[1] Askha runakunata rikuspantaqmi, Jesusqa orqo pataman wicharqan. Chaypi tiyaykuqtintaqmi, yachachisqankunaqa payman asuykurqanku.
[2] Hinan Jesusqa, yachachiyta qallarirqan.
[3] Nirqantaq: —Hanaq pacha qhapaq suyuqa, espiritupi wakchakunaqmi. Chayraykun paykunaqa, kusisamiyoq kanku.
[4] Waqaqkunaqa, sonqochaytan chaskinqaku. Chayraykun paykunaqa, kusisamiyoq kanku.
[5] Llamp'u sonqoyoqkunaqa, hallp'a pachatan tupaqninkupaq chaskinqaku. Chayraykun paykunaqa, kusisamiyoq kanku.
[6] Chanin kaqmanta yarqachikuqkunapas, ch'akichikuqkunapas saksachisqan kanqaku. Chayraykun paykunaqa, kusisamiyoq kanku.
[7] Yanapaykukuqkunaqa, yanapaykusqan kanqaku. Chayraykun paykunaqa, kusisamiyoq kanku.
[8] Ch'uya sonqoyoqkunaqa, Diostan rikunqaku. Chayraykun paykunaqa, kusisamiyoq kanku.
[9] Thak kayman churaqkunaqa, Diospa wawan nispa sutichasqan kanqaku. Chayraykun paykunaqa, kusisamiyoq kanku.
[10] Hanaq pacha qhapaq suyuqa, chaninrayku qatiykachasqakunaqmi. Chayraykun paykunaqa, kusisamiyoq kanku.
[11] Ñoqaraykuchus runakuna k'amisunkichis, qatiykachasunkichis, hinallataq qankunaq kontraykichispi tukuy imaymana mana allinta llullakuspa ninqaku chayqa, kusisamiyoqmi kankichis.
[12] Chay hinatan qankunamanta ñawpaqta hamuq Diospa rantinpi rimaqkunatapas qatiykacharqanku. Chayrayku hanaq pachapi hatun premioykichis kasqanrayku kusikuychis, hinallataq q'ochukuychis, nispa.
[13] Nillarqantaqmi: —Qankunan hallp'a pachapi kachiqa kankichis. Ichaqa kachitaqchus q'aymayapunman chayqa, ¿imawantaq kachichasqari kanqa? Chay kachiqa, manan imapaqpas balenñachu, aswanpas hawaman wikch'upuspa runakunaq sarunallankupaqñan kapunqa, nispa.
[14] Jesusqa nillarqantaqmi: —Qankunan kay pachapi k'anchayqa kankichis. Huk orqo patapi kashaq llaqtaqa, manan pakasqa kayta atinmanchu.
[15] Manallataqmi lamparata hap'ichispaqa, raki ukhumanchu churakun. Aswanpas lamparata churana patamanmi llapan wasipi kaqkunata k'anchananpaq churakun.
[16] Chay hinatayá k'anchayniykichisqa runakunaq ñawpaqenpi k'ancharichun. Hinan allin ruwasqaykichiskunata rikuspanku, hanaq pachapi kashaq Yayaykichista yupaychanqaku, nispa.
[17] Nillarqantaqmi: —Kamachikuy Simita, otaq Diospa rantinpi rimaqkunata yanqayachinaypaq hamusqaytaqa ama yuyaychischu. Manan yanqayachiqchu, aswanpas hunt'anaypaqmi hamurqani.
[18] Kaytaqa cheqaqtan niykichis: ‘Hanaq pachapas, kay pachapas manaraq p'uchukanankamaqa, Kamachikuy Simimanta manan imallapas chinkanqachu. Huk huch'uy qelqachallanpas, nitaq qelqaq huk seq'echallanpas llapan hunt'akunankamaqa manapunin chinkanqachu,’ nispay.
[19] Chay hinaqa, pillapas kay kamachikuykunamanta huk huch'uy kamachikuyllantapas p'akispa, chay hinata runakunaman yachachiqqa kanmanmi. Sichus chay hina kanman chayqa, chay runaqa, hanaq pacha qhapaq suyupiqa huch'uyllapaq qhawarisqan kanqa. Pillapas Kamachikuy Simikunata hunt'aspa yachachiqtaqmi ichaqa, hanaq pacha qhapaq suyupiqa hatunpaq qhawarisqa kanqa.
[20] Niykichismi: ‘Sichus chanin kayniykichis, kamachikuy simita yachachiqkunaqmanta, hinallataq fariseokunaqmanta, mana aswan allinchu kanqa chayqa, manapunin hayk'aqpas hanaq pacha qhapaq suyumanqa haykunkichischu,’ nispay, nispa.
[21] Jesusqa nillarqantaqmi: —Kamachikuy simita yachachiqkunaqa, ñawpa runakunamanmi kay hinata yachachirqanku: ‘Aman wañuchinkichu. Pipas wañuchiqqa chaninchanapaq huchachasqapunin kanqa,’ nispanku. (Éxo. 20:13) Chaytaqa uyarirqankichismi.
[22] Ñoqataq ichaqa niykichis: ‘Pillapas wawqenpa kontranpi phiñakuqqa, chaninchanapaq huchachasqapunin kanqa. Hinallataq, pipas wawqenta ninman: “Mana yuyayniyoq,” nispa chayqa, Konsilio Sanedrinpaq huchachasqapunin kanqa. Hinallataq pipas wawqenta ninman: “Waq'a,” nispa chayqa, nina yawray infiernopaq huchachasqapunin kanqa,’ nispay.
[23] Chay hinaqa, altarman ofrendaykita apamushaspa, chaypitaq wawqeykiwan imallapas qan kontra kasqanta yuyariruwaqmi.
[24] Sichus chay hina kanman chayqa, chay altarpa ñawpaqellanman ofrendaykita saqeykuy. Hinaspataq wawqeykiwanraq ñawpaqtaqa allipunamuy. Chaymantaña kutimuspayki, ofrendaykitaqa churanki.
[25] Awqaykiwan ñanpi kashaspallaraq, usqhayllaman allipunamuy. Mana hinaqa, awqaykin chaninchaqman apasunkiman. Chaninchaqtaq guardiaman apasunkiman, hinaspataq karselpi rikukuwaq.
[26] Cheqaqtan niyki: ‘Llapachallanta pagapunaykikaman, mana chaymantaqa lloqsimunkichu,’ nispay, nispa.
[27] Nillarqantaqmi. —Kamachikuy simita yachachiqkunaqa, kay hinatan yachachirqanku: ‘Aman wasanchankichu,’ nispanku. (Éxo. 20:14) Chaytaqa uyarirqankichismi.
[28] Ñoqan ichaqa niykichis: ‘Pillapas huk warmita munapayaspa qhawarin chayqa, ñan paywan sonqonpi wasancharunña,’ nispay.
[29] Llapan aycha kuerpoykiq infiernoman wikch'uykusqa kananmantaqa, aycha kuerpoykiq huk partin chinkayninmi aswan allinqa kanman. Chayrayku, sichus paña ñawiyki huchaman urmachisunkiman chayqa, horqoruy, hinaspa wikch'upuy.
[30] Hinallataq, llapan aycha kuerpoykiq infiernoman wikch'uykusqa kananmantaqa, aycha kuerpoykiq huk partin chinkayninmi aswan allinqa kanman. Chayrayku, sichus paña makiyki huchaman urmachisunkiman chayqa, wit'urpariy, hinaspa wikch'upuy, nispa.
[31] Jesusqa nillarqantaqmi: —Kamachikuy simita yachachiqkunaqa nillarqankutaqmi: ‘Pillapas warminmanta t'aqakuqqa, t'aqanakuy kartata qochun,’ nispanku. (Deut. 24:1)
[32] Ñoqan ichaqa niykichis: ‘Warmin mana qhellipi puriq kashaqtin t'aqakuqqa wasanchachinmi. Hinallataq t'aqakusqa warmiwan kasarakuqpas, wasanchallantaqmi,’ nispay, nispa.
[33] Nillarqantaqmi: —Hinallataqmi, kamachikuy simita yachachiqkunaqa ñawpa runakunaman yachachirqanku: ‘Aman yanqamanta hurankichu. Aswanpas Señorman hurasqaykikunataqa hunt'ankipunin,’ nispanku. (Deut. 23:21-23) Chaytaqa uyarirqankichismi.
[34] Ñoqan ichaqa niykichis: ‘Aman imaynallanmantapas hurankichischu. Hanaq pachaqa Diospa tiyanan kasqanraykupas amapunin hurankichischu.
[35] Hallp'a pachapas, Diospa chakinpa samaykunanmi. Chayrayku hallp'a pacharaykupas amapuni hurankichischu. Hinallataq Jerusalén llaqtapas, hatun Reypa llaqtanmi. Chayrayku Jerusalén llaqtaraykupas amapuni hurankichischu.
[36] Manan ch'ulla chukchallatapas yuraqyachiyta, nitaq yanayachiyta atiwaqchu. Chayrayku umaykiraykupas amapuni hurankichu,’ nispay.
[37] Rimakuyniykichispi ichaqa, arí nisqaykichisqa, arí nisqallapuni kachun. Hinallataq manan nisqaykichispas, manan nisqallapuni kachun. Chaymanta aswan kaqkunaqa, mana allin kaqmantan hamun, nispa.
[38] Jesusqa nillarqantaqmi: —Kamachikuy simita yachachiqkunan kay hinata yachachirqanku: ‘Ñawita horqoqpaqa, ñawinmi horqosqallataq kanqa, hinallataq kiruta horqoqpapas, kirunmi horqosqallataq kanqa,’ nispanku. (Éxo. 21:24; Leb. 24:20; Deut. 19:21) Chaytaqa uyarirqankichismi.
[39] Ñoqan ichaqa niykichis: ‘Aman millay runamanqa churapakunkichischu, aswanqa pipas paña uyaykipi ch'aqlasunki chayqa, huk kaq uyaykitapas payman kutirillaytaq.
[40] Hinallataq pipas chaninchanaman apaspa, p'achaykita qechusunkiman chayqa, kapaykitapas qoykapullaytaq.
[41] Pipas huk millata q'epinta apanaykipaq qatirisunki chayqa, iskay millatawan apay.
[42] Pipas mañakusunki chayqa, qoykuy. Hinallataq pipas nisunki: ‘Manuykuway,’ nispa chayqa, ama mananchaychu,’ nispay.
[43] Nillarqantaqmi: —Kamachikuy simita yachachiqkunan kay hinata yachachillarqankutaq: ‘Runamasiykitan munakunki, awqaykitataq cheqnikunki, nispanku. (Leb. 19:18) Chaytaqa uyarirqankichismi.
[44] Ñoqataq ichaqa niykichis: ‘Awqaykichiskunata munakuychis, ñakaqniykichiskunatataq saminchaychis, cheqnikuqniykichiskunapaqtaq allinta ruwaychis, hinallataq ñak'arichiqniykichiskunapaqpas, qatiykachaqniykichiskunapaqpas Diosmanta mañapuychis.
[45] Chay hinata ruwaspan, hanaq pachapi kashaq Yayaykichispa wawankunaqa kankichis. Paymi allin runakunapaqpas, mana allin runakunapaqpas intinta lloqsichimun. Hinallataqmi chanin runakunapaqpas, mana chanin runakunapaqpas parataqa parachimun,’ nispay.
[46] Sichus munakuqnillaykichista munakunkichis chayqa, ¿ima chanin premioyoqtaq kankichisri? ¿Manachu tributo qolqe kobraqkunapas chay hinallatataq ruwanku?
[47] Sichus wawqeykichiskunallata napaykunkichis chayqa, ¿imatawantaq aswantari ruwankichis? ¿Manachu tributo qolqe kobraqkunapas chay hinallatataq ruwanku?
[48] Chay hinaqa, imaynan hanaq pachapi kashaq Yayaykichisqa k'apakpuni, chay hinallataq qankunapas k'apakpuni kaychis, nispa.