[1] Hinaqtinmi, Jerusalén llaqtamanta hamuq wakin kamachikuy simita yachachiqkunapiwan, wakin fariseokunapiwan, Jesusman asuykuspa, tapurqanku.
[2] Nirqankutaq: —¿Imanaqtintaq yachachisqaykikunari machulakunaq ñawpa ruwayninkuta p'akinku? Paykunaqa makinkuta mana mayllikuspankun, t'antata mikhushanku, nispanku.
[3] Jesustaq paykunaman kutichispa nirqan: —¿Imanaqtintaq qankunapas, ruwayniykichisman hina kawsaspaykichis, Diospa kamachikuynintari p'akinkichis? nispa.
[4] Diosqa nirqanmi: ‘Tayta-mamaykita allinpaq qhawarinki,’ nispa. (Éxo. 20:12 Deut. 5:16) Hinan nillarqantaq: ‘Pipas tayta-mamanta ñakaqqa wañuchunpuni,’ nispa. (Éxo. 21:17 Leb. 20:9)
[5] Qankunan ichaqa ninkichis: ‘Pillapas tayta-mamanta ninman: “Tukuy imakunawanchus yanapaykunay karqan, chaytaqa Diosmanñan ofrendayta qopuni,” nispan, chayqa, manañan taytamamantaqa allinpaqñachu qhawarinan,’ nispaykichis.
[6] Chay hinapin, ruwayniykichiskunahawa Diospa kamachikusqanta yanqayachinkichis.
[7] Iskay-uyakuna, allintan Diospa rantinpi rimaq Isaiasqa qankunamanta nirqan.
[8] Payqa nirqanmi: ‘Kay llaqtaqa, rimayllanwanmi hatunchawan, simillanwantaqmi yupaychawanpas, sonqontaqmi ichaqa, ñoqamanta karupi kashan.
[9] Yanqapaqmi yupaychawankupas, Diospa yachachikuyninkunata hinaraqmi, runakunaq kamachikuyninkunata yachachinku,’ nispan, nispa. (Isa. 29:13)
[10] Hinan Jesusqa chay askha runakunata waqyaspan nirqan: —Uyariwaychis, hinallataq entiendiwaychis.
[11] Manan siminta haykuqchu runataqa qhellichan. Aswanpas simimanta lloqsimuqmi runataqa qhellichan, nispa.
[12] Hinaqtinmi yachachisqankunaqa, Jesusman asuykuspa nirqanku: —¿Chay rimasqaykita uyarispa, fariseokunaq phiñarukusqankuta yachankichu? nispanku.
[13] Jesustaq ichaqa, kutichispan nirqan: —Hanaq pacha Yayaypa mana tarpusqan yurakunaqa, llapa- llanmi t'irasqa kanqa.
[14] Hinalla kachunku. Ñawsakunata pusaq ñawsakunan kanku. Ichaqa sichus huk ñawsa ñawsamasinta pusanqa chayqa, iskayninkun t'oqoman urmaykunqaku, nispa.
[15] Pedrotaqmi ichaqa, Jesusman kutichispa nirqan: —Chay rikch'anachiymanta sut'inchaykuwayku, nispa.
[16] Jesustaq nirqan: —¿Manaraqchu qankunapas entiendinkichis?
[17] Llapallan simiman haykuqqa, wiksamanmi haykun. Hinaspataq hisp'akunaman lloqsipun. ¿Chayta manaraqchu entiendirqankichis?
[18] Simimanta lloqsimuqmi ichaqa, sonqomanta lloqsimun. Chaytaqmi runataqa qhellichan.
[19] Chay hinaqa, mana allin yuyaykuykunapas, runa wañuchiykunapas, wasanchaykunapas, qhellipi puriykunapas, suwakuykunapas, yanqa qasinmanta tumpaykunapas, Diosta k'arakta k'amiykunapas sonqomantan lloqsimun.
[20] Chay imaymana mana allinkunan runataqa qhellichan. Ichaqa manataqmi, mana mayllisqa makiwan mikhuyqa runataqa qhellichanchu, nispa.
[21] Chaymanta lloqsipuspantaq, Jesusqa Tiroq, hinallataq Sidonpa suyunkunaman ripurqan.
[22] Hinallamanmi Kaná suyumanta huk warmi chay llaqtakunaq suyunkunamanta lloqsimuspa qaparirqan. Nirqantaq: —¡Davidpa Churin Señor, yanapaykuway! Ususichaymi huk supaypa sinchi ñak'arichisqan kashan, nispan.
[23] Jesustaqmi ichaqa, mana ima simillatapas kutichirqanchu. Chaymi yachachisqankunaqa asuykuspa balikurqanku. Nirqankutaq: —Qaparispa qhepanchista hamushan chay warmita despidipullayña, nispanku.
[24] Kutichispantaq Jesusqa nirqan: —Israel llaqtamanta chinkasqa obehakunallamanmi Yayayqa kachamuwarqan, nispa.
[25] Hinaqtinmi warmiqa, Jesuspa ñawpaqenman hamuspa qonqoriykukurqan. Nirqantaq: —¡Señor ama-hina-kaychu, yanapaykuway! nispan.
[26] Jesustaq ichaqa, warmiman kutichispa nirqan: —Wawakunaq t'antanta hap'ispa alqochakunaman wikch'uyqa, manan allinchu, nispa.
[27] Warmitaq nirqan: —Arí Señor, ichaqa alqochakunapas dueñunkuq mesanmanta urmaspa usuqkunataqa mikhunkun, nispa.
[28] Hinaqtinmi Jesusqa kutichispa nirqan: —Yaw warmi, iñiyniykiqa hatunmá, mañakusqaykiman hina Diosqa ruwachun, nispa. Hinan ususinqa chay oramantapacha qhali kapurqan.
[29] Chaymanta puriripuspantaqmi Jesusqa, Galilea qocha kantuman hamurqan. Hinan orqo pataman wichaspa chaypi tiyaykurqan.
[30] Askha runakunataqmi, Jesusman asuykurqanku. Hinan paykunaqa, wist'ukunata, ñawsakunata, upakunata, mana makiyoqkunata, hinallataq askha onqoyniyoqkunatawan apamuspanku, paypa ñawpaqenman churarqanku. Hinan Jesusqa qhaliyachirqan.
[31] Chay hina kaqtinmi, upakunata rimashaqtaña, mana makiyoqkunatapas makiyoqtaña, wist'ukunatapas purishaqtaña, ñawsakunatapas qhawashaqtaña, rikuspanku, chay askha runakunaqa, yuyayninkupi mana kabesqa kaspa, Israel llaqtaq Diosninta yupaycharqanku.
[32] Yachachisqankunata waqyaspantaq, Jesusqa nirqan: —Kinsa p'unchayñan kay askha runakunaqa, mana mikhusqa ñoqawan kashanku. Mana mikhusqata kacharparipuqtiyqa, ñanpichá yuyayninkuta chinkachikunkuman. Chaytaqa manan munaymanchu. Chayraykun paykunataqa anchatapuni khuyapayani, nispa.
[33] Hinaqtinmi yachachisqankunaqa, payta nirqanku: —¿Kay ch'inniqpiri, maymantataq kay ancha askha runakunaq saksata mikhuykunankupaq, askha t'antatari apamusaqku? nispanku.
[34] Jesustaq paykunata nirqan: —¿Hayk'a t'antaykichistaq kapushasunkichisri? nispa. Paykunataq nirqanku: —Qanchis t'antallan, hinallataq pisi challwachakunallapiwanmi, nispanku.
[35] Hinaqtinmi Jesusqa pampapi tiyaykunankupaq runakunata kamachirqan.
[36] Chay qanchis t'antata, hinallataq challwakunatapas hap'ispantaq, grasiasta qospan phakmirqan. Hinan yachachisqankunaman qorqan. Yachachisqankunataq, askha runakunaman rakimurqanku.
[37] Llapallankun saksata mikhurqanku. Puchuq phakmi t'antakunatataqmi qanchis hatun kanastakunapi hunt'ata huñunpurqanku.
[38] Chay t'antata mikhuqkunataqmi, tawa waranqa qharikuna karqanku. Ichaqa manataqmi warmikunapas, nitaq wawakunapas yupasqachu karqanku.
[39] Hinan runakunata despidipuspan, Jesusqa barkaman wichaspa, Magdala llaqtaq suyunman chayarqan.