku.
[67] Hinan uyanpi thoqaykurqanku, hinallataq saqmarqanku. Wakintaq ch'aqlarqanku.
[68] Nirqankutaqmi: —!Cristo, pichus maqashasunki, chayta profetisay! nispanku.
[69] Pedrotaq hawa patiopi tiyasharqan. Hinaqtinmi huk kamachi sipasqa, asuykuspa nirqan: —!Qanpas Galilea llaqtayoq Jesuswanmi kasharqanki! nispa.
[70] Paytaq ichaqa, llapankuq ñawpaqenpi mananchaspa nirqan: —Rimasqaykitaqa manan yachanichu. nispan.
[71] Pedro, punkuta lloqsishaqtintaq ichaqa, wak uywasqa sipaspas rikurullarqantaq. Hinan chaypi kashaqkunata nirqan: —Kay runaqa, Nazaret llaqtayoq Jesuswanmi kasharqan, nispa.
[72] Pedrotaqmi ichaqa, yapamanta huramentuwanraq mananchaspa, nirqan: —Ñoqaqa manan chay runataqa reqsillanipaschu, nispan.
[73] Chay ratullamanmi chaypi kashaqkuna asuykuspa, Pedrota nirqanku: —Rimayniykipin paykunaq kasqaykitaqa reqsichikunki. Chayrayku, cheqaqtapunin qanqa paykunamanta kanki, nispanku.
[74] Hinaqtinmi ñakapakuyta qallarirqan. Hinallataq huraspa nirqan: —Manapunin chay runataqa reqsinichu, nispan. Chayllamanmi galloqa waqamurqan.
[75] Jesusmi Pedrota nisqa karqan: —Manaraq gallo waqamushaqtinmi, kinsa kutita mananchawanki, nispan. Hinan Pedroqa chay nisqanta yuyarirurqan. Hawaman lloqsispantaqmi, anchatapuni waqarqan.